កីឡាអន្តរជាតិ
អន្តរជាតិ
FA សម្រេចពិន័យ Mourinho ១ប្រកួត និងប្រាក់៤ម៉ឺនផោន
× សហព័ន្ធកីឡាបាល់ទាត់អង់គ្លេស FA បានសម្រេចដាក់ពិន័យ អ្នកចាត់ការទូទៅក្រុមតោខៀវ Chelsea លោក Jose Mourinho មិនឲ្យចូលទីលាន១ប្រកួត និងទឹកប្រាក់ ៤ម៉ឹនផោន (ជាង៦ម៉ឹនដុល្លារអាមេរិក)នេះបើយោងតាមសារព័ត៌មាន BBC ចុះផ្សាយកាលពីម្សិលមិញ។
ការដាក់ពិន័យខាងលើធ្វើឡើងបន្ទាប់ពី FA រកឃើញថា អ្នកចាត់ការទូទៅសញ្ជាតិព័រទុយហ្គាល់លោក Mourinho បានប្រើពាក្យសម្តី និងឥរិយាបទមិនសមរម្យ ដាក់អាជ្ញាកណ្តាលលោក Jon Moss ក្នុងពេលប្រកួត និងនៅពេលសម្រាក១៥នាទីក្នុងបន្ទប់ផ្លាស់សម្លៀកបំពាក់មុនចូលតង់ទី២ កាលពីប្រកួតចាញ់ក្រុម West Ham United ២-១ ក្នុងទឹកដី Upton Park កាលពីខែមុន។
បុរសវ័យ៥២ឆ្នាំដែលមានរហស្សនាម «Special One» នឹងត្រូវអាក់ខានមួយប្រកួតឲ្យ Chelsea ពេលប៉ះក្រុម Stoke City ក្នុងក្របខណ្ឌ Premier League នាថ្ងៃសៅរ៍ចុងសប្តាហ៍នេះ។ ហើយចំណែកឯជំនួយការរបស់ Mourinho លោក Silvino Louro ក៏ត្រូវបាន FA ដាក់ពិន័យផងដែរបន្ទាប់ពីរកឃើញថាបានប្រើឥរិយាបទមិនសមរម្យនៅក្នុងតំបន់បច្ចេកទេសកាលពីប្រកួតជាមួយ West Ham United។
សូមបញ្ជាក់បន្តិចថា សម្រាប់១១ប្រកួត របស់ Chelsea គឺរកបានតែ១១ពិន្ទុប៉ុណ្ណោះដោយឈរនៅលេខរៀងទី១៥ក្នុងតារាងក្របខណ្ឌ Premier League តាមពីក្រោយក្រុមកំពូលតារាង Manchester City ១៤ពិន្ទ។
© រក្សាសិទ្ធិដោយ thmeythmey.com