អន្តរជាតិ
នយោបាយអន្តរជាតិ
ចិន-ថៃ ត្រៀមធ្វើសមយុទ្ធយោធាទ័ពអាកាសរួមគ្នាជាលើកដំបូង
× មន្ត្រីក្រសួងការពារជាតិចិន បានបញ្ជាក់ថា កងទ័ពអាកាសចិននិងថៃ នឹងធ្វើសមយុទ្ធយោធារួមគ្នាជាលើកដំបូងនៅខែនេះក្នុងប្រទេសថៃ។ សមយុទ្ធនេះ ត្រូវបានមើលឃើញថា ជាការខិតជិតទៅរករដ្ឋាភិបាលក្រុងប៉េកាំងរបស់រដ្ឋាភិបាលយោធាថៃ។
កាលពីម្សិលមិញ ក្រសួងការពារជាតិចិន បានចេញសេចក្ដីប្រកាសព័ត៌មានមួយថា សមយុទ្ធរួមគ្នាដែលមានឈ្មោះថា Falcon Strike២០១៥ រវាងកងទ័ពអាកាសចិននិងថៃ នឹងត្រូវធ្វើឡើងក្នុងមូលដ្ឋានកងទ័ពអាកាសកូរ៉ាតក្នុងប្រទេសថៃ។ សមយុទ្ធនេះនឹងចាប់ផ្ដើមពីថ្ងៃទី១២ដល់ថ្ងៃទី៣០ ខែវិច្ឆកា ។
សេចក្ដីប្រកាសព័ត៌មានដដែលបន្តថា គោលបំណងនៃសមយុទ្ធរួមគ្នា គឺដើម្បីបង្កើនការរៀនពីគ្នានិងការយល់ចិត្តគ្នារវាងកងទ័ពអាកាសប្រទេសទាំងពីរ។ ហើយម្យ៉ាងទៀត ដើម្បីពង្រឹងទំនាក់ទំនងចិន-ថៃ ក៏ដូចជាមិត្តភាព និងការជឿជាក់រវាងប្រទេសទាំងពីរផងដែរ។
យ៉ាងណាក៏ដោយ សមយុទ្ធនេះហាក់បង្ហាញពីការងាកទៅរកចិនរបស់រដ្ឋាភិបាលសឹកថៃ ដែលបានដណ្ដើមអំណាចពីរដ្ឋាភិបាលស៊ីវិលដោយរដ្ឋប្រហារកាលពីខែឧសភាឆ្នាំ២០១៤។ រដ្ឋប្រហារនេះត្រូវបានលោកខាងលិចថ្កោលទោសយ៉ាងខ្លាំង ប៉ុន្តែរដ្ឋាភិវបាលយោធាចបែរជាទទួលបានការគាំទ្រពីសំណាក់ប្រទេសចិនទៅវិញ។
សូមបញ្ជាក់ផងដែរថា ចាប់ពីរដ្ឋប្រហារថ្ងៃទី២២ ខែឧសភា រដ្ឋាភិបាលក្រុងបាងកក មានទំនាក់ទំនងយ៉ាងជិតស្និទជាមួយរដ្ឋាភិបាលក្រុងប៉េកាំង ចំពេលដែលទីក្រុងប៉េកាំងបានបង្កើនឥទ្ធិពលរបស់ខ្លួនក្នុងតំបន់តាមរយៈជំនួយនិងកម្ចីយ៉ាងសន្ធឹកសន្ធាប់៕
© រក្សាសិទ្ធិដោយ thmeythmey.com