លោកស្រី យីងឡាក់គ្មានឱកាសធ្វើជានាយករដ្ឋមន្ត្រីទៀតឡើយ

អន្តរជាតិ

លោកស្រី យីងឡាក់គ្មានឱកាសធ្វើជានាយករដ្ឋមន្ត្រីទៀតឡើយ

02, Dec 2015 , 8:39 pm

រូបភាព

ដោយ:

ប្រធានគណៈកម្មាធិការព្រាងរដ្ឋធម្មនុញ្ញថៃថ្មី អះអាងថា អតីតនាយករដ្ឋមន្ត្រីថៃលោកស្រី យីងឡាក់ ស៊ីនណាវ៉ាតត្រា អាចឈរឈ្មោះក្នុងការបោះឆ្នោតដើម្បីប្រជែងតំណែងនាយករដ្ឋមន្ត្រីបាន លុះត្រាតែការអនុវត្តនៃការផ្អាកតំណែងនយោបាយរយៈពេលប្រាំឆ្នាំ ត្រូវបានបញ្ចប់។

កាលពីថ្ងៃម្សិលមិញនេះ លោក Meechai Ruchupan ប្រធានគណៈកម្មាធិការព្រាងរដ្ឋធម្មនុញ្ញថៃ បាន បញ្ជាក់យ៉ាងច្បាស់ថាអតីតនាយករដ្ឋមន្ត្រីថៃលោកស្រី យីងឡាក់ ស៊ីនណាវ៉ាតត្រា គឺនៅតែមាន លទ្ធភាពក្នុងការឈរឈ្មោះក្នុងការបោះឆ្នោតដើម្បីប្រជែងតំណែងនាយករដ្ឋមន្ត្រីថ្មី។ ក៏ប៉ុន្តែ លោកស្រី មិនអាចឈរឈ្មោះបានទេ ប្រសិន ការបោះឆ្នោតធ្វើឡើងក្នុងអំឡុងពេលដែលលោកស្រី កំពុងស្ថិត ក្នុងការហាមឃាត់កិច្ចការនយោបាយនោះ។ នេះបើយោងតាមសារព័ត៌មាន The Nations។

ថ្មីៗនេះគណៈកម្មាធិការព្រាងរដ្ឋធម្មនុញ្ញថៃ បានដាក់បញ្ចូលបទបញ្ញត្តិមួយក្នុងសេចក្តីព្រាងរដ្ឋធម្មនុញ្ញ ថៃ ដែលបានហាមឃាត់រាល់បុគ្គលទាំងឡាយណាដែលធា្លប់ជាប់ពីបទចោទពីការលួចបន្លំសន្លឹក ឆ្នោត មិនឲ្យចូលរួមកិច្ចការនយោបាយអស់មួយជីវិត។ បទបញ្ញត្តិនេះ បានរងនូវការរិះគន់ថា ជាប់ ពាក់ព័ន្ធនឹងលោកស្រីយីងឡាក់ ពោលគឺជាចេតនានៃរបបសឹកក្នុងការហាមមិនឲ្យលោកស្រី យីងឡាក់ បន្តកិច្ចការនយោបាយទៀតបានតាមរយៈរដ្ឋធម្មនុញ្ញ។

សូមបញ្ជាក់ផងដែរថា អតីតនាយករដ្ឋមន្ត្រីថៃលោកស្រីយីងឡាក់ ស៊ីនណាវ៉ាតត្រា ត្រូវបានរដ្ឋសភា ថៃ សម្រេចផ្អាកកិច្ចការនយោបាយរយៈពេល៥ឆ្នាំ ពីបទធ្វេសប្រហែសក្នុងការធ្វើឲ្យមានអំពើពុករលួយនៅក្នុងស្ថាប័នអង្ករជាតិថៃ កាលពីឆ្នាំ២០១៤ ។ ជុំវិញបញ្ហានេះដែរ លោក Meechai Ruchupan បានបញ្ជាក់ថា មិនទាក់ទងនឹងបញ្ញត្តិថ្មីនៃសេចក្តីព្រាងរដ្ឋធម្មនុញ្ញថ្មីនោះទេ។ លោក សង្កត់ធ្ងន់ថា បើការបោះឆ្នោតថៃប្រព្រឹត្តទៅក្នុងអំឡុងពេលនៃការហាមឃាត់នោះ គឺលោកស្រី យីងឡាក់ មិនអាចមាន លទ្ធភាពបានទេ។ ផ្ទុយទៅវិញ បើការហាមឃាត់កិច្ចការនយោបាយនោះ ត្រូវបានបញ្ចប់ហើយ លោកស្រី អាចចូលរួមប្រជែងតំណែងនាយករដ្ឋមន្ត្រីបានគ្រប់ពេល។

តែអ្វីគួរកត់សម្គាល់នោះ ក្រោយពេលសេចក្តីព្រាងរដ្ឋធម្មនុញ្ញលើកដំបូងដែលធ្វើឡើងក្នុងការគ្រប់គ្រង ដោយរបបសឹកដែលដឹកនាំដោយលោកឧត្តមសេនីយ៍ប្រាយុទ្ធ ចាន់អូចា បានបរាជ័យ លោក ប្រាយុទ្ធ បានប្រកាសថា ការបោះឆ្នោតថៃ នឹងធ្វើឡើងនៅឆ្នាំ២០១៧។ ពោលគឺ ត្រូវរង់ចាំរហូតដល់រដ្ឋធម្មនុញ្ញថ្មីត្រូវបានបញ្ចប់។ យ៉ាងណាមិញ បើការបោះឆ្នោតថៃពិតជាអាចធ្វើឡើងក្នុងឆ្នាំ២០១៧មែន នោះ លោកស្រី យីងឡាក់ មិនមានលទ្ធភាពដើម្បីអាចឈរឈ្មោះ និងដឹកនាំបក្សលោកស្រីដើម្បីប្រជែង តំណែងរដ្ឋាភិបាលថ្មីបានឡើយ។ នោះ ក៏ព្រោះតែ ការអនុវត្តការហាមប្រាមរបស់សភាមកលើ លោក ស្រី នឹងត្រូវបញ្ចប់នៅឆ្នាំ២០១៨ ឬ២០១៩ឯនោះ។

គួររម្លឹកផងដែរថា លោកស្រីយីងឡាក់ បានបាត់បង់តំណែងនាយករដ្ឋមន្ត្រីក្រោយពីមានរដ្ឋប្រហារយោធាថ្ងៃទី២២ ខែឧសភា ឆ្នាំ២០១៤។ ក្រៅពី ត្រូវបានដកមុខតំណែងពីមុខងារសាធារណៈ ឬនយោបាយរយៈប្រាំឆ្នាំ លោកស្រី ក៏កំពុងរងនូវការចោទប្រកាន់ពីតុលារជាន់ខ្ពស់ថៃលើសំណុំរឿងព្រហ្មទណ្ឌ និង រឿងរដ្ឋប្បវេណី ដែលអាចឲ្យលោកស្រីត្រូវជាប់ពន្ធនាគារពី ដប់ឆ្នាំឡើងទៅ និង សងនូវសំណងរដ្ឋប្បវេណីរាប់លានដុល្លាសហរដ្ឋអាមេរិកទៀតផង៕