អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
ប្រធានាធិបតីចិនលោក ស៊ី ជីនពីង បានប្រកាសកំណែទម្រង់រចនាសម្ព័ន្ធថ្មីមួយរបស់កង ទ័ពរំដោះប្រជាជនចិន ជាពិសេសរចនាសម្ព័ន្ធបញ្ជាកងទ័ពនិងការរៀបចំឡើងវិញនូវ យោធាថ្នាក់ភូមិភាគទាំង៧នៅត្រឹមឆ្នាំ២០២០។ លោក ស៊ី និយាយដូច្នេះក្នុងសន្និសីទបីថ្ងៃស្ដីពីការកែទម្រង់កងទ័ព ដែលរៀបចំដោយគណៈកម្មាការយោធាមជ្ឈិមដ៏មាន អំណាចរបស់ចិន។
ប្រធានាធិបតីចិន លោក ស៊ី ជីនពីង បានប្រកាសកែទម្រង់កងទ័ពចិនដែលមិនធ្លាប់មានពី មុនមកក្នុងប្រវត្តិសាស្ត្ររបស់បក្សកុំមុយនីសចិន។ រចនាសម្ព័ន្ធកងទ័ពគ្រប់ប្រភេទនិងបញ្ជា ការភូមិភាគទាំង៧ គឺសុទ្ធតែស្ថិតក្នុងបញ្ជីនៃការកែទម្រង់ទាំងអស់។ ចំណែកឯ គណៈ កម្មាការយោធាមជ្ឈិមដ៏មានឥទ្ធិពល ដែលលោក ស៊ី ជីនពីង ជាប្រធានផងនោះក៏ជា គោលដៅនៃការកែទម្រង់ដែរ។
កំណែទម្រង់នេះមានគោលបំណងដើម្បីប្រមូលផ្ដុំអំណាចបញ្ជាលើកងទ័ពគ្រប់ប្រភេទទៅឲ្យគណៈកម្មាយោធាមជ្ឈិម ដែលងាយស្រួលក្នុងការបញ្ជារួម។ នាពេលកន្លងមក កងទ័ពចិនស្ទើរតែគ្រប់ផ្នែក ជាពិសេសកងទ័ពថ្នាក់ភូមិភាគទាំង៧ ហាក់មានឯករាជ្យភាពនិងអំណាចបញ្ជាច្រើន ដោយសារតែពួកគេមានទីបញ្ជាការដាច់ពីគ្នានិងមិនសូវទទួលបញ្ជាពីអំណាចកណ្ដាលនោះទេ។
បើយោងតាមប្រសាសន៏របស់លោក ស៊ី ជីនពីង ទីបញ្ជាការភូមិភាគចំនួន៧នឹងត្រូវកែ សម្រួលឡើងវិញ ហើយបញ្ជាការរួមសម្រាប់បញ្ជាថ្មីមួយនឹងត្រូវបង្កើតដើម្បីត្រួតពិនិត្យភូមិ ភាគថ្មីដែលបានកែសម្រួលហើយទាំងអស់។ លោក ស៊ី បន្តថា ភូមិភាគថ្មីទាំងនោះនឹងទទួលបន្ទុកលើផ្នែកប្រតិបត្តិការយោធា ចំណែកទីស្នាក់ការបញ្ជារួមថ្មីនឹងទទួលខុសត្រូវ លើការគ្រប់គ្រងនិងការហ្វឹកហ្វឺនកងទ័ព។ លោកបន្ថែមទៀតថា កងទ័ពរំដោះប្រជាជនចិន ក៏នឹងបង្កើតទីបញ្ជាការមួយផងដែរ។
ថ្លែងក្នុងពិធីនោះដែរ លោក ស៊ី ក៏បានបញ្ជាក់សាជាថ្មីពីការសន្យារបស់លោកក្នុងការកាត់ បន្ថយទាហាននាពេលកន្លងមក។ សូមបញ្ជាក់ថា កាលពីថ្ងៃទី៣ ខែកញ្ញានាឱកាសពិធីរម្លឹកខួបទី៧០ ថ្ងៃបញ្ចប់សង្គ្រាមលោកលើកទី២ លោក ស៊ី ជីនពីងបាននិយាយថា ចិននឹងកាត់បន្ថយចំនួនទាហានរហូត៣០០០០០នាក់។ ហើយ ភាគច្រើននៃមន្ត្រីការិយាល័យនិងកងកម្លាំងដែលមិនមានលក្ខណៈប្រយុទ្ធ គឺជាគោលដៅនៃការកាត់បន្ថយនេះ។
ជាមួយគ្នានេះដែរ លោក ស៊ី ជីនពីង ក៏បានប្រកាសបង្កើតគណៈកម្មាការត្រួតពិនិត្យវិន័យ ថ្មីមួយសម្រាប់ជួរកងទ័ពរំដោះប្រជាជនចិន។ គណៈកម្មការនេះនឹងមានអំណាចក៏ដូចជាឯករាជ្យកាន់តែច្រើនក្នុងការពិនិត្យមើលការអនុវត្តវិន័យរបស់កងទ័ព ហើយស្ថិតនៅក្រោមការគ្រប់គ្រងផ្ទាល់របស់គណៈកម្មាការយោធាមជ្ឈិម៕
© រក្សាសិទ្ធិដោយ thmeythmey.com
