តាមពិតទៅក្រុមកីឡាបាល់ទាត់ជម្រើសជាតិកម្ពុជា អស់ផ្លូវក្នុងការឈានទៅកាន់ជុំទីបីនៃវគ្គជម្រុះ World Cup ប្រចាំតំបន់អាស៊ីហើយ ប៉ុន្តែបេសកកម្មរបស់ពួកគេមិនទាន់បញ្ចប់ទាំងស្រុងនោះឡើយ។ ក្នុងជំនួបជើងទីពីរ ជាមួយអាហ្វហ្គានីស្ថាន នៅកីឡដ្ឋាន Takhti Stadium ក្នុងទីក្រុងតេអេរ៉ង់ ប្រទេសអ៊ីរ៉ង់ នាវេលាល្ងាចម៉ោង៦ និង៣០នាទី (ម៉ោងនៅកម្ពុជា) ថ្ងៃនេះ កម្ពុជានៅតែត្រូវការជ័យជម្នះ សម្រាប់កៅអីវគ្គជម្រុះ Asian Cup ឆ្នាំ២០១៩ ។
ក្រុមកីឡាបាល់ទាត់ជម្រើសជាតិកម្ពុជា ក្រោមការដឹកនាំរបស់គ្រូបង្វឹកកូរ៉េខាងត្បូង លោក Lee Tae Hoon បានរងបរាជ័យទាំង៥ប្រកួតរួចមកហើយនៅក្នុងពូល E។ កម្ពុជាចាញ់សឹង្ហបុរីទាំងពីរជើង ដោយជើងទី១ចាញ់ ៤-០ក្នុងទឹកដីខ្លួនឯង និងជើងទី២ ចាញ់២-១ នៅទឹកដីសឹង្ហបុរី។ ក្នុងជំនួបនៅពហុកីឡដ្ឋានជាតិអូឡាំពិកផងដែរ កម្ពុជាចាញ់អាហ្វហ្គានីស្ថាន ១-០ ចាញ់ស៊ីរី ៦-០ ហើយទៅចាញ់ជប៉ុន ៣-០ នៅក្នុងទីក្រុង Saitama។
សូមរម្លឹកថា នាជំនួបជាមួយអាហ្វហ្គានីស្ថានកាលពីជើងទី១ ថ្ងៃទី២៤ ខែមិថុនាកន្លងទៅ ក្រុមជម្រើសជាតិកម្ពុជាបានរងបរាជ័យលើទឹកដីខ្លួនឯង ក្នុងលទ្ធផល ១-០ ដែលស៊ុតបញ្ជូលទីដោយកីឡាករ Mustafa Zazai នៅនាទី៨៦ ជិតបញ្ចប់ការប្រកួតទៅហើយ។
សម្រាប់ការប្រកួតជម្រុះជុំទី២ នៅក្នុងពូល E នេះ ស៊ីរីឈរលេខមួយបណ្តោះអាសន្ន មាន១២ពិន្ទុ ជប៉ុនឈរលេខ២មាន ១០ពិន្ទុ លេខ៣ សិង្ហបុរីមាន១០ពិន្ទុ អាហ្វហ្គានីស្ថាន ឈរលេខ៤ មាន ៣ពិន្ទុ ខណៈកម្ពុជាបានបរាជ័យទាំង ៥ប្រកួតនោះ ត្រូវធ្លាក់ដោយស្វ័យប្រវត្តិទៅហើយ។
មកដល់ពេលនេះ ក្រុមចំនួន៤ហើយដែលបានហាលអាវពីព្រឹត្តិការណ៍ជម្រុះ World Cup ឆ្នាំ២០១៩ ដែលក្នុងនោះមាន ប៊ូតង់ (ពូល C) ឥណ្ឌា (ពូល D) កម្ពុជា (ពូល E) និងយ៉េមែន (ពូល H) ប៉ុន្តែយុទ្ធនាការរបស់ពួកគេមិនទាន់បញ្ចប់នោះឡើយ។ ដើម្បីឲ្យការប្រកួតមានលក្ខណៈសំបូរបែប សហព័ន្ធកីឡាបាល់ទាត់ទ្វីបអាស៊ី បានប្រើប្រាស់រូបមន្តថ្មីសម្រាប់ការប្រកួតជម្រុះពានរង្វាន់ AFC Asian Cup ឆ្នាំ២០១៩ ដោយភ្ជាប់ជាមួយនឹងលទ្ធផលនៃការប្រកួតជម្រុះ World Cup ឆ្នាំ២០១៨ ។
ក្រុមចំណាត់ថ្នាក់លេខមួយក្នុងពូលទាំង៨នៃការប្រកួតជម្រុះ World Cup ជុំទីពីរ ត្រូវបន្តទៅជុំទីបី និងវគ្គចុងក្រោយនៃព្រឹត្តិការណ៍ Asian Cup ឆ្នាំ២០១៩ នៅក្នុងប្រទេសអារ៉ាប់រួមអេមីរ៉េត ហើយក្រុមលេខ២ត្រូវធ្វើការប្រៀបធៀបពិន្ទុគ្នា ដោយមានតែ៤ក្រុមប៉ុណ្ណោះ ដែលត្រូវទៅចូលរួមជាមួយក្រុមលេខ១ ។ ក្រុមលេខ៣ លេខ៤លេខ៥ ស្ថិតនៅវគ្គជម្រុះ Asian ទៅតាមលំដាប់លំដោយ។ សម្រាប់កម្ពុជា ជាមួយនឹងការប្រកួតបីលើកដែលនៅសេសសល់ ពួកគេមានផ្លូវតែមួយគត់ក្នុងការប្រជែងយកចំណាត់ថ្នាក់លេខ៤ជាមួយអាហ្វហ្គានីស្ថាន។ បើតាមរូបមន្តប្រកួត ក្រុមលេខ៤នៃពូល៨ចំនួន៤ក្រុមដែលមានពិន្ទុខ្ពស់ ត្រូវលេងក្នុងវគ្គជម្រុះជុំទីបី Asian Cup ខណៈ៤ក្រុមផ្សេងទៀត រួមជាមួយក្រុមលេខ៥ត្រូវធ្លាក់ទៅប្រកួតវគ្គ Asian Cup qualifying Playoff round។
ក្រុមកីឡាជម្រើសជាតិកម្ពុជា៖ អ៊ុំ សេរីរ័ត្ន, ច្រឹង ពលរដ្ឋ, រឿម ចាន់រឿន, ឈិន ឈឿន (ក្រសួងការពារជាតិ), ស៊ូ យ៉ាទី, ហុង ផេង, ឃួន ឡាបូរ៉ាវី, រស់ សំអឿន, ចាន់ វឌ្ឍនាកា, សុខ សុវណ្ណ (បឹងកេតអង្គរ), ទិត្យ ឌីណា, ប្រាក់ មុន្នីភារុណ, ស៊ុន វ៉ាន់ដេត (អគ្គស្នងការដ្ឋាននគរបាលជាតិ), សុះ ស៊ូហាណា, កែវ សុខផេង, ប៊ិន ធារី, វ៉ា សុខថន (ភ្នំពេញក្រោន), នេន សុធារ័ត្ន, ហូយ ផល្លីន, សំអឿន ពិដោរ, សឿយ វិសាល,ណុប តុលា , ប្រាក់ មុន្នីឧត្តម (ស្វាយរៀង)៕