អន្តរជាតិ
នយោបាយអន្តរជាតិ
ក្រោយការវាយប្រហារនៅបារាំង ហ្វីលីពីនប្តេជ្ញាការពារសុវត្ថិភាពមេដឹកនាំចូលរួមកិច្ចប្រជុំ APEC
× ក្រោយករណីវាយប្រហារដោយភេរវកម្មនៅបារាំងសម្លាប់មនុស្សច្រើនជាង១០០នាក់ មេដឹកនាំប្រទេសហ្វីលីពីនបានសន្យាថានឹងរឹតបន្តឹងសន្តិសុខឲ្យរឹងមាំបំផុតដើម្បីការពារសុវត្ថិភាពមេដឹកនាំពិភពលោកដែលនឹងមកចូលរួមកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក( APEC) នៅហ្វីលីពីន។ ប្រធានាធិបតីអាមេរិកលោក បារ៉ាក់ អូបាម៉ា ក៏នឹងអញ្ជើញចូលរួមក្នុងកិច្ចប្រជុំថ្នាក់តំបន់នេះជាមួយបណ្តាមេដឹកនាំផ្សេងទៀតនៅសប្តាហ៍ក្រោយដែរ។
ក្រោយក្រុមភេរវជនអុកឡុកនិងវាយប្រហារនៅទីក្រុងប៉ារីសដោយសម្លាប់មនុស្សប្រហែល១៤០នាក់ បញ្ហាសន្តិសុខកំពុងក្លាយជាបញ្ហាចោទសម្រាប់ហ្វីលីពីនដែលនឹងធ្វើជាម្ចាស់ផ្ទះនៃកិច្ចប្រជុំកិច្ចសហប្រតិបត្តិការអាស៊ីប៉ាស៊ីហ្វិកនៅសប្តាហ៍ក្រោយ។ ប៉ុន្តែហ្វីលីពីនបានប្តេជ្ញាហើយថា ខ្លួននឹងរឹតបន្តឹងសន្តិសុខឲ្យបានប្រសើរតាមដែលអាចធ្វើបានដើម្បីការពារសុវត្ថិភាពមេដឹកនាំពិភពលោកដែលនឹងមានវត្តមានក្នុងកិច្ចប្រជុំខាងមុខ។
វេទិការប្រចាំឆ្នាំនេះនឹងត្រូវរៀបចំឡើងនៅទីក្រុងម៉ានីលពីថ្ងៃ ១៨ ដល់ថ្ងៃ ១៩ ខែវិច្ឆិកានេះ។ ចំណែកមេដឹកនាំសំខាន់ៗដែលនឹងចូលរួមក្នុងកិច្ចប្រជុំវេទិការសេដ្ឋកិច្ចថ្នាក់តំបន់មានសមាជិក ២១នោះ មានដូចជាលោកប្រធានាធិបតីអាមេរិក បារ៉ាក់ អូបាម៉ា នាយករដ្ឋមន្ត្រីជប៉ុន មេដឹកនាំចិន អូស្ត្រាលី កាណាដា រួមជាមួយបណ្តាមេដឹកនាំប្រទេស១៥ផ្សេងទៀត។
ទាក់ទិញចលនាភេរវកម្មនៅប៉ារីសនិងការរឹតបន្តឹងសន្តិសុខក្នុងកិច្ចប្រជុំខាងមុខនេះ អនុរដ្ឋលេខាធិការក្រសួងការបរទេសហ្វីលីពីនដែលជាសមាជិកគណកម្មការរៀបចំសន្និសីទនេះលោក Laura Del Rosario បានអះអាង អ្វីដែលហ្វីលីពីននឹងធ្វើគឺរឹតបន្តឹងសន្តិសុខឲ្យខ្ពស់បំផុត។ បច្ចុប្បន្ននេះរដ្ឋាភិបាលហ្វីលីពីន បានប្រកាសលុបចោលជើងហោះហើរជាច្រើន ហើយក៏បានសម្រេចប្រកាសថ្ងៃ ១៨ និងថ្ងៃ ១៩ខាងមុខជាថ្ងៃឈប់សម្រាកនៅទីក្រុងម៉ានីលផងដើម្បីសម្រួលដល់ការគ្រប់គ្រងសន្តិសុខ។
បើតាមការអះអាងរបស់មន្ត្រីរដ្ឋាភិបាលខាងលើ ជនគ្មានផ្ទះសម្បែងជាង២ម៉ឺននាក់ត្រូវបានអាជ្ញាធរជម្លៀសចេញពីផ្លូវធំៗ ហើយកងកម្លាំងសន្តិសុខប្រហែល១៨ពាន់នាក់នឹងត្រូវគេពង្រាយដើម្បីរក្សាសុវត្ថិភាពដល់បណ្តាមេដឹកនំាពិភពលោកផងដែរ។ ចំណែកផ្លូវធំៗមួយចំនួនត្រូវបានអាជ្ញាធរហ្វីលីពីនបិទដើម្បីរៀបចំសណ្តាប់ធ្នាប់ ហើយអាជ្ញាធរក៏បានស្នើទៅម្ចាស់គេហដ្ឋានតាមដងផ្លូវជាពិសេសនៅតាមអាគារខ្ពស់ត្រូវឲ្យបិទទ្វារបង្អួចនិងប្រុងប្រយ័ត្នក្រែងមានអ្នកលួចប្រើប្រាស់កាំភ្លើង Sniper។
គេបារម្ភផងដែរពីបញ្ហាសុវត្ថិភាពនិងសន្តិសុខនៅក្នុងកិច្ចប្រជុំនៅពេលខាងមុខ ក្រោយក្រុមភេរវជនបានបង្កើនសកម្មភាពរបស់ខ្លួនកាន់តែខ្លាំងឡើងៗ។ ហើយម្យ៉ាងហ្វីលីពីននេះទៀតសោត ក៏មានបញ្ហាជាមួយក្រុមឧទ្ទាមទាមទារផ្តាច់ខ្លួននៅតំបន់ភាគខាងត្បូងដែលស្ថិតនៅចម្ងាយប្រហែល១ពាន់គីឡូម៉ែត្រពីទីក្រុងម៉ានីលយូរអង្វែងមកហើយដែរ។ ដែលនេះជាបញ្ហាប្រឈមមួយសម្រាប់ហ្វីលីពីនក្នុងការរក្សាសន្តិសុខនិងសណ្តាប់ធ្នាប់ទទួលមេដឹកនាំពិភពលោក។
យ៉ាងណាក៏ដោយក្នុងកិច្ចប្រជុំ APEC ខាងមុខនឹងមិនមានវត្តមានលោក វ្ល៉ាឌីមៀ ពូទីន ប្រធានាធីបតីរុស្ស៊ី និងប្រធានាធិបតីឥណ្ឌូនេស៊ីលោក ចូកូ វីដូដូ ឡើយ។ មិនមានការលើកឡើងពីមូលហេតុចម្បងនៃអវត្តមានមេដឹកនាំទាំងពីរនាក់នេះទេ ប៉ុន្តែប្រទេសទាំងពីរនឹងបញ្ជូនអ្នកតំណាងរបស់ខ្លួនទៅចូលរួម៕
Tag:
APEC
ហ្វីលីពីន
បារាំង
© រក្សាសិទ្ធិដោយ thmeythmey.com