អន្តរជាតិ
នយោបាយអន្តរជាតិ
បក្សកាន់អំណាចតួកគីទទួលជ័យជម្នះជាថ្មីក្នុងការបោះឆ្នោតសភា
× គណបក្សកាន់អំណាចរបស់នាយករដ្ឋមន្ត្រីលោក Ahmet Davutoglu បានទទួលជ័យជម្នះក្នុងការបោះឆ្នោតសភាតួកគីជាថ្មីកាលពីថ្ងៃអាទិត្យម្សិលមិញនេះ។ គណបក្សយុត្តិធម៌និងការអភិវឌ្ឍន៍ បានទទួលសំឡេងភាគច្រើននៅក្នុងសភា និងមានកៅអីគ្រប់គ្រាន់សម្រាប់ការបង្កើតរដ្ឋាភិបាលដោយខ្លួនឯង។ ប៉ុន្តែមានបេក្ខជនបក្សប្រឆាំងខ្លះនិយាយថា ការបោះឆ្នោតមានភាពមិនប្រក្រតី។
បន្ទាប់ពីការរាប់សន្លឹកឆ្នោតជិតបានបញ្ចប់ លទ្ធផលបានបង្ហាញថា គណបក្សយុត្តិធម៌និងការអភិវឌ្ឍន៍របស់នាយករដ្ឋមន្ត្រីបច្ចុប្បន្នលោក Ahmet Davutoglu បានឈ្នះក្នុងការបោះ ឆ្នោតសភាដោយទទួលបានសំឡេងគាំទ្រប្រមាណជិត៥០ភាគរយ ក្នុងការបោះឆ្នោត កាលពីថ្ងៃអាទិត្យម្សិលមិញ។ គណបក្សនេះ អាចទទួលបានកៅអី៣១៦ក្នុងចំណោមកៅអីសរុប៥៥០របស់សភាតួកគី។
ប្រសិនបើគ្មានការប្រែប្រួលលទ្ធផលនោះទេ គណបក្សយុត្តិធម៌និងការអភិវឌ្ឍដែលបង្កើតដោយប្រធានាធិបតីបច្ចុប្បន្នលោក Recep Tayyip Erdogan នឹងមានសំឡេងគ្រប់គ្រាន់ដើម្បីបង្កើតរដ្ឋាភិបាលដោយខ្លួនឯង។ ឯមេដឹកនាំគណបក្សនេះគឺ លោក Ahmet Davutoglu នឹងបន្តតំណែងជានាយករដ្ឋមន្ត្រីក្នុងអាណត្តិថ្មី។
ជុំវិញនៃលទ្ធផលនេះដែរ បានបង្កការភ្ញាក់ផ្អើលជាខ្លាំង ពីព្រោះកាលពីការបោះឆ្នោតក្នុងខែមិថុនា គណបក្សកាន់អំណាចទទួលបានការគាំទ្រតែ៤០ភាគរយប៉ុណ្ណោះដែលបានបង្ក ឲ្យមានភាពចម្រូងចម្រាសដោយសារមិនមានបក្សផ្សេងទៀតចូលសម្ពន្ធ័ដើម្បីបង្កើតរដ្ឋាភិបាលបាន។ តែពេលនេះគណបក្សនេះ បែរជាទទួលបានការគាំទ្រសំឡេងភាគច្រើនក្នុងសភាទៅវិញ។
ថ្លែងទៅកាន់អ្នកគាំទ្រនៅទីក្រុងកំណើត លោកនាយករដ្ឋមន្ត្រី Ahmet Davutoglu បានប្រកាសពីជ័យជម្នះរបស់គណបក្សលោក។ លោក Davutoglu ក៏បានអរគុណដល់ប្រជាជនទាំងអ្នកបោះឆ្នោតជូនលោកនិងអ្នកមិនបោះឱ្យ ដោយលោកបានបញ្ជាក់ថា នេះជាជ័យជម្នះរបស់ប្រជាជនតួកគីទាំង៧៨លាននាក់។
យ៉ាងណាក៏ដោយចំពោះជ័យជម្នះនេះ អ្នកដែលសប្បាយចិត្តនោះគឺលោក Erdoganប្រធានាធិបតីបច្ចុប្បន្នទៅវិញទេ។ ស្របពេលគណបក្សលោកទទួលសំឡេងភាគច្រើននៅក្នុងសភា លោក Erdogan អាចនឹងបំពេញមហិច្ឆតារបស់លោកក្នុងការធ្វើវិសោធនកម្មរដ្ឋធម្មនុញ្ញដើម្បីអាចឱ្យលោកពង្រឹងអំណាចរបស់លោកកាន់តែយូរបាន៕
គួរបញ្ជាក់ផងដែរថា ការបោះឆ្នោតនេះបានធ្វើឡើង ស្របពេលដែលមានការប្រេះឆានិងការកើនឡើងអំពើហិង្សាកំពុងហែកហួរនៅក្នុងតំបន់ ជាពិសេសជម្លោះក្នុងប្រទេសស៊ីរីដែលជាអ្នកជិតខាងប្រទេសតួកគី៕
© រក្សាសិទ្ធិដោយ thmeythmey.com