អន្តរជាតិ
ស្តេចស្វាស៊ីឡែនយកមហេសី១៥អង្គ បុត្រ៣០អង្គ និងអ្នកបម្រើ១០០នាក់តាមខ្លួន
× ព្រះអង្គ Mswati III ស្តេចនៃប្រទេសស្វាស៊ីឡែន (Swaziland) បានទៅចូលរួមកិច្ចប្រជុំកំពូលឥណ្ឌា-អាហ្វ្រិក នៅទីក្រុងញូវដេលី កាលពីខែតុលា ដោយនាំមហេសីទាំង១៥អង្គ បុត្រ៣០អង្គ និងអ្នកបម្រើចំនួន១០០នាក់ទៅតាមខ្លួន។ នេះបើតាមការផ្សាយរបស់ AKF Insider។
ស្វាស៊ីឡែនជាប្រទេសមួយក្នុងចំណោមប្រទេសអាហ្វ្រិកចំនួន៥៤ដែលត្រូវបានអញ្ជើញឲ្យចូលក្នុងកិច្ចប្រជុំ Indo-African Summit កាលពីខែតុលា កន្លងមក។ នាអំឡុងពេលនោះ ស្តេច Mswati បានកក់បន្ទប់ជាង២០០នៅសណ្ឋាគារផ្កាយ៥មួយក្នុងទីក្រុងដេលី សម្រាប់ក្រុមដែលតាមហែរហមព្រះអង្គក្នុងនោះ មានមេហស៊ី១៥អង្គ បុត្រ៣០អង្គ និងអ្នកបម្រើ១០០នាក់។
ស្តេច Mswati បច្ចុប្បន្ន មានព្រះជន្ម៤៧ព្រះវស្សា បានរៀបអភិសេកជាមួយមហេសីទី១៥ ដែលជាបវរកញ្ញា កាលពីឆ្នាំ២០១៣ ។ ក្នុងចំណោមមហេសីទាំង១៥ មានមហេសី២អង្គប៉ុណ្ណោះ ដែលមានព្រះរាជឋានៈជាម្ចាស់ក្សត្រីយ៍។
ទោះបីជាយ៉ាងណាក៏ដោយ រដ្ឋមន្ត្រីក្រសួងការបរទេស លោក Mgwagwa Gamedze បានច្រានចោលព័ត៌មាននេះ ដោយលោកបានអះអាងថា ស្តេច Mswati យកព្រះមហេសី Inkhosikati តែមួយអង្គប៉ុណ្ណោះទៅតាមខ្លួន ពលរដ្ឋនៅស្វាស៊ីឡែន ដឹងរឿងនេះច្បាស់ណាស់។
ស្តេច Mswati III បានឡើងសោយរាជ្យកាលពីថ្ងៃទី២៥ ខែមេសា ឆ្នាំ១៩៨៦ ក្នុងព្រះជន្ម១៨វស្សា។ ព្រះបិតាព្រះអង្គ ព្រះនាម Sobhuza II ក៏មានមហេសីរហូតដល់១២៥អង្គឯណោះនាអំឡុងនៃការសោយរាជ្យរយៈពេល៨២ឆ្នាំ។
ស្តេច Mswati III ក៏ត្រូវបានកត់ត្រាដោយទស្សនាវដ្តី Forbes កាលពីឆ្នាំ២០០៩ ថា ជាមេដឹកនាំប្រទេសម្នាក់ដែលមានទ្រព្យសម្បត្តិមហាសាលផងដែរ។ អ្វីដែលគួរឲ្យកត់សម្គាល់នោះ ព្រះអង្គមានយានយន្តទំនើប៦២គ្រឿង ជាពិសេសរថយន្តម៉ាក Malbec ដែលមានតម្លៃប្រមាណ៥លានដុល្លារអាមេរិក៕
© រក្សាសិទ្ធិដោយ thmeythmey.com