បើដាក់ «ការ» នៅដើមពាក្យ កុំដាក់ «ន៍ ឬណ៍» នៅខាងចុង តែបើដាក់ «ន៍ ឬណ៍» នៅខាងចុងពាក្យ កុំដាក់ «ការ» នៅខាងដើម

ពីនេះ ពីនោះ

បើដាក់ «ការ» នៅដើមពាក្យ កុំដាក់ «ន៍ ឬណ៍» នៅខាងចុង តែបើដាក់ «ន៍ ឬណ៍» នៅខាងចុងពាក្យ កុំដាក់ «ការ» នៅខាងដើម

08, Nov 2015 , 9:39 pm

រូបភាព

ដោយ: ថ្មីៗ

ប្រជាពលរដ្ឋភាគច្រើនមានភាពស្រពេចស្រពិលក្នុងការសរសេរពាក្យណាដែលមាន «ន៍ ឬណ៍» នៅខាងចុង។ អ្នកខ្លះ សរសេរពាក្យមួយដោយដាក់ពាក្យ «ការ» នៅខាងដើមពាក្យផង ហើយដាក់ «ន៍ ឬណ៍» នៅខាងចុងពាក្យថែមទៀត ដូចជាការសរសេរពាក្យ ការអភិវឌ្ឍន៍ និងការបដិវត្តន៍ ជាដើម។ ការសរសេរបែបនេះមិនត្រឹមត្រូវទេ។ ប្រសិនបើដាក់ពាក្យ «ការ» នៅខាងដើមហើយ មិនត្រូវដាក់ «ន៍ ឬណ៍» នៅខាងចុងនោះទេ ហើយបើដាក់ «ន៍ ឬណ៍» នៅខាងចុងវិញនោះ ពុំគួរបន្ថែមពាក្យ «ការ» នៅខាងដើមទៀតឡើយ ព្រោះ «ន៍ ឬណ៍» មានន័យស្មើនឹង «ការ» ស្រេចហើយ។ ដូច្នេះ ពាក្យដែលត្រឹមត្រូវគឺ ការអភិវឌ្ឍ ឬអភិវឌ្ឍន៍, ការបដិវត្ត ឬបដិវត្តន៍។

តាមពិត «ននិងណ» បានក្លាយមកពីធាតុដើមថា «យុ» ដែលប្រែថា «ការ»។ នៅក្នុងភាសាបាលី «យុ» នេះគ្រាន់តែជាធាតុដើមប៉ុណ្ណោះ តែមិនត្រូវបានយកមកប្រើនោះទេ។ នៅពេលណាគេយក «យុ» មកប្រើ នោះគេត្រូវប្តូររូបទៅជា «ន ឬណ» ជាមុនសិន ដូចជាពាក្យថា វឌ្ឍនៈ (ការលូតលាស់ ឬការរីកចម្រើន), មរណៈ (ការស្លាប់) ជាដើម។

ចំណែកឯភាសាខ្មែរ បានយកធាតុដើម «យុ» នេះមកប្រើដូចគ្នា ហើយក៏ត្រូវតែប្តូរទៅជា «ន ឬណ» ជាមុនផងដែរ ហើយបានដាក់ទណ្ឌឃាត (៍) ពីលើ ដើម្បីកុំឲ្យយើងអានព្យញ្ជនៈនេះ។ ឧទាហរណ៍ថា៖ អភិវឌ្ឍន៍ (ការរីកចម្រើន), អនុវត្តន៍ (ការប្រព្រឹត្តតាម ឬការធ្វើតាម), បដិវត្តន៍ (ការប្រែប្រួល ឬការផ្លាស់ប្តូរនូវអ្វីមួយ), ចរាចរណ៍ (ការដើរទៅមកឬការធ្វើដំណើរទៅមក) ជាដើម។

យើងសង្កេតឃើញថា «ន៍ ឬណ៍» មានន័យស្មើនឹង ពាក្យថា «ការ» ។ ដូច្នេះ យើងមិនត្រូវដាក់ពាក្យថា «ការ» នៅពីមុខពាក្យណាមួយនោះទេ ប្រសិនបើយើងបានដាក់ «ន៍ ឬណ៍» នៅខាងចុងរួចហើយ ឬមិនត្រូវដាក់ «ន៍ ឬណ៍» នៅខាងចុងពាក្យឡើយ ប្រសិនបើយើងបានដាក់ពាក្យ «ការ» នៅខាងដើម។

ចុះពេលណាត្រូវដាក់ «ន៍» ហើយពេលណាត្រូវដាក់ «ណ៍»? ជាទូទៅ រាល់ពាក្យទាំងអស់ត្រូវដាក់ «ន៍» ដូជាពាក្យថា អភិវឌ្ឍន៍, អនុវត្តន៍, បដិវត្តន៍, អនុសាសន៍, ប្រសាសន៍, គមនាគមន៍ ជាដើម។ លើកលែងតែពាក្យណាដែលមានអក្សរ «រ» នៅខាងចុង នោះត្រូវប្រើ «ណ៍» វិញ ដូចជាពាក្យថា ទឡ្ហីករណ៍, សហករណ៍, ព្រឹត្តិការណ៍, អធិករណ៍ ជាដើម៕