ជាតិ
សង្គមជាតិ
សេដ្ឋកិច្ច
សាលារាជធានីភ្នំពេញស្នើសុំរថយន្តក្រុង១៥០គ្រឿងពីជប៉ុន និង១០០គ្រឿងពីចិន
× ភ្នំពេញ៖ ក្នុងគោលបំណងកាត់បន្ថយការកកស្ទះចរាចរណ៍នៅក្នុងទីក្រុងភ្នំពេញតាមរយៈការបង្កើនសេវាដឹកជញ្ជូនសាធារណៈនោះ សាលារាជធានីភ្នំពេញបាន និងកំពុងរៀបចំនិតិវិធីដើម្បីស្នើសុំរថយន្តក្រុងថ្មីចំនួន១៥០គ្រឿងពីប្រទេសជប៉ុន និង១០០គ្រឿងពីសាធារណៈរដ្ឋចិនប្រជាមានិត។
នាពេលបច្ចុប្បន្ននេះ សាលារាជធានីភ្នំពេញមានរថយន្តក្រុងចំនួន៥០គ្រឿងកំពុងដំណើរការដឹកប្រជាពលរដ្ឋនៅក្នុងរាជធានីភ្នំពេញ សម្រាប់បីខ្សែដើម្បីរំដោះការកកស្ទះចរាចរណ៍។ ប៉ុន្តែ រថយន្តក្រុងចំនួន៥០គ្រឿងនៅលើតែទិសដៅចំនួនបីខ្សែនេះ មិនទាន់អាចដោះស្រាយបញ្ហាកកស្ទះចរាចរណ៍បាននៅឡើយទេ ពីព្រោះ ចំនួនពលរដ្ឋ និងចំនួនយានជំនិះនៅក្នុងទីក្រុងភ្នំពេញមានការកើនឡើងជាលំដាប់ពីមួយឆ្នាំទៅមួយឆ្នាំ។
ក្នុងគោលដៅកាត់បន្ថយបញ្ហាកកស្ទះចរាចរណ៍នេះ សាលារាជធានីភ្នំពេញកំពុងរៀបចំនិតិវិធីស្នើសុំរថយន្តក្រុងថ្មីបន្ថែមពីប្រទេសជប៉ុន និងពីប្រទេសចិន។ លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានថ្លែងប្រាប់សារព័ត៌មានអេឡិចត្រូនិកថ្មីៗនៅថ្ងៃអាទិត្យនេះថា៖«សាលារាជធានីភ្នំពេញ និងអង្គការ Jica ជប៉ុនកំពុងរៀបចំនិតិវិធីស្នើសុំរថយន្តក្រុងថ្មីចំនួន១៥០គ្រឿងពីរាជរដ្ឋាភិបាលជប៉ុន។ ប៉ុន្តែចម្លើយយ៉ាងណានោះ គេនៅមិនដឹងនៅឡើយទេ»។
ជាមួយនឹងសាធារណៈរដ្ឋប្រជាមានិតចិនវិញ លោក ឡុង ឌីម៉ង់ បានបន្ថែមថា សាលារាជធានីភ្នំពេញក៏កំពុងរៀបចំនិតិវិធីស្នើសុំចំនួន១០០គ្រឿងផងដែរ។
លោក ឡុង ឌីម៉ង់ បានបន្ថែមទៀតថា ប្រសិនបើសាលារាជធានីភ្នំពេញនឹងទទួលបានរថយន្តក្រុងចំនួន២៥០គ្រឿងបន្ថែមទៀតនោះ ភ្នំពេញអាចពង្រីកជើងធ្វើដំណើររហូតដល់ទៅ១០ខ្សែ ផ្ទុយពីអ្វីដែលមានស្រាប់ចំនួន៣ខ្សែ៕
© រក្សាសិទ្ធិដោយ thmeythmey.com