សង្គមអន្តរជាតិ
អន្តរជាតិ
×![]()
ដោយ: ថ្មីៗ
នៅរដ្ឋTamil Nadu ភាគខាងត្បូង ក្រុមអ្នកសង្គ្រោះរាប់ពាន់នាក់ បានចុះទៅជួយជម្លៀសជនរងគ្រោះ ដោយទឹកជំនន់ដែលជន់លិចច្រើនសប្តាហ៍មកនេះ។ គ្រោះមហន្តរាយនេះបានសម្លាប់មនុស្សជិត២០០នាក់ហើយ។ មុនជំនួបប្រជុំស្តីពីអាកាសធាតុ នៅក្រុងប៉ារីស នាយករដ្ឋមន្ត្រី ណារិនដ្រា ម៉ូឌី បានរាប់បញ្ជូលគ្រោះទឹកជំនន់ឥណ្ឌា ទៅក្នុងគ្រោះមហន្តរាយបង្កឡើងដោយការប្រែប្រួលអាកាសធាតុ។ 
នៅរដ្ឋTamil Nadu ប៉ូលិសនិងអ្នកមុជទឹកយ៉ាងហោច១០ ០០០នាក់ ប្រដាប់ទៅដោយឧបករណ៍មុជទឹក និងសម្ភារៈពេទ្យ បានចុះទៅជួយជម្លៀសជនរងគ្រោះ។ យោងតាមមេប៉ូលិសក្រុងChennai ជំនន់៤សប្តាហ៍មកនេះ បានសម្លាប់មនុស្ស១៨៦នាក់ហើយ។ អាជ្ញាធរបានបិទដំណើរការហោះហើរ នៅអាកាសយានដ្ឋានក្រុងChennai រដ្ឋTamil Nadu ដោយសារតែភ្លៀងនៅតែបន្តធ្លាក់។ អ្នកដំណើរជាច្រើន បានជាប់ខ្លួននៅទីនោះ ដោយសារទឹកបានជន់លិចផ្លូវយន្តហោះ។ សាលារៀនបិទទ្វារ រថភ្លើងជាយក្រុងក៏ផ្អាកដំណើរការ។ ស្ពានមួយចំនួនត្រូវបានទឹកកួចយកទៅជាមួយ។
ផ្នែកឧតុនិយមឥណ្ឌាផ្តល់ព័ត៌មានថា ភ្លៀងនៅតែបន្តធ្លាក់ យ៉ាងហោចក៏៣ថ្ងៃទៀតដែរ។ ទូរទស្សន៍ក្នុងស្រុកបានបង្ហាញរូបភាពប្រជាជនដែលទូលឥវ៉ាន់លើក្បាល និងត្រូវដើរកាត់ទឹកលិចរហូតដល់កម្ពស់ដើមទ្រូងរបស់ពួកគេ។ តំណាងរាស្ត្ររដ្ឋTamil Naduមួយរូប បានសុំអោយលោកណារិនដ្រា ម៉ូឌី ប្រកាសស្ថានភាពគ្រោះមហន្តរាយធម្មជាតិ ដើម្បី ជំរុញអោយជំនួយទៅដល់កន្លែងរងគ្រោះកាន់តែឆាប់រហ័ស។
រៀងរាល់ឆ្នាំ ឥណ្ឌាតែងរងគ្រោះដោយជំនន់ភ្លៀងមូសុង ពីខែមិថុនា ទៅខែកញ្ញា។ កាលពីខែកញ្ញា ឆ្នាំ២០១៤ ទឹកជំនន់បានធ្វើអោយហៀរស្ទឹងJhelum នៅSrinagar ភាគខាងជើង សម្លាប់មនុស្សរាប់រយនាក់៕
Tag:
ឥណ្ឌា
© រក្សាសិទ្ធិដោយ thmeythmey.com
