អន្តរជាតិ
នយោបាយអន្តរជាតិ
ថៃបង្អួតយន្តហោះចម្បាំង មុនថ្ងៃសមយុទ្ធដែនអាកាសជាមួយចិនលើកដំបូង
× រដ្ឋាភិបាលក្រុងបាងកក បានសាកល្បងហោះហើរយន្តហោះចម្បាំងរបស់ខ្លួនជាមួយនឹងយន្តហោះរបស់ ក្រុងប៉េកាំងដើម្បីជាការសា្វគមន៍មុនថ្ងៃសមយុទ្ធយោធាដែនអាកាសជាលើកដំបូងជាមួយនឹងចិនដែល នឹងត្រូវធ្វើឡើងក្នុងប្រទេសថៃ។ រដ្ឋាភិបាលក្រុងបាងកក ថាសមយុទ្ធយោធាជាមួយក្រុងប៉េកាំង គឺមិន មែនសំដៅថាថៃ កំពុងតែដកខ្លួនពីអាមេរិក ហើយ ងាកទៅរកចិនទាំងស្រុងនោះទេ។
ម្សិលមិញនេះ ថៃ និង ចិន បានសាកល្បងហោះហើរយន្តហោះយោធាដែលមានម្ខាងប្រាំគ្រឿង នៅមូលដ្ឋានទ័ពអាកាសថៃ Korat ដែលស្ថិតនៅភាគខាងជើងក្រុងបាងកក ដើម្បីបង្ហាញប្រព័ន្ធផ្សព្វផ្សាយ និង ស្វាគមន៍វត្តមានទ័ពអាកាសចិនមុនថ្ងៃសមយុទ្ធទ័ពអាកាសលើកដំបូងរវាងភាគីទាំងពីរ។
តាមការគ្រោងទុកនៅថ្ងៃទី ២៦-២៧ វិច្ឆិកានេះ ថៃ និង ចិន នឹងបើកលំហាត់យោធាដែន អាកាសរួមគ្នាមួយជាលើកដំបូង ដែលស្របនឹងឱកាសនៃខួបរម្លឹកលើកទី៤០នៃការចងសម្ព័ន្ធមិត្តប្រទេសទាំងពីរ។ សមយុទ្ធយោធានេះ ត្រូវបានចិនចាត់ទុកថា ជាការបង្កើនទំនុកចិត្ត និងចំណងមិត្តភាពរួមគ្នាឲ្យកាន់តែជិតស្និទរវាងចិននិងថៃ។
រយៈពេលចុងក្រោយនេះ គេសង្កេតឃើញថាសក្តានុពលផ្នែកយោធាថៃ បានមានលេចធ្លោគួរកត់សម្គាល់បើប្រៀបធៀបទៅក្នុងប្រទេសមួយចំនួននៅតំបន់។ ក្នុងនោះ គេឃើញ ក្រៅពីការវិវត្តយោធា ដែនអាកាស ថៃ ក៏បានទើបបង្ហាញពីសព្វាវុធដែលខ្លួនទើបបង្កើតនៅក្នុងស្រុក ដែលរាប់បញ្ចូលទាំង រថក្រោះផងដែរ។ សក្តានុពលនេះ បានធ្វើឲ្យថៃ ក្លាយជាទិសដៅយុទ្ធសាស្ត្រមួយដ៏សំខាន់សម្រាប់ ចិន ដែលជាមហាអំណាចមួយដែលកំពុងតែពង្រីកឥទ្ធិពលខ្លួននៅក្នុងតំបន់។
សូមបញ្ជាក់ផងដែរថា ក្រោយពីរដ្ឋប្រហារយោធាថ្ងៃទី២២ខែឧសភា ដែលដឹកនាំដោយលោកឧត្តមសេនីយ៍ប្រាយុទ្ធ ចាន់អូចា គោលនយោបាយការបរទេសថៃ ហាក់ដូចជាបែរទៅរកចិន ខណៈផ្តាច់ខ្លួន ពីរដ្ឋាភិបាលអាមេរិក។ នោះ ក៏ព្រោះតែ ក្រោយពីរដ្ឋប្រហារយោធា អាមេរិក បានរិះគន់រដ្ឋាភិបាលរបបសឹកយ៉ាងខ្លាំង ដ្បិតបានបំពានទៅនឹងសិទ្ធិមនុស្ស និងជាពិសេសនោះ គោលការណ៍លទ្ធិប្រជាធិបតេយ្យ។
ថ្មីៗនេះ ថៃ និងចិន បានសម្រេចកិច្ចព្រមព្រៀងជាមួយគ្នាជាច្រើនគួរកត់សម្គាល់។ ក្នុងនោះ ថៃ បានផ្តល់សិទ្ធិឲ្យក្រុមហ៊ុនចិនចូលវិនិយោគផ្លូវរថភ្លើងជាច្រើនកន្លែង និង កាន់តែពិសេសនោះ រដ្ឋាភិបាលថៃបានបង្ហាញគម្រោងក្នុងទិញនាវាមុជទឹកពីចិនក្នុងតម្លៃរាប់លានដុល្លាទៀតផង។
យ៉ាងណាក៏ដោយ ក្រោមការរិះគន់និន្នាការនយោបាយទៅចិន អ្នកនាំពាក្យរដ្ឋាភិបាលថៃ លោក ឧត្តម សេនីយ៍ Werachon Sukhondhapatipak បានអះអាងថា គោលនយោបាយការបរទេសថៃ គឺល្អជាមួយ នឹងគ្រប់ប្រទេស ដែលរាប់បញ្ចូលទាំងអាមេរិកផងដែរ។ លោក បន្ថែមទៀតថា ថៃ មិនមែនកំពុងតែ ប្រើប្រាស់ចិនដើម្បីប្រឆាំងនឹងអាមេរិកនោះទេ ហើយ ថៃ ក៏នឹងបន្តកិច្ចសហការណ៍យោធាជាមួយនឹង អាមេរិកផងដែរ។ ក្រោយរដ្ឋប្រហារយោធា ថៃ និងអាមេរិក បានផ្អាកការធ្វើសមយុទ្ធយោធាជាមួយគ្នា មួយរយៈពេល៕
© រក្សាសិទ្ធិដោយ thmeythmey.com