អន្តរជាតិ
នយោបាយអន្តរជាតិ
អ្នកនយោបាយអាមេរិកស្នើបញ្ជូនទ័ព២ម៉ឺននាក់ទៅស៊ីរីនិងអ៊ីរ៉ាក់ដើម្បីច្បាំងកម្ចាត់ក្រុម ISIS
×![]()
សមាជិកព្រឹទ្ធសភាអាមេរិកពីររូបបានស្នើសុំឲ្យមានការបញ្ជូនទ័ពថ្មើជើង២ម៉ឺននាក់ទៅកាន់ប្រទេសស៊ីរី និងអ៊ីរ៉ាក់ដើម្បីពង្រឹងយុទ្ធសាស្ត្រកម្ចាត់ក្រុមភេរវជនរដ្ឋឥស្លាម។ អ្នកនយោបាយទាំងពីរក៏បានរិះគន់យុទ្ធសាស្ត្រយោធារបស់រដ្ឋបាលលោក បារ៉ាក់ អូបាម៉ា ខ្លាំងៗផងដែរ ព្រោះយុទ្ធសាស្ត្រលោកមិនមានប្រសិទ្ធភាពសោះ។ 
លោក មុំ ពិទូរ្យ លម្អិតព័ត៌មាននេះ
លោក មុំ ពិទូរ្យ លម្អិតព័ត៌មាននេះ
ការផ្លាស់ប្តូរយុទ្ធសាស្ត្រកម្ចាត់ក្រុមភេរវជនរដ្ឋឥស្លាមនៅស៊ីរី និងអ៊ីរ៉ាក់ ឬក្រុម ដែស្ហ (Daesh) បានក្លាយជាប្រធានបទនៃការជជែកដេញដោលគ្នាខ្លាំងជាថ្មីនៅសហរដ្ឋអាមេរិក។ អ្នកនយោបាយអាមេរិកងាកមក រិះគន់យុទ្ធសាស្ត្ររបស់ប្រធានាធិបតី បារ៉ាក់ អូបាម៉ា ដែលស្ទាក់ស្ទើរក្នុងការប្រើប្រាស់ទ័ពអន្តរាគមន៍ក្នុងប្រទេសស៊ីរីនិងអ៊ីរ៉ាក់។
ម្សិលមិញនេះ សមាជិកព្រឹទ្ធសភាជើងចាស់ពីររូបមានដូចជាលោក John McCain និងលោក Lindsey Graham បានទទូចសុំឲ្យមានការបញ្ជូនកងទ័ពអាមេរិក ១ម៉ឺននាក់ទៅកាន់ប្រទេសអ៊ីរ៉ាក់ និង ១ម៉ឺននាក់ផ្សេងទៀតទៅកាន់ប្រទេសស៊ីរី ផងដែរ ។ អ្នកនយោបាយទាំងពីរនេះបានអះអាងថា ការបង្កើនចំនួនកងទ័ពអាមេរិកនឹងជួយបង្កើនប្រសិទ្ធភាពដល់យុទ្ធនាការកម្ចាត់ក្រុមភេរវជនរដ្ឋឥស្លាម។
ការឈានទៅស្នើសុំបង្កើនចំនួនវត្តមានកងទ័ពនៅមជ្ឈិមបូព៌ាដើម្បីកម្ចាត់ក្រុមភេរវជននេះកើតមានឡើង ក្រោយករណីវាយប្រហារនៅបារាំងដែលសម្លាប់រង្គាលមនុស្សរហូតដល់ ជាង១០០នាក់ ហើយអ្នកនយោបាយអាមេរិកបារម្ភថា សហរដ្ឋអាមេរិកនឹងក្លាយជាគោលដៅនៃការវាយប្រហារទៀត ប្រសិនបើយុទ្ធសាស្ត្រ លោក អូបាម៉ា កំពុងប្រើប្រាស់មិនមានការផ្លាស់ប្តូរទេនោះ។
លោក John McCain ប្រធានគណកម្មាធិការកងកម្លាំងប្រដាប់អាវុធនៃព្រឹទ្ធសភាបានអះអាងថា បើពឹងផ្អែកតែលើយុទ្ធនាការទម្លាក់គ្រាប់បែកពីលើអាកាស មិនអាចកម្ចាត់ក្រុមភេរវជនបានទេ។ ចំណែកលោក Lindsey Graham បានលើកឡើងថា វិធីតែមួយគត់ដើម្បីកម្ចាត់ក្រុមភេរវជនរដ្ឋឥស្លាមនេះ គឺការបង្កើនវត្តមានកងទ័ពអាមេរិកនៅផ្ទាល់ដីតែម្តង។ លោកសង្កត់ធ្ងន់ថា កងទ័ពថ្មើរជើងអាមេរិកនឹងមានលទ្ធភាពខ្ពស់ក្នុងការជួយគាំទ្រផ្នែកបច្ចេកទេសនិងយុទ្ធសាស្ត្រដល់បណ្តាកងទ័ពសម្ព័ន្ធមិត្តអឺរ៉ុប និងអារ៉ាប់ដើម្បីអន្តរាគមន៍បោសសម្អាតក្រុមរដ្ឋឥស្លាម។
អ្នកនយោបាយទាំងពីរនេះ ក៏បានលើកឡើងផងដែរ ពីសារសំខាន់នៃការទម្លាក់លោក អាសាដ ពីតំណែង ព្រោះវានឹងជួយឲ្យបណ្តារដ្ឋអារ៉ាប់ដែលប្រកាន់និកាយស៊ូនី ត្រលប់ចូលរួមគាំទ្រយុទ្ធសាស្ត្ររបស់ក្រុងវ៉ាស៊ីនតោនក្នុងការកម្ចាត់ក្រុមរដ្ឋឥស្លាមក្នុងទឹកដីស៊ីរី។
កន្លងមកលោក អូបាម៉ា បន្តបដិសេធបញ្ជូនកងទ័ពថ្មើរជើងទៅធ្វើសង្គ្រាមនៅស៊ីរី និងអ៊ីរ៉ាក់ ប៉ុន្តែកាលពីខែមុនលោកសម្រេចបញ្ជូនកងទ័ពពិសេស១០០នាក់ទៅកាន់ភាគខាងជើងប្រទេសស៊ីរីដើម្បីផ្តល់ប្រឹក្សា និងបង្វឹកកងកម្លាំងឧទ្ទាមដែលពួកគេនោះកំពុងច្បាំងកម្ចាត់ក្រុមរដ្ឋឥស្លាម។
ដោយឡែកការស្នើសុំឲ្យមានការពង្រាយទ័ព១ម៉ឺននាក់ទៅកាន់ប្រទេសអ៊ីរ៉ាក់ ត្រូវបានទទួលការស្វាគមន៍ពីរដ្ឋាភិបាលអ៊ីរ៉ាក់ផងដែរ។ យ៉ាងណាមិញរដ្ឋាភិបាលក្រុងបាដាដ មិនស្នើសុំកងទ័ពប្រយុទ្ធឡើយ តែស្នើសុំប្រឹក្សាទ័ពបន្ថែម និងការគាំទ្រផ្នែកយោធាដោយផ្តល់អាវុធបន្ថែមដល់កងទ័ពខ្លួនប៉ុណ្ណោះ។ បច្ចុប្បន្ននេះ អាមេរិកមានកងទ័ព ៣៥០០នាក់រួចហើយដែលកំពុងឈរជើងនៅក្នុងទឹកដីអ៊ីរ៉ាក់ និងជួយបង្វឹកកងទ័ពអ៊ីរ៉ាក់៕
Tag:
ក្រុមភេរវជនរដ្ឋឥស្លាម
ISIS
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
