អន្តរជាតិ
×![]()
ប៉ូលិសអ៊ីតាលីបានចាប់ឃាត់កាំភ្លើងចំនួន៧៨១ដើមពីរថយន្តមួយគ្រឿងដែលដឹកចេញពីតួកគីក្នុងទិសដៅទៅកាន់ប៊ែលហ្សិកនៅឯកំពង់ផែ Trieste ភាគឦសានប្រទេស។ នេះបើយោងតាមសេចក្ដីថ្លែងការណ៏មួយដែលចេញដោយអាជ្ញាធរអ៊ីតាលីកាលពីថ្ងៃព្រហស្បតិ៍ម្សិលមិញ។
អាជ្ញាធរអ៊ីតាលីបានចាប់កាំភ្លើងប្រភេទ Winchester SXP ចំនួន៧៨១ដើម ដែលដឹកទៅកាន់ប៊ែលហ្សិក។ ប៉ូលិសហិរញ្ញវត្ថុអ៊ីតាលី ដែលទទួលខុសត្រូវត្រួតពិនិត្យនៅឯកំពង់ផែ Trieste បានបញ្ជាក់ថា កាំភ្លើងទាំងនោះមានពន្ធត្រឹមត្រូវ ប៉ុន្តែអ្នកបើកបរជនជាតិតួកគីនោះមិនមានលិខិតអនុញ្ញាតក្នុងការដឹកជញ្ជូនកាំភ្លើងទាំងនោះទេ។
បើយោងតាមប៉ូលិសអ៊ីតាលី កាំភ្លើងប្រភេទ Winchester SXP គឺជាកាំភ្លើងសម្រាប់ការបរបាញ់តែប៉ុណ្ណោះ និងមិនត្រូវបានចាត់ទុកជាអាវុធសម្រាប់ប្រយុទ្ធនោះទេ។ ប៉ុន្តែការចាប់ឃាត់នេះ ជាការពង្រឹងនូវសន្តិសុខតាមព្រំដែន ក្រោយការវាយប្រហារនៅទីក្រុងប៉ារីកាលពីថ្ងៃទី១៣កន្លងមក ក៏ដូចជាស្ថានភាពនៅឯប៊ែលហ្សិកផងដែរ។
ម្យ៉ាងទៀតបើយោងតាមវ៉េបសាយរបស់ក្រុមហ៊ុនផលិត កាំភ្លើងប្រភេទ Winchester SXP អាចបាញ់បាន៣គ្រាប់ក្នុងរយៈពេលតែកន្លះវិនាទីតែប៉ុណ្ណោះ។
គួរបញ្ជាក់ដែរថា កាលពីការវាយប្រហារភេរវកម្មនៅទីក្រុងប៉ារីស ខ្មាន់កាំភ្លើងបានប្រើប្រាស់កាំភ្លើងប្រភេទ Kalashnikov 47 ដែលជាទូទៅត្រូវបានគេស្គាល់ថា AK-47s ក្នុងការវាយប្រហារដែលបានសម្លាប់មនុស្សប្រមាណ១២៩នាក់។ ចាប់ពីពេលនោះមក ប្រទេសជាច្រើនបានចាប់ផ្ដើមរឹតបន្តឹងសន្តិសុខនៅក្នុងប្រទេសក៏ដូចជានៅតាមបន្ទាត់ព្រំដែនផងដែរ។
Tag:
អ៊ីតាលី
ប៊ែលហ្សិក
© រក្សាសិទ្ធិដោយ thmeythmey.com
