ពីនេះ ពីនោះ
ពាក្យ«មេ» និងពាក្យ«បង»កំពុងពេញនិយមនៅក្នុងសង្គមខ្មែរនាសម័យថ្មី
× ភ្នំពេញ៖ អ្នកមានឋានៈតូចតាច (ឋានៈថ្នាក់ក្រោម) តែងតែហៅ អ្នកដែលមានឋានៈខ្ពស់ជាងច្រើន ឬខ្ពស់ជាងបន្តិចថា«មេ»។ ឥឡូវពាក្យនេះ ក្លាយទៅពាក្យពេញនិយមមែនទែន។ ពេលខ្លះ គ្រាន់តែឃើញបុគ្គលណាម្នាក់ស្លៀកពាក់សម្លៀកបំពាក់ស្អាតបាត សមរម្យ ពេលនោះ បុគ្គលនោះ ត្រូវបានអ្នកផ្សេង ជាពិសេស អ្នកមានឋានៈតូចតាចហៅថា«មេ»ភ្លាម។ ហៅថា«មេ» ពេលខ្លះ ដើម្បីលើកទឹកចិត្តបុគ្គលនោះ។ ហើយត្រឡប់មកវិញ ពួលគេចង់បាន«លុយធីប»។ មានករណីកើតឡើងយូរៗម្តង កូនប៉ូលីសតាមផ្លូវ ដើរទៅគោរពអ្នកបើកបររថយន្តទំនើបៗដោយនិយាយថា៖«សូមគោរពមេ!»។ ជាថ្នូរនឹងពាក្យនេះ លុយ៥ ឬ១០ដុល្លារក៏ធ្លាក់ចេញពីហោប៉ៅបុគ្គលដែលគេហៅថា«មេ»នោះ។
ងាកមកនិយាយពីពាក្យ«បង»វិញ។ ពាក្យនេះក៏កំពុងពេញនិយមខ្លាំងណាស់ដែរ។ ពាក្យនេះ កាលពីដើមឡើយត្រូវបានគេប្រើប្រាស់ភាគច្រើនចំពោះតែដៃគូស្នេហាតែប៉ុណ្ណោះ។ មានន័យថា បើនារីណាម្នាក់ចង់ហៅបុរស ពួកគេភាគច្រើន ច្រើនប្រើប្រាស់ពាក្យ«ពូ»ជំនួសពាក្យ«បង» ពីព្រោះ ពាក្យ«ពូ»មិនបង្កប់ន័យស្នេហាទេ។ តែនៅពេលបច្ចុប្បន្ននេះ ពាក្យ«បង»ត្រូវបាននារីវ័យក្មេងសម័យថ្មីប្រើប្រាស់ដើម្បីធ្វើ Marketing ទៅវិញ។ នៅតាមហាងលក់ទំនិញ និងតាមភោគនីយដ្ឋានភាគច្រើន នារីវ័យក្មេងល្ហក់(១៧ ឬ១៨ឆ្នាំ) នាំគ្នាហៅ អតិថិជន វ័យចំណាស់ដែលពេលខ្លះ មានអាយុរហូតដល់ទៅជាង៦០ឆ្នាំ ឬ៧០ឆ្នាំថា«បង»។
បុគ្គលិកវ័យក្មេងមួយចំនួនត្រូវបានថៅកែតម្រូវឲ្យហៅបុរសវ័យចំណាស់ថា«បង» ពីព្រោះ ពាក្យនេះ អាចទាក់ទាញអារម្មណ៍អតិថិជនបានច្រើន៕
© រក្សាសិទ្ធិដោយ thmeythmey.com