ជាតិ
សង្គមជាតិ
×![]()
ដោយ: ថ្មីៗ
គិតត្រឹមឆ្នាំ១៩៩០ មកដល់ឆ្នាំ២០១៥នេះ កម្ពុជាបានកាត់បន្ថយចំនួនពលរដ្ឋ ៤២ភាគរយ ដែលបន្ទោបង់ពាសវាលពាសកាល ដោយគ្មានបង្គន់អនាម័យ។ នាឆ្នាំ១៩៩០ ពលរដ្ឋកម្ពុជា៨៩ភាគរយ ពុំបានប្រើប្រាស់បង្គន់ បន្ទោបង់ តែរហូតមកដល់ឆ្នាំ២០១៥ អត្រានេះបានថយចុះមកត្រឹម៤៧ភាគរយប៉ុណ្ណោះ។ នេះបើតាមសេចក្តីប្រកាសព័ត៌មានរបស់ក្រសួងអភិវឌ្ឍន៍ជនបទ។
យោងតាមសេចក្តីប្រកាសព័ត៌មាននេះ ពលរដ្ឋកម្ពុជា៨៩ភាគរយពុំមានបង្គន់អនាម័យប្រើប្រាស់ សម្រាប់ការបន្ទោបង់ កាលពីឆ្នាំ១៩៩០។ រហូតមកដល់ឆ្នាំ២០១៥នេះ ការបន្ទោបង់ដោយគ្មានបង្គន់ បានថយចុះមកត្រឹម៤៧ ភាគរយប៉ុណ្ណោះ ។ ការកាន់បន្ថយចំនួនពលរដ្ឋបន្ទោបង់ពាសវាលពាសកាលនេះ ត្រូវបានក្រសួងអភិវឌ្ឍន៍ជនបទ ចាត់ទុកថា ជាវឌ្ឍនភាព ដែលធ្វើឲ្យកម្ពុជាក្លាយជាប្រទេសទី៣ ដោយទទួលបានជោគជ័យជាងគេក្នុងពិភពលោក ក្នុងការកាត់បន្ថយអត្រាពលរដ្ឋបន្ទោបង់ពាសវាលពាសកាលនៅក្នុង រយៈពេលជាង២ទស្សវត្សរ៍ចុងក្រោយនេះ។
ថ្លែងក្នុងកម្មវិធីទិវាជាតិលើកកម្ពស់អនាម័យជនបទលើកទី៦ ក្រោមប្រធានបទ «អនាម័យគឺជាទំនួលខុសត្រូវរបស់យើងទាំងអស់គ្នា» នាថ្ងៃទី១២ ខែវិច្ឆិកា លោក ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ បានអំពាវនាវឲ្យមានការខិតខំប្រឹងប្រែងនិងការគាំទ្របន្ថែមទៀតពីសំណាក់ ស្ថាប័នជាប់ពាក់ព័ន្ធទាំងអស់។ លោកបានបញ្ជាក់បែបនេះថា៖ «ក្រសួងពាក់ព័ន្ធ ដៃគូអភិវឌ្ឍន៍ សង្គមស៊ីវិល សាធារណជន ព្រមទាំងវិស័យឯកជន ចាំបាច់ត្រូវធ្វើការងាររួមគ្នា ដើម្បីពង្រឹងធនធានមនុស្ស ការគ្រប់គ្រង និងការទទួលខុសត្រូវនៅថ្នាក់ជាតិ ថ្នាក់ក្រោមជាតិ ព្រមទាំងបង្កើតបរិយាកាសសមស្របសម្រាប់វិស័យឯកជន»។
រដ្ឋមន្ត្រីរូបនេះ បានបន្ថែមទៀតថា រាជរដ្ឋាភិបាលកម្ពុជា កំពុងលើកកម្ពស់អនាម័យជនបទ ដូចដែលត្រូវបានដាក់ជាអាទិភាពក្នុងផែនការយុទ្ធសាស្ត្រជាតិ ស្តីពីការផ្គត់ផ្គង់ទឹកស្អាតនិងលើកម្ពស់អនាម័យជនបទ ក្នុងគោលបំណងផ្តល់សេវាទឹកស្អាតនិងអនាម័យដល់ប្រជាជនទាំងអស់ ដែលរស់នៅតាមសហគមន៍ជនបទនៅឆ្នាំ ២០២៥ ។
សូមបញ្ជាក់ថា នៅថ្ងៃទី១២ វិច្ឆិកា ម្សិលមិញនេះ ក្រសួងអភិវឌ្ឍន៍ជនបទ រួមជាមួយដៃគូអភិវឌ្ឍន៍ និងសហគមន៍មូលដ្ឋាន បានប្រារព្ធទិវាជាតិលើកកម្ពស់អនាម័យជនបទលើកទី៦ ក្រោមប្រធានបទ «អនាម័យគឺជាទំនួលខុសត្រូវរបស់យើងទាំងអស់គ្នា» ដើម្បីបង្ហាញពីវឌ្ឍនភាព ដែលទេសកម្ពុជាសម្រេចបានកន្លងមក៕
Tag:
ក្រសួងអភិវឌ្ឍជនបទ
© រក្សាសិទ្ធិដោយ thmeythmey.com
