អន្តរជាតិ
នយោបាយអន្តរជាតិ
អតីតមេដឹកនាំប្រទេសពីររូបទទួលពាន Gusi Peace Prize ជាមួយលោក ហ៊ុន ម៉ានី
× ក្នុងចំណោមជ័យលាភី១៩រូបដែលត្រូវឡើងទៅទទួលពានរង្វាន់សន្តិភាព Gusi Peace Prize នៅក្នុងទីក្រុងម៉ានីល ប្រទេសហ្វីលីពីន នាល្ងាចថ្ងៃទី២៥ ខែវិច្ឆិកា មាន២នាក់គឺជាអតីតមេដឹកនាំប្រទេស ដែលក្នុងនោះមាន លោក António Ramalho Eanes អតីតប្រធានាធិបតីព័រទុយហ្គាល់ និងលោក Stanislav Shushkevich អតីតប្រមុខរដ្ឋបេឡារុស។
លោក António Ramalho Eanes វ័យ៨០ឆ្នាំ អតីតឧត្តមសេនីយ៍ ដែលកាន់តំណែងជាប្រធានាធិបតីទី១៦របស់ព័រទុយហ្គាល់ពីឆ្នាំ១៩៧៦ ដល់ឆ្នាំ១៩៨៦ ។ សម្រាប់ពានរង្វាន់ Gusi Peace Prize លោកនឹងទទួលបានពានផ្នែក «បុរសរដ្ឋ» (statesmanship) ។
លោក Stanislav Shushkevich អាយុ៨០ឆ្នាំផងដែរនោះ គឺជាប្រមុខរដ្ឋទី១របស់ប្រទេសបេឡារុស បន្ទាប់ពីផ្តាច់ខ្លួនចេញពីអតីតសហភាពសូវៀត។ លោកជាប្រធានក្រុមប្រឹក្សាជាន់ខ្ពស់របស់សាធារណរដ្ឋបេឡារុស ពីឆ្នាំ១៩៩១ ដល់ឆ្នាំ១៩៩៤ ដែលអំណាចនេះ គ្រប់ដណ្តប់លើស្ថាប័ននីតិបញ្ញត្តផងដែរ។ សម្រាប់ពានរង្វាន់ Gusi Peace Prize ជាប់ជ័យលាភីបុរសរដ្ឋ រួមទាំងស្នាដៃផ្នែករូបវិទ្យា និងគណិតវិទ្យា។
ពានរង្វាន់ Gusi Peace Prize ត្រូវបានបង្កើតឡើងដោយលោក Barry Gusi ក្នុងគោលបំណងឧទ្ទិសដល់ឪពុករបស់លោក គឺ លោក Gemeniano Javier Gusi អតីតយុទ្ធជននាសម័យសង្គ្រាមលោកលើកទីពីរ ដែលបានតស៊ូរប្រយុទ្ធប្រឆាំងជប៉ុន ហើយក្រោយមកបានក្លាយជាអ្នកនយោបាយ និងជាសកម្មជនសិទ្ធិមនុស្ស។
ចាប់ពីឆ្នាំ២០០២មក ពានរង្វាន់ដែលចែកចេញជាច្រើនផ្នែកនេះ ត្រូវបានប្រគល់ជនដល់ឥស្សរជន និងស្ថាប័ន ដែលធ្វើការងារលើការពង្រឹងសន្តិភាព និងការពង្រីកសកម្មភាពផ្សេងៗ ។ មេដឹកនាំ និងអតីតមេដឹកនាំប្រទេសជិត២០នាក់ហើយ ដែលធ្លាប់ទទួលពានរង្វាន់នេះ ។
នារយៈពេល១៣ឆ្នាំកន្លងមកនេះ លោក ហ៊ុន ម៉ានី គឺជាឥស្សរជនទីមួយរបស់កម្ពុជា ដែលបានឈ្នះពានរង្វាន់នេះ។ សម្រាប់ឆ្នាំ២០១៥នេះ លោក ហ៊ុន ម៉ានី ដែលជាតំណាងរាស្ត្រគណបក្សប្រជាជនកម្ពុជាផងដែរនោះ ស្ថិតក្នុងចំណោមឥស្សរជនចំនួន១៨នាក់លើពិភពលោកដែលឈ្នះពាន Gusi Peace Prize។ លោក ហ៊ុន ម៉ានី ឈ្នះលើផ្នែក Youth leadership and Humanitarianism and Advocate of Cultural Heritage ហើយលោកក៏ជាជ័យលាភីដែលក្មេងជាងគេផងដែរ។
ជ័យលាភី១៩នាក់នេះ មានមកពីកម្ពុជា អូទ្រីស អូស្ត្រាលី បង់ក្លាដែស បេឡារុស ចិន ចចជា ឆេក អាល្លឺម៉ង់ ជប៉ុន កាហ្សាក់ស្ថាន គៀកហ្ស៊ីសស្ថាន ហូឡង់ ហ្វីលីពីន ព័រទុយហ្គាល់ កាតា រុស្ស៊ី អ៊ុយក្រែន និងសហរដ្ឋអាមេរិក៕
Tag:
Gusi Peace Prize
ហ៊ុន ម៉ានី
© រក្សាសិទ្ធិដោយ thmeythmey.com