អន្តរជាតិ
នយោបាយអន្តរជាតិ
ទ័ពអាកាសរុស្ស៊ីទម្លាក់គ្រាប់ចំផ្សារសម្លាប់មនុស្ស៤៤នាក់នៅស៊ីរី
× ម្សិលមិញនេះកងកម្លាំងជើងអាកាសរុស្ស៊ីបានវាយប្រហារចំផ្សារមួយនៅក្រុង Ariha ដែលមានមនុស្សកកកុញ រហូតសម្លាប់មនុស្សយ៉ាងតិច ៤៤នាក់។ ទីក្រុងខាងលើត្រូវបានកាន់កាប់ដោយកងកម្លាំងឧទ្ទាម និង ក្រុមរណសិរ្ស Nusra ផងដែរ។ នេះបើយោងតាមសារព័ត៌មាន Al Jazeera ។
មនុស្សយ៉ាងហោចណាស់ ៤៤នាក់បានស្លាប់ដោយសារការវាយប្រហារតាមផ្លូវអាកាសរបស់រុស្ស៊ីម្សិលមិញនេះនៅផ្សារមួយកន្លែងស្ថិតក្នុងក្រុង Ariha ។ ក្រុមសកម្មជនសិទ្ធិមនុស្សនៅស៊ីរីបានអះអាងថា កងទ័ពរុស្ស៊ីបានវាយប្រហារលើទីតាំងនេះ ព្រោះវាស្ថិតក្រោមការកាន់កាប់របស់សម្ព័ន្ធក្រុមទាហាននៃជ័យជម្នះ រួមជាមួយក្រុមរណសិរ្ស Nusra ផងដែរ។
ស្ថាប័នឃ្លាំមើលសិទ្ធិមនុស្សនៅស៊ីរីបានអះអាងថា ក្រៅពីផ្សារដែលមានមនុស្សកកកុញ កងកម្លាំងរុស្ស៊ីក៏បានវាយប្រហារទៅលើគោលដៅផ្សេងទៀតមួយចំនួនផងដែរនៅក្នុងខេត្តខាងលើ។ ហើយអ្វីដែលសំខាន់ ទិន្នន័យអ្នកស្លាប់ត្រូវបានគេផ្តល់ឲ្យផ្សេងៗគ្នា ដោយខ្លះអះអាងថាអ្នកស្លាប់តិចបំផុតក៏ ៦០នាក់ដែរ។
សារព័ត៌មានក្នុងតំបន់បានចោទ រុស្ស៊ី ថាបានប្រើប្រាស់គ្រាប់បែកចង្កោមក្នុងយុទ្ធនាការវាយប្រហារលើទីតាំងខាងលើថែមទៀត។ ប៉ុន្តែគេមិនអាចសុំការបំភ្លឺពីខាងមន្ត្រីក្រសួងការពាររុស្ស៊ីឡើយជុំវិញការវាយប្រហារដែលសម្លាប់ជនស៊ីវិលច្រើននាក់នេះ។ គេកំពុងរង់ចាំការបកស្រាយពីមន្ត្រីយោធារុស្ស៊ីជុំវិញករណីទម្លាក់គ្រាប់បែកលើទីប្រជុំជននេះផងដែរ។
តាមពិតទៅក្រុមសម្ព័ន្ធទាហាននៃជ័យជម្នះបានដណ្តើមកាន់កាប់ទីក្រុង Ariha កាលពីខែឧសភាកន្លងទៅក្រោយវាយប្រយុទ្ធជាមួយទាហានលោក អាសាដ យ៉ាងខ្លាំងក្លានិងក្រោយមកបានជោគជ័យលើទាហានទាំងនោះ។ ជុំវិញការវាយប្រហាររបស់រុស្ស៊ីនេះដែរ គេឆ្ងល់ថា ហេតុអ្វីរុស្ស៊ីបន្តវាយប្រហារលើតំបន់ខាងលើឥតឈប់ ព្រោះតំបន់ខាងលើមិនស្ថិតក្រោមការកាន់កាប់របស់ក្រុមភេរវជនរដ្ឋឥស្លាមនោះឡើយ។
រុស្ស៊ីបានចាប់ផ្តើមយុទ្ធនាការយោធាដោយវាយប្រហារក្រុមភេរវជនរដ្ឋឥស្លាមកាលពីចុងខែកញ្ញាដើម្បីជួយគាំទ្រទាហានរបស់រដ្ឋាភិបាលស៊ីរី។ ប៉ុន្តែលោកខាងលិចបានរិះគន់រុស្ស៊ីថា ប្រើប្រាស់លេសវាយប្រហារលើក្រុមភេរវជនដើម្បីកម្ចាត់ក្រុមឧទ្ទាមដែលប្រឆាំងរដ្ឋាភិបាលលោក បាសា អាល់អាសាដ។
© រក្សាសិទ្ធិដោយ thmeythmey.com