ប្រធានាធិបតី មីយ៉ាន់មា ត្រូវជ្រើសរើសនៅខែមករា ហើយរដ្ឋាភិបាលបង្កើត២ខែបន្ទាប់

អន្តរជាតិ

នយោបាយអន្តរជាតិ

ប្រធានាធិបតី មីយ៉ាន់មា ត្រូវជ្រើសរើសនៅខែមករា ហើយរដ្ឋាភិបាលបង្កើត២ខែបន្ទាប់

11, Nov 2015 , 4:00 pm

រូបភាព

ដោយ: លីម តុលា

តំណែងប្រធានាធិបតី មីយ៉ាន់មា ត្រូវជ្រើសរើសនៅខែមករា ហើយរដ្ឋាភិបាលបង្កើត២ ឬ៣ខែបន្ទាប់។ តែគេមិនទាន់ដឹងទេថា នរណាជាប្រធានាធិបតីនៃប្រទេស មីយ៉ានម៉ា នោះទេ។

ប្រធានាធិបតីនៃប្រទេស មីយ៉ាន់ម៉ា លោក ថេន សេន អបអរសាទរជ័យជម្នះរបស់អ្នកស្រី អ៊ុងសាន ស៊ូជី និងត្រៀមប្រគល់អំណាចដោយសន្តិវិធីជូនដល់គណបក្សប្រឆាំងដែលដឹកនាំដោយអ្នកស្រី អ៊ុងសាន ស៊ូជី។ នេះបើយោងតាមអ្នកនាំពាក្យរបស់ប្រធានាធិបតី ថេន សាន ថ្លែងប្រាប់វិទ្យុអូស្ត្រាលីនៅថ្ងៃទី១១ខែវិច្ឆិកានេះ។

បើយោងតាមវិទ្យុដដែល តំណែងប្រធានាធិបតីនឹងត្រូវជ្រើសរើសនៅខែមករាឆ្នាំ២០១៦ខាងមុខនេះ ហើយរដ្ឋាភិបាលថ្មីនឹងត្រូវបង្កើតឡើងនៅខែមិនា ឬខែមេសាឆ្នាំ២០១៦ខាងមុខ។

ទាក់ទងនឹងតំណែងប្រធានាធិបតីនេះ អ្នកស្រី អ៊ុងសាន ស៊ូជី ត្រូវបានរដ្ឋធម្មនុញ្ញនៃប្រទេស មីយ៉ានម៉ា រារាំងមិនឲ្យអ្នកស្រីកាន់តំណែងនេះបានទេ ព្រោះតែស្វាមីរបស់អ្នកស្រីជាជនជាតិបរទេស (ជនជាតិអង់គ្លេស)។ ត្រង់ចំណុចនេះ លោកស្រី អ៊ុងសាន ស៊ូជី ធ្លាប់បានប្រាប់អ្នកសារព័ត៌មានថា អ្នកស្រីនឹងទទួលបានតំណែងខ្ពស់ជាងតំណែងប្រធានាធិបតីទៅទៀត។

សរុបសេចក្តីមក គេមិនទាន់ដឹងទេថា តើអ្នកស្រីនឹងកាន់តំណែងអ្វីពិតប្រាកដនោះ។ តែអ្វីដែលគេដឹងច្បាស់ គឺថា ទោះជាអ្នកស្រីមិនអាចកាន់អំណាចជាប្រធានាធិបតីបានក៏ដោយ ក៏អ្នកស្រីនៅតែជាបុគ្គលដ៏មានអំណាចខ្ពស់បំផុតដើម្បីកាត់ចង្កូតដឹកនាំប្រទេស មីយ៉ានម៉ា នេះដែរ៕