អន្តរជាតិ
×![]()
ដោយ: VOA
VOANews៖ ដោយមានសីតុណ្ហភាពកំពុងកើនឡើង៤ដងលឿនជាងទីកន្លែងផ្សេងទៀតនៅក្នុងទ្វីបអាស៊ី ពួកអ្នកវិទ្យាសាស្ត្រចិន និយាយថា តំបន់ខ្ពង់រាប អាចបាតបង់ផ្ទាំងទឹកកក និងស្រទាប់ដីក្រោមទឹកកកនៅពេលឆាប់ៗនេះ ដោយការប៉ះពាល់ការផ្គត់ផ្គង់ទឹកនៅទូទាំងតំបន់អាស៊ី។
តំបន់ខ្ពង់រាបទីបេដែលគេស្គាល់ថា ដំបូលរបស់ពិភពលោក មានទំហំប៉ុនតំបន់អឺរ៉ុបភាគខាងលិចហើយធ្វើការផ្គត់ផ្គង់ទឹកដល់មនុស្សជិត២ពាន់លាននាក់នៅក្នុងទ្វីបអាស៊ីដែលជាប្រភពទឹករបស់ទន្លេសំខាន់ៗជាច្រើនរួមមាន ទន្លេ Yangze ទន្លេមេគង្គ ទន្លេ Salween ទន្លេ Indus ទន្លេ Brahmaputra ហើយនិងទន្លេលឿង។
ក៏ប៉ុន្តែ ពីព្រោះតែផលប៉ះពាល់នៃការផ្លាស់ប្តូរអាកាសធាតុ ផ្ទាំងទឹកកក កំពុងរលាយយ៉ាងឆាប់រហ័ស វាលស្មៅ កំពុងរួមតូចនៅពេលដែលវាលរហោឋានរីកកាន់តែធំឡើង ទឹកភ្លៀងក្នុងតំបន់ មានភាពមិនប្រក្រតី កម្រិតទឹកកំពុងធ្លាក់ចុះនៅក្នុងទន្លេសំខាន់ៗហើយស្រទាប់ដីក្រោមទឹកកកកំពុងរលាយ។
យោងតាមការសិក្សា ការរលាយផ្ទាំងទឹកកកនៅទីបេ ដែលជាប្រភពទឹកសាបដ៏ធំបំផុតនៅខាងក្រៅតំបន់ប៉ូល មានជាប់ទាក់ទិនទៅនឹងផលវិបាកជាច្រើនទាំងនៅក្នុងមូលដ្ឋាន និងនៅក្នុងសាកលលោក រួមមានរលកក្តៅនៅតំបន់អឺរ៉ុប។
ក្រុមមន្ត្រីចិន ប៉ាន់ស្មានថា ទីបេ បានផ្ទុកផ្ទាំងទឹកកប្រហែល១៤,៥ ភាគរយរបស់ពិភពលោក ខណៈដែលមានទ្រឹស្តីបន្តិចបន្តួចខុសគ្នាពីអ្វីដែលបណ្តាលឲ្យមានការរលាយផ្ទាំងទឹកកកនោះ។
ទីភ្នាក់ងារព័ត៌មាន Xinhua ផ្លូវការនៃប្រទេសចិនបានរាយការណ៍កាលពីខែមេសាថា ផ្ទាំងទឹកកកជាមធ្យមចំនួន២៤៧គីឡូម៉ែត្រការ៉េ កំពុងរលាយជារៀងរាល់ឆ្នាំហើយចាប់តាំងពីទសវត្សរ៍១៩៥០មក ផ្ទាំងទឹកកកប្រហែល៧ពាន់៦រយ គ.មការ៉េ ឬប្រហែល១៨ភាគរយនៃផ្ទាំងទឹកកកទាំងអស់ បានរលាយ៕
© រក្សាសិទ្ធិដោយ thmeythmey.com
