អន្តរជាតិ
×![]()
ក្រោយឃើញថា មានករណីគ្រុនផ្តាសាយបក្សី H5N1 នៅខែត្រDordogne ភាគខាងត្បូងប្រទេសបារាំង កាលពីសប្តាហ៍មុនមក កូរ៉េខាងត្បូងបានហាមឃាត់មិនអោយនាំចូលសត្វស្លាបបារាំង ក្នុងស្រុក។
គិតពីខែមករាដល់ខែតុលា កូរ៉េខាងត្បូងបានដឹកសាច់ទា ថ្លើមក្ងាន មាន់ទា រាប់តោនពីបារាំង ចូលស្រុក។ ក្រសួងកសិកម្មកូរ៉េខាងត្បូងបានសម្រេចហាមឃាត់ការនាំចូលសត្វស្លាបពីបារាំង ក្រោយបានទទួលដំណឹងថា នៅDordogne ភាគខាងត្បូងប្រទេសបារាំង មាន់របស់ប្រជាជនមួយគ្រួសារ មានមេរោគគ្រុនផ្តាសាយបក្សីH5N1។
អាជ្ញាធរបារាំងសន្និដ្ឋានថា សត្វទាព្រៃប្រហែលជាបានចម្លងមេរោគនេះទៅមាន់របស់គ្រួសារមួយនេះ។ កាលពីថ្ងៃសុក្រ សេវាពេទ្យសត្វនៅDordogneបានទទួលដំណឹងថា មានសត្វស្លាបពី២២ទៅ៣០ក្បាលដែលបានស្លាប់នៅទីនោះ។ សត្វស្លាបដែលរួចជីវិតពីមេរោគគ្រុនផ្តាសាយបក្សី H5N1 ត្រូវបានគេចាក់ថ្នាំសម្លាប់។ មិនត្រឹមតែសត្វស្លាបបារាំងដែលនៅរស់ទេដែលហាមមិនអោយនាំចូលស្រុកកូរ៉េខាងត្បូង សូម្បីតែស៊ុត ក៏ក្រុងសេអ៊ូលហាមនាំចូលដែរ។ ដោយឡែក គេអាចនាំចូលផលិតផលដែលកែច្នៃរួច រឺក៏ផលិតផលធ្វើពីសាច់ឆ្អិនស្រាប់។
យោងតាមអង្គការសុខភាពពិភពលោក គិតតាំងពីមេរោគគ្រុនផ្តាសាយបក្សីH5N1 លេចវត្តមានជាថ្មី នៅអាស៊ីអាគ្នេយ៍ចុងឆ្នាំ២០០៣មក មេរោគនេះបានសម្លាប់មនុស្ស៤៤៩នាក់ នៅតាមប្រទេសដូចជាអេហ្ស៊ីប វៀតណាម និងឥណ្ឌូណេស៊ី៕
Tag:
កូរ៉េខាងត្បូង
© រក្សាសិទ្ធិដោយ thmeythmey.com
