អន្តរជាតិ
តុលាការថៃ ហាមមិនឲ្យលោកស្រីយីងឡាក់ទៅប្រជុំជាមួយសភាអឺរ៉ុប
× តុលាការកំពូលថៃ ហាមមិនឲ្យអតីតនាយករដ្ឋមន្ត្រីថៃលោកស្រី យីងឡាក់ ស៊ីនណាវ៉ាតត្រាចូលរួមក្នុងកិច្ចប្រជុំសភាសហភាពអឺរ៉ុប។ ការជំទាស់នេះ ធ្វើឡើងក្រោមហេតុផលដំណើរនៃការចូលរួមកិច្ចប្រជុំនេះ មិនមានសារៈសំខាន់ និងគ្មានហេតុផលគ្រប់គ្រាន់។ នេះបើយោងតាមសារព័ត៌មានបាងកកប៉ុស្តិ៍។
ជាថ្មីម្តងទៀត តុលាការកំពូលថៃបានជំទាស់សំណើរបស់លោកស្រី យីងឡាក់ ស៊ីនណាវ៉ាតត្រា ក្នុងការសុំការអនុញ្ញាតដើម្បីចូលរួមពិភាក្សា និងចែករំលែកពីស្ថានភាពនយោបាយថៃបច្ចុប្បន្នជាមួយ នឹងសមាជិកសភារបស់សហភាពអឺរ៉ុប។ ការជំទាស់នេះ គឺបន្ទាប់ពីមេធាវី លោកស្រី យីងឡាក់ បានដាក់សំណើតាំងពីដើមសបា្តហ៍នេះមកម្ល៉េះ។
សូមរម្លឹកផងដែរថា បន្ទាប់ពីរដ្ឋប្រហារយោធាថៃថ្ងៃទី២២ ខែឧសភា ឆ្នាំ២០១៤មក អតីតនាយករដ្ឋ មន្ត្រីថៃ លោកស្រីយីងឡាក់ ត្រូវបានរដ្ឋាភិបាលយោធា និងតុលាការកំពូលថៃ ហាមមិនឲ្យធ្វើដំណើរ ចេញក្រៅប្រទេសបាននោះទេ។ នោះ ក៏ព្រោះតែ លោកស្រី យីងឡាក់ កំពុងស្ថិតក្នុងការចោទប្រកាន់ ពីតុលាការពីបទល្មើសពុករលួយក្នុងស្ថាប័នអង្ករជាតិថៃ ដែលទាមទារឲ្យលោកស្រីត្រូវចូលរួមនីតិវិធីរបស់តុលាការ។
លោកស្រីយីងឡាក់ ត្រូវបានសភាថៃដកមុខតំណែងពីមុខងារសាធារណៈ ឬនយោបាយរយៈប្រាំឆ្នាំ ហើយ លោកស្រី ក៏កំពុងរងនូវការចោទប្រកាន់ពីតុលារជាន់ខ្ពស់ថៃលើសំណុំរឿងព្រហ្មទណ្ឌ និង រឿងរដ្ឋប្បវេណី ដែលអាចឲ្យលោកស្រីត្រូវជាប់ពន្ធនាគារពី ដប់ឆ្នាំឡើងទៅ និង សងនូវសំណងរដ្ឋប្បវេណីរាប់លានដុល្លាសហរដ្ឋអាមេរិកទៀតផង។
ជុំវិញនៃការជំទាស់របស់តុលាការនេះដែរ គឺគេបានដឹងពីហេតុផលច្បាស់រួចទៅហើយ។ នោះគឺ បើលោកស្រីយីងឡាក់ ចេញទៅក្រៅប្រទេសមែននោះ គ្មានអ្វីក្រៅពីការលើកឡើងពីបញ្ហាសិទ្ធិមនុស្សការរឹតត្បិតរបស់របបយោធា និងការធ្លាក់ចុះដល់កម្រិតសូន្យនៃលទ្ធិប្រជាធិបតេយ្យថៃក្រោមរបប យោធានោះទេ៕
© រក្សាសិទ្ធិដោយ thmeythmey.com