អន្តរជាតិ
នយោបាយអន្តរជាតិ
លោកស្រី ស៊ូជី ជួបលោក ថេន សេន និងមេយោធានៅថ្ងៃពុធនេះ
×
លោកស្រី អ៊ុងសាន ស៊ូជី មេដឹកនាំបក្សប្រឆាំង នឹងជួបជាមួយលោក ថេន សេន ប្រធានាធិបតីផុតអណត្តិ និងមេកងទ័ពមីយ៉ាន់ម៉ា ដ៏មានឥទ្ធិពល លោក មិន អ៊ុងឡាំង នៅថ្ងៃពុធនេះ។ នេះបើតាមសារព័ត៌មានReuters។
សារព័ត៌មានេះបានស្រង់សម្តីរបស់មន្ត្រីរដ្ឋាភិបាលមីយ៉ាន់ម៉ា ហ្ស តេ (Zaw Htay) ថា ជំនួបជាលើកដំបូងនេះ ធ្វើឡើងក្រោមសំណើរបស់លោកស្រី ស៊ូជី ដែលបានស្នើពិភាក្សាពីការផ្ទេរតំណែងក្រោយពេលបានដឹងបក្សលោកស្រី ទទួលបានអាសនៈ ដើម្បីបង្កើតរដ្ឋាភិបាលថ្មីបាន។
បើតាមមន្ត្រីដដែល លោកស្រី ស៊ូជី នឹងជួបលោក ថេន សេន នៅនៅព្រឹកថ្ងៃពុធ នៅគេហដ្ឋានរបស់លោក ថេន សេន និងជួបជាមួយមេបញ្ជាការកងទ័ពលោក មិន អ៊ុងឡាំង នៅរសៀល នៅការិយាល័យរបស់ លោក មិន អ៊ុងឡាំងផ្ទាល់។
ប្រសិនបើជំនួបរវាងមេដឹកនាំទាំងបី នឹងប្រព្រឹត្តទៅតាមពេលកំណត់នេះមែន នោះសំណើរបស់ លោកស្រី ស៊ូជី ទៅកាន់ស្ថាប័នធំបីរបស់មីយ៉ាន់មា់ នឹងត្រូវបញ្ចប់ដោយជោគជ័យ។
សូមរម្លឹកដែរ ក្រោយដឹងថាបក្សសម្ព័ន្ធជាតិដើម្បីប្រជាធិបតេយ្យ ទទួលបានសំឡេងគាំទ្រ ភ្លូកទឹក ភ្លូកដីហើយនោះ លោកស្រីស៊ូជី បានផ្ញើលិខិតបីទៅកាន់ស្ថាប័នបីផ្សេងគ្នា ដើម្បីសុំការចរចា ពីការផ្ទេរអំណាច។ លិខិតទាំងនោះ បានផ្ញើទៅលោកប្រធានាធិបតី ថេន សេន លោកមេបញ្ជាការ មិន អ៊ុងឡាំង និងប្រធានារដ្ឋសភា លោក ស្វេ ម៉ាន់។ ថ្មីៗនេះ លោកស្រី ស៊ូជី បានជួបជាមួយនឹងលោកស្វេ ម៉ាន់ ហើយភាគី ក៏បានព្រមព្រៀងសហការការងារល្អជាមួយគ្នាផងដែរ។
ជុំវិញនៃជំនួបនេះដែរ ត្រូវបានគេរំពឹងថា នឹងប្រព្រឹត្តទៅដោយរលូន ដ្បិតកន្លងមក ទាំងលោកប្រធានា ធិបតីថេន សេន ទាំងលោក មិន អ៊ុងឡាំង បានសន្យាហើយថា នឹងផ្ទេរអំណាចទៅលោកស្រី ស៊ូជី ដោយសន្តិវិធី។ ហើយ ប្រសិនភាគីទាំងអស់ អាចអនុវត្តបានដូចទៅនឹងការសន្យារបស់ខ្លួនបានមែន នោះ គ្មានចម្ងល់អ្វីទៀតនោះទេសម្រាប់នយោបាយមីយ៉ាន់ម៉ា ពោលគឺលទ្ធិប្រជាធិបតេយ្យនឹង ដំណើរការទៅដោយរលូន។
សូមបញ្ជាក់ផងដែរថា ការបោះឆ្នោតមីយ៉ាន់ម៉ាថ្ងៃទី៨ ខែវិច្ឆិកា បានប្រព្រឹត្តទៅដោយរលូន។ ហើយលទ្ធផលជាបឋមបានបង្ហាញថា បក្សសម្ព័ន្ធជាតិដើម្បីប្រជាធិបតេយ្យរបស់ លោកស្រី អ៊ុងសាន ស៊ូជី អាចមានលទ្ធភាពដើម្បីបង្កើតរដ្ឋាភិបាលថ្មីមួយដោយខ្លួនឯងបាន។ តែអ្វីដែលគេកំពុងតែរង់ចាំចុងក្រោយនោះ គឺជាការចរចារវាងមេដឹកនាំពាក់ព័ន្ធកំពូល ក្នុងការផ្ទេរតំណែង ដ្បិតអាណត្តិរដ្ឋាភិបាលថ្មីនេះ គឺជាលើកដំបូងហើយដែលមីយ៉ាន់ម៉ា ត្រូវដឹកនាំដោយរដ្ឋាភិបាលស៊ីវិលពិតប្រាកដ៕
Tag:
មីយ៉ាន់ម៉ា
ថេនសេន
© រក្សាសិទ្ធិដោយ thmeythmey.com