កីឡាអន្តរជាតិ
អន្តរជាតិ
Aston Villa តែងតាំងគ្រូថ្មី Remi Garde ជំនួស Tim Sherwood
×
ក្លិប Aston Villa បានប្រកាសតែងតាំងអតីតគ្រូបង្វឹករបស់ Lyon លោក Remi Garde ជាគ្រូបង្វឹកថ្មីដើម្បីជំនួសតំណែងលោក Tim Sherwood។ បើយោងតាមសារព័ត៌មាន BBC គ្រូបង្វឹកសញ្ជាតិបារាំងវ័យ ៤៩ឆ្នាំរូបនេះនឹងចុះហត្ថលេខាលើកិច្ចព្រមព្រៀង រយៈពេលបីឆ្នាំកន្លះក្នុងទឹកដី Villa Park ។
អតីតខ្សែបម្រើក្រុមកាំភ្លើងធំ Arsenal រូបនេះ នឹងទទួលភារកិច្ចដ៏ធ្ងន់ធ្ងរពីលោក Tim Sherwood ក្រោយដឹកនាំ Aston មិនបានល្អសោះ ដោយក្នុង១០ប្រកួតដំបូងរកបានតែ៤ពិន្ទុប៉ុណ្ណោះស្ថិតនៅបាតតារាងនៃក្របខណ្ឌកំពូលរបស់អង់គ្លេស។
សូមបញ្ជាក់បន្តិចថា លោក Garde ធ្លាប់បានដឹកនាំ Lyon បីរដូវកាលដែរ ដោយរដូវកាលដំបូង ក្នុងឆ្នាំ២០១១ បញ្ចប់ទៅត្រឹមលេខ៤ បន្ទាប់មកបានលេខ៣ និងរដូវកាលចុងក្រោយបានលេខ៥ ហើយក្រោយមកក៏ចាកចេញពីតំណែងគ្រូបង្វឹកកាលពីឆ្នាំ២០១៤ ដោយសារហេតុផលផ្ទាល់ខ្លួន និងក្រុមគ្រួសាររបស់លោក។
ក្នុងការផ្លាស់មកដឹកនាំក្រុមថ្មី លោក Garde នឹងនាំយកលោក Reginald Ray ដែលជាគ្រូបង្វឹករបស់ក្រុម Bastia មកធ្វើជាជំនួយការផ្ទាល់របស់លោក ជាមួយនឹងការចាប់ផ្តើមក្នុងការប្រកួតដំបូង ពេលប៉ះមេឃខៀវ Manchester City ក្នុងដីខ្លួនឯង នាថ្ងៃអាទិត្យក្រោយនេះ។
© រក្សាសិទ្ធិដោយ thmeythmey.com