អន្តរជាតិ
នយោបាយអន្តរជាតិ
រុស្ស៊ី៖ប្រធានាធិបតីតួកគីនិងគ្រួសារពាក់ព័ន្ធនឹងការរត់ពន្ធប្រេងខុសច្បាប់ជាមួយក្រុមដែស្ហ
លោក លោក Berat Albayrak ដែលទើបត្រូវគេតែងតាំងជារដ្ឋមន្ត្រីថាមពលតួកគី
×![]()
ដោយ: ថ្មីៗ
ថ្ងៃពុធ ម្សិលមិញ អនុរដ្ឋមន្ត្រីការពារជាតិរុស្ស៊ីបានចោទប្រធានាធិបតីតួកគីនិង ក្រុមគ្រួសារគាត់ចំៗតែម្តង ថាទទួលប្រយោជន៍ពីការរត់ពន្ធប្រេងខុសច្បាប់ របស់ក្រុមភេរវជនរដ្ឋអ៊ីស្លាម។ ជាភស្តុតាង រុស្ស៊ីបានបង្ហាញរូបភាពផ្កាយរណបបង្ហាញឡានកាំម្ញ៉ុងជាច្រើនគ្រឿង ដែលរុស្ស៊ីគិតថា បានដឹកប្រេងដែលលួចពីស៊ីរីនិងអ៊ីរ៉ាក់ យកទៅអោយតួកគី។ 
យោងតាម អនុរដ្ឋមន្ត្រីការពារជាតិរុស្ស៊ី អាណាតូលី អង់តូណូវ តួកគីជាប្រទេសចំបងដែលប្រើប្រាស់ប្រេងលួចយកមកពីស៊ីរី និងអ៊ីរ៉ាក់។ ហើយអ្នកដែលជាប់ពាក់ព័ន្ធនឹងការរត់ពន្ធប្រេងខុសច្បាប់នេះ គឺអ្នកនយោបាយតួកគីតែម្តង ក្នុងនោះមានប្រធានាធិបតីអ៊ែរដូហ្កាន់ និងក្រុមគ្រួសាររបស់គាត់។ កូនប្រសារប្រុសបស់លោកអ៊ែរដូហ្កាន់ម្នាក់ អាយុ៣៧ឆ្នាំ គឺលោក Berat Albayrak ដែលទើបត្រូវគេតែងតាំងជារដ្ឋមន្ត្រីថាមពល និងកូនប្រុសរបស់លោកអ៊ែរដូហ្កាន់ម្នាក់ កាន់កាប់ការងារដឹកជញ្ជូនផ្លូវទឹក ក៏ជាប់ពាក់ព័ន្ធនឹងការរត់ពន្ធប្រេងខុសច្បាប់ ជាមួយក្រុមជីហាតរដ្ឋអ៊ីស្លាមដែរ។
រុស្ស៊ីអះអាងទៀតថា ការរត់ពន្ធប្រេងនេះផ្តល់ចំណូលដល់ទៅរាប់ពាន់លានដុល្លារឯណោះ។ ហើយការដែលតួកគីបាញ់ទំលាក់យន្តហោះរុស្ស៊ីកាលពីជាងមួយសប្តាហ៍មុននោះ ក៏ធ្វើឡើងក្នុងទិសដៅការពារផ្លូវ ដើម្បីជួយអោយក្រុមភេរវជនដឹកប្រេងទៅដល់ទឹកដីតួកគីដែរ។
ប្រធានាធិបតីតួកគីបានទាត់ចោលការចោទប្រកាន់របស់រុស្ស៊ី និងគំរាមចាត់វិធានការសងសឹកបើរុស្ស៊ីនៅតែបន្តបង្ខូចឈ្មោះតួកគីតទៅទៀត។ ភ្លើងកំហឹងរុស្ស៊ីចំពោះតួកកីក្រោយតួកគីបាញ់យន្តហោះ រុស្ស៊ី ធ្វើអោយស្លាប់ពីឡុតរុស្ស៊ី កាលពីជាងមួយសប្តាហ៍មុន នៅមិនទាន់រលត់នៅឡើយទេ។ ក្រុងម៉ូស្គូទាមទារអោយក្រុងអង់ការ៉ាសូមទោសជាផ្លូវការ។ ប៉ុន្តែ ក្រុងអង់ការ៉ាមិនបានធ្វើតាមការទាមទារឡើយ។ ផ្ទុយទៅវិញ រដ្ឋាភិបាលតួកគីបែរជាថា នឹងរកវិធានការប្រឈមនឹងអារម្មណ៍របស់រុស្ស៊ីទៅវិញទេ។
ទោះយ៉ាងនេះក្តី រុស្ស៊ីនៅតែបង្ហាញជំហរត្រជាក់ ដោយយល់ព្រមជួបចរចាជាមួយតួកគី។ ប្រមុខការទូតរុស្ស៊ី ស៊ែរហ្កី ឡាវ្រ៉ូវ នឹងជួបប្រមុខការទូតតួកគី មេវលុត កាវូសូគ្លូ ក្នុងប៉ុន្មានថ្ងៃខាងមុខនេះ៕
Tag:
រុស្ស៊ី
© រក្សាសិទ្ធិដោយ thmeythmey.com
