អន្តរជាតិ
×![]()
ប្រធានាធិបតីរុស្ស៊ី លោក វ្ល៉ាឌីមៀ ពូទីន ម្សិលមិញនេះបានសម្រេចចុះហត្ថលេខាលើក្រឹត្យមួយដើម្បីដាក់ទណ្ឌកម្មសេដ្ឋកិច្ចលើតួកគីដើម្បីសងសឹករឿងបាញ់ទម្លាក់យន្តហោះកន្លងមក។ វិធានការសេដ្ឋកិច្ចពិសេសរបស់វិមានក្រេមឡាំងរួមមាន ហាមឃាត់ទំនិញមួយចំនួនពីតួកគីជាបណ្តោះអាសន្ន រឹតបន្តឹងជើងហោះហើរទៅតួកគី រឹតបន្តឹងសកម្មភាពអង្គការតួកគីនៅរុស្ស៊ី និងវិធានការមួយចំនួនទៀត។
វិមានក្រេមឡាំងបានប្រកាសម្សិលមិញនេះថា ប្រមុខរដ្ឋរុស្ស៊ីលោក វ្ល៉ាឌីមៀ ពូទីន បានសម្រេចចិត្តចុះហត្ថលេខាលើក្រឹត្យមួយដែលមានគោលដៅដាក់ទណ្ឌកម្មសេដ្ឋកិច្ចសងសឹកប្រទេសតួកគី ព្រោះប្រទេសនេះបាញ់យន្តហោះចម្បាំងរុស្ស៊ីទម្លាក់កាលពីដើមសប្តាហ៍។
ការចុះហត្ថលេខាលើក្រឹត្យនេះ កើតឡើងប៉ុន្មានម៉ោងប៉ុណ្ណោះ ក្រោយប្រធានាធិបតីតួកគីលោក រ៉េសិបតាយិប អឺដរហ្កាន (Recep Tayyip Erdogan) បង្ហាញការសោកស្តាយចំពោះរឿងរ៉ាវដែលកើតឡើងកន្លងមកដែលនាំឲ្យល្អក់ករកចំណងមិត្តភាពរវាងតួកគីនិងរុស្ស៊ីនេះ។លោកថ្លែងថា៖ «យើងគ្រាន់តែប្រាថា្នថារឿងបែបនេះមិនបានកើតឡើងប៉ុណ្ណោះ»។ ទោះជាយ៉ាងណាក៏ដោយខាងរុស្ស៊ីមិនបានបន្ទន់ជំហរអ្វីឡើយ។
ត្រលប់មកវិញ ក្រឹត្យរបស់ប្រធានាធិបតីរុស្ស៊ីដែលនឹងចូលជាធរមាននៅថ្ងៃ១ ខែមករានោះ មានគោលដៅធំៗដូចជា ហាមឃាត់រាល់ទំនិញមួយចំនួនដែលផលិតនៅតួកគី,ហាមឃាត់ការហោះហើរទៅកម្សាន្តនៅតួកគី រួមទាំងសកម្មភាពអង្គការដែលធ្វើសកម្មភាពនៅរុស្ស៊ី, ហាមមិនឲ្យអនុញ្ញាតឲ្យជនជាតិតួកគីឲ្យធ្វើការ, និងវិធានការមួយចំនួនទៀតផង។
ចំពោះការហាមឃាត់គេទំនិញដែលនាំមកពីតួកគីនេះ គេឃើញការិយាល័យប្រធានាធិបតីបានស្នើឲ្យស្ថាប័នពាក់ព័ន្ធស្រង់ឈ្មោះទំនិញដែលមិនស្ថិតក្រោមទណ្ឌកម្ម។ ដូច្នេះ គេអាចនឹងច្បាស់ថា តើទំនិញអ្វីខ្លះដែលស្ថិតក្រោមបញ្ជីខ្មៅរបស់រុស្ស៊ីនៅពេលឆាប់ៗ។
យោងតាមក្រឹត្យនេះ ក្រុមហ៊ុននានារបស់រុស្ស៊ីត្រូវចៀសវាងជ្រើសរើសប្រជាជនតួកគីឲ្យបម្រើការងារ ហើយរាល់ស្ថានប័នតួកគីដែលកំពុងដំណើរការនៅប្រទេសរុស្ស៊ីនឹងស្ថិតក្រោមការរឹតបន្តឹងសកម្មភាពរបស់អាជ្ញាធររុស្ស៊ីថែមទៀត។
ក្រឹត្យដដែលនេះក៏ស្នើឲក្រុមហ៊ុនទេសចរណ៍បញ្ចៀសការផ្សព្វផ្សាយនានាពីដំណើរកម្សាន្តទៅកាន់ទឹកដីតួកគីទៅដល់ប្រជាជនរុស្ស៊ី។ ហើយរាល់ជើងហោះហើររបស់តួកគីត្រូវស្ថិតក្រោមការត្រួតពិនិត្យកម្រិតខ្ពស់ដើម្បីធានាសុវត្ថិភាពនិងសន្តិសុខ។ ចុងក្រោយគឺ រុស្ស៊ីសម្រេចតម្រូវឲ្យប្រជាជនតួកគីស្នើសុំទិដ្ឋាការ បើសិនជាពួកគេចង់មកទស្សនាប្រទេសរុស្ស៊ី។
ទំនាក់ទំនងរវាងប្រទេសទាំងពីរតួកគីនិងរុស្ស៊ីចាប់ផ្តើមប្រេះឆាកាន់តែខ្លាំង ហើយវិធានការសេដ្ឋកិច្ចរបស់រុស្ស៊ីដាក់ចេញដើម្បីសងសឹកតួកគីនេះនឹងកាន់តែធ្វើឲ្យស្ថានភាពកាន់តែអាក្រក់។ ប៉ុន្តែទោះអាក្រក់យ៉ាងម៉េចក៏ដោយ សង្គ្រាមប្រើអាវុធមិនអាចកើតឡើងឡើយ។ រឿងសំខាន់រុស្ស៊ីប្រហែលចង់បានការសុំទោសជាផ្លូវការពីរដ្ឋាភិបាលក្រុងអង់ការ៉ា ជុំវិញការបាញ់យន្តហោះរុស្ស៊ីធ្លាក់និងបណ្តាលឲ្យអ្នកបើកម្នាក់ស្លាប់ផងនោះ៕
Tag:
រុស្ស៊ី
© រក្សាសិទ្ធិដោយ thmeythmey.com
