ស្ពានអាកាស និងផ្លូវក្រោមដីតិចណូនឹងដាក់ឱ្យប្រើប្រាស់បណ្តោះអាសន្ននៅពាក់កណ្តាលខែវិច្ឆិកា

ជាតិ

សង្គមជាតិ

ស្ពានអាកាស និងផ្លូវក្រោមដីតិចណូនឹងដាក់ឱ្យប្រើប្រាស់បណ្តោះអាសន្ននៅពាក់កណ្តាលខែវិច្ឆិកា

31, Oct 2015 , 9:40 pm

រូបភាព

រូបភាព៖ Facebook (Samdech Hun Sen, Cambodian Prime Minister)

ដោយ:

ស្ពានអាកាសនិងផ្លូវក្រោមដីតិចណូមកទល់ពេលនេះសម្រេចបាន ៨៦ភាគរយហើយអាចនឹងដាក់អោយប្រើប្រាស់បណ្តោះអាសន្ននៅអំឡុងពាក់កណ្តាល ខែវិច្ឆិកា ឆ្នាំ២០១៥ នេះ នៅក្នុងពេលដែល នាយករដ្ឋមន្ត្រីរុស្សីមកបំពេញទស្សនៈកិច្ចនៅកម្ពុជា និងក្នុងពេលពិធីបុណ្យអុំទូកខាងមុខនេះ។ នេះបើយោងតាមគេហទំព័រហ្វេសប៊ុក របស់សម្តេចនាយករដ្ឋមន្ត្រីហ៊ុនសែន (Samdech Hun Sen, Cambodian Prime Minister) កាលពីថ្ងៃទី៣០ ខែតុលា។

គេហទំព័រដដែលបានបន្ថែមទៀតថា ទោះបីខាងគណបក្សប្រឆាំងមើលមិនឃើញ និងត្រេកអរចំពោះសមិទ្ធផលទាំងអស់នេះក៏ដោយ ប៉ុន្តែជាក់ស្តែងប្រជាពលរដ្ឋមានផ្លូវស្ពានសម្រាប់ធ្វើដំណើរ«សព្វថ្ងៃគឺប្រជាពលរដ្ឋបានឃើញច្បាស់នូវសមិទ្ឋផលជាតិជាច្រើន ដែលកំពុងរីកលូតលាស់ នៅក្រោមការដឹកនាំរបស់ សម្តេចតេជោ ហ៊ុន សែន។ វាមិនសំខាន់ទេដែលបក្សប្រឆាំងធ្វើជាមើលមិនឃើញ និងមិនត្រេកអរចំពោះសមិទ្ឋផលទាំងអស់នេះ។ សំខាន់បំផុតនោះ គឺប្រជាពលរដ្ឋមានផ្លូវស្ពានប្រើប្រាស់ ដែលជួយសម្រួលដល់ការធ្វើដំណើរ និងការប្រកបកិច្ចការអាជីវកម្មនានា ដែលនាំមកនូវចំណូលក្នុងការបង្កើនជីវភាពរស់ឱ្យកាន់តែប្រសើរឡើង»។

ស្របពេលនេះដែរ គេហទំព័ររបស់សាលារាជធានីភ្នំពេញបានឱ្យដឹងដែរថា ស្ពានអាកាសនិងផ្លូវក្រោមដីតិចណូមានទីតាំងស្ថិននៅតាមបណ្តោយមហាវិថីសហព័ន្ឋរុស្ស៊ី ឆ្លងកាត់ខាងលើប្រសព្វមហាវិថី គីម អ៊ីលស៊ុង និងមហាវិថី ម៉ៅ សេទុង ដែលធ្វើការកសាងតាំងពីថ្ងៃទី៩ ខែកញ្ញា ឆាំ២០១៤ បានសម្រេច ។

គេទំព័រដដែលនេះបានបន្ថែមទៀតថា នៅថ្ងៃទី២៩ ខែតុលា នៅការដ្ឋានសាងសង់គេឃើញក្រុមជាងបានធ្វើការដោះក្តារពុម្ព ការតម្លើងពុម្ពការចាក់បេតុងបង្កាន់ដៃស្ពាន រឹតខ្សែកាបស្ពាន និងពង្រីផ្លូវផងដែរ។

គេហទំព័របានបញ្ជាក់ទៀតថា «ចំពោះអាងស្តុកក្រោមដីនិងការបំពាក់ម៉ូទ័របូមទឹកស្វ័យប្រវត្តិបានបព្ចាប់ ១០០%ហើយ»។