អន្តរជាតិ
នយោបាយអន្តរជាតិ
លោកអាហ្គីណូ ស្វាគមន៍លោកស៊ីជីពីងដោយមិនលើកពីជម្លោះដែនសមុទ្រក្នុងកិច្ចប្រជុំAPEC
× ប្រធានាធិបតីហ្វីលីពីន លោកប៊ែរនីណូ អាហ្គីណូ បានសន្យាថា នឹងស្វាគមន៍លោកប្រធានាធិបតីចិន ស៊ី ជីនពីងនៅក្នុងឱកាសនៃកិច្ចប្រជុំសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកដែលនឹងធ្វើឡើងនៅសបា្ហហ៍ក្រោយ។ ការអះអាងនេះធ្វើឡើងខណៈកម្តៅនៃការប្រឈមមុខរវាងចិន និង ហ្វីលីពីន កំពុងតែឡើងក្តៅលើសំណុំរឿងសមុទ្រចិនខាងត្បូង។
លោក មុំ ពិទូរ្យ លម្អិតព័ត៌មាននេះ
ក្រោមការអញ្ចើញពីសមភាគីលោក Albert Del Rosario លោក វ៉ាង យី បានផ្តើមដំណើរទស្សនកិច្ចផ្លូវការមួយក្នុងប្រទេសហ្វីលីពីនកាលពីថ្ងៃម្សិលមិញ។ ក្នុងដំណើរទស្សនកិច្ចនេះ ភាគីទាំងពីរ បានប្តេជ្ញាបន្តដោះស្រាយបញ្ហារួមគ្នាដើម្បីធានាបាននូវទំនាក់ទំនងទ្វេភាគីធម្មតា ស្ថិរភាព និង មិត្តភាពរវាងប្រទេសទាំងពីរ។
ខណៈកំពុងតែមានការប្រឈមមុខគ្នាខ្លាំងជាមួយហ្វីលីពីននៅក្នុងដែនសមុទ្រចិនខាងត្បូង លោក វ៉ាង យី បានប្តេជ្ញាក្នុងការដោះស្រាយបញ្ហាជាមួយហ្វីលីពីនតាមរយៈការពិគ្រោះយោបល់ និង ការចរចា និង ជំរុញឲ្យមានការស្វែងរកដំណោះស្រាយរួមគ្នានៅពេលខាងមុខ។ ដោយមិនបំភ្លេចពីសមិទ្ធផល ខ្លួនក្នុងការធ្វើជាប្រធាននៃកិច្ចប្រជុំសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក លោក វ៉ាងយី ក៏បានបង្ហាញពីការសង្ឃឹមយ៉ាងមុតម៉ាំថា ហ្វីលីពីន នឹងអាចដឹកនាំកិច្ចប្រជុំទៅដោយរលូនដើម្បីបន្តលើកកម្ពស់សហប្រតិបត្តិការសេដ្ឋកិច្ច និង ពាណិជ្ជកម្មនៅក្នុងតំបន់។
សូមបញ្ជាក់ផងដែរថា នៅថ្ងៃទី១៧-១៩ ខែវិច្ឆិកាខាងមុខនេះ ហ្វីលីពីន នឹងធ្វើជាប្រធាននៃកិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកនៅក្នុងក្រុងម៉ានីលដែលនឹងមានវត្តមានមេដឹកនាំកំពូលពិភពលោកដូចជាចិន និងអាមេរិកជាដើម។ កិច្ចប្រជុំនេះ នឹងផ្តោតលើចំណងសេដ្ឋកិច្ចរវាងបណ្តាប្រទេសនៅក្នុងតំបន់ប៉ាស៊ីហ្វិក។
ឆ្លើយតបជាមួយនឹងការលើកឡើងរបស់លោកប្រធានាធិបតីហ្វីលីពីន ប៊ែរនីណូ អាហ្គីណូ បានសម្តែង ក្តីសង្ឃឹមថាភាគីទាំងពីរអាចដោះស្រាយជម្លោះដោយសន្តិភាពតាមរយៈការចរចាដើម្បីឈានទៅរក ដំណោះស្រាយដែលអាចទទួលបានទាំងសងខាង។ អ្វីដែលគួរកត់សម្គាល់នោះ លោក អាហ្គីណូ បានសន្យាថា ក្នុងកិច្ចប្រជុំAPEC ខាងមុខនឹងផ្តោតតែលើបញ្ហាសេដ្ឋកិច្ចតែប៉ុណ្ណោះ ហើយ បញ្ហាជម្លោះសមុទ្រចិនខាងត្បូង នឹងមិនត្រូវដាក់បញ្ចូលនៅក្នុងរបៀបវារៈនៃកិច្ចប្រជុំនោះឡើយ។ លោក អាហ្គីណូ ក៏បានសន្យាថា នឹងស្វាគមន៍ចំពោះវត្តមានប្រធានាធិបតីចិន លោក ស៊ី ជីនពីងនៅក្នុងកិច្ចប្រជុំដោយ កក់ក្តីផងដែរ។
តាមពិតទៅគេបានដឹងរួចមុនទៅហើយ ចំពោះវត្តមានរបស់លោក វ៉ាង យី មុនពេលកិច្ចប្រជុំកំពូលក្នុង តំបន់APEC ទៅកាន់ហ្វីលីពីននេះ។ នោះ គឺជាការចរចាក្នុងការមិនលើកបញ្ហាសមុទ្រចិនខាងត្បូងដាក់នៅ ក្នុងវេទិកាដែលនឹងត្រូវចូលរួមដោយភាគីចំនួន២១ ដែលត្រូវរួមបញ្ចូលទាំងភាគីពាក់ពន្ធ័រដ្ឋអាស៊ាន និង អាមេរិកផងដែរនោះ ហើយបញ្ហានេះ ក៏កំពុងតែត្រូវបានចាប់អារម្មណ៍ពីសហគមន៍អន្តរជាតិស្រាប់ ផងដែរ។
សូមបញ្ជាក់បន្តិចថា ហ្វីលីពីន និង ចិន គឺជាប្រទេសជិតនឹងគ្នា ហើយ ក៏ជាដៃគូប្រជែងគ្នាយ៉ាងខ្លាំងក្លា នៅក្នុងសមុទ្រចិនខាងត្បូងផងដែរ។ កន្លងមកហ្វីលីពីន តែងតែបដិសេធរាល់ការចរចាជាលក្ខណៈ ទ្វេ ភាគីជាមួយចិន។ ចុងក្រោយនេះ ភាគីទាំងពីរ ក៏បានបង្ហាញសាច់ដុំដាក់គ្នាតាមរយៈការពង្រឹងវិស័យយោធា ហើយ ហ្វីលីពីន ក៏បានប្តឹងចិនប្រឆាំងនឹងការរំលោភអធិបតេយ្យនៅក្នុងតំបន់ជម្លោះសមុទ្រចិនខាង ត្បូង នៅមជ្ឈត្តការនៃតុលាការអន្តរជាតិផងដែរ៕
© រក្សាសិទ្ធិដោយ thmeythmey.com