អន្តរជាតិ
ទីក្រុងមូស្គូស្វាគមន៍ការវាយប្រហារដែនអាកាសរបស់អង់គ្លេសក្នុងស៊ីរី
× អ្នកនាំពាក្យវិមានក្រេមឡាំងលោក Dmitry Peskov បានលើកឡើងថា ទីក្រុងម៉ូស្គូស្វាគមន៍ចំពោះប្រតិបត្តិការទាំងឡាយណាដែលសំដៅដល់ការកម្ទេចក្រុមភេរជនរដ្ឋឥស្លាម ឬក្រុមដែស្ហ។ ការលើកឡើងនេះបានធ្វើឡើងស្របគ្នាក្រោយអង់គ្លេសក៏បានសម្រេចចិត្តចូលរួមក្នុងប្រតិបត្តិការប្រឆាំងភេរវជននេះដែរ។
រុស្សីបានប្រកាសស្វាគមន៍ចំពោះរាល់ចំណាត់ការទាំងឡាយដែលមានគោលដៅប្រឆាំងនឹងក្រុមជ្រុលនិយមរដ្ឋឥស្លាមក្នុងទឹកដីស៊ីរី ខណៈពេលដែលអង់គ្លេសបានសម្រេចចិត្តប្រឡូកចូលក្នុងយុទ្ធនាការនេះដែរដោយបានបញ្ជូនទ័ពអាកាសរបស់ខ្លួនមកកម្ទេចក្រុមជ្រុលនិយមផងដែរ។
ជាមួយគ្នានេះ លោក Dmitry Peskov អ្នកនាំពាក្យវិមានក្រឹមឡាំង បានបញ្ជាក់ប្រាប់អ្នកសារព័ត៌មានថា សម្ព័ន្ធមិត្តមួយនេះគួរតែបង្កើនប្រសិទ្ធភាពរបស់ខ្លួនបន្ថែមទៀត។ នេះប្រហែលជាសំដៅដល់ក្រុមសម្ព័ន្ធមិត្តដែលដឹកនាំដោយអាមេរិកហើយមើលទៅ ពីព្រោះរុស្សីតែងរិះគន់ចំពោះប្រតិបត្តិការដែលអាមេរិកនាំមិនសូវមានប្រសិទ្ធភាពនោះទេ។
កាលពីថ្ងៃពុធម្សិលមិញ សភាជាន់ទាបរបស់អង់គ្លេសបានបោះឆ្នោតបើកភ្លើងខៀវដល់លោកនាយករដ្ឋមន្ត្រី ដេវីដ ខេមេរ៉ូន (David Cameron) ចូលរួមវាយប្រហារដែនអាកាសក្នុងប្រទេសស៊ីរី។ ការសម្រេចចិត្តនេះធ្វើឡើង បន្ទាប់ពីមានការស្នើពីលោក ខេមេរ៉ូន ដែលបានលើកឡើងពីភាពចាំបាច់ក្នុងការកម្ទេចក្រុមរដ្ឋឥស្លាមដែលបានគំរាមដល់សន្តិសុខអង់គ្លេស។
ប៉ុន្មានម៉ោងក្រោយការសម្រេចរបស់សភា កងទ័ពអាកាសរបស់អង់គ្លេសបានចាប់ផ្ដើមប្រតិបត្តិការជាលើកដំបូងរបស់ខ្លួនក្នុងប្រទេសស៊ីរី។ យន្តហោះចំបាំងរបស់ទ័ពអាកាសបានហោះចេញពីមូលដ្ឋានក្នុងកោះស៊ីប (Cyprus) ដោយសំដៅទៅទីតាំងនានារបស់ក្រុមជ្រុលនិយមរដ្ឋឥស្លាមឬក្រុមដែស្ហនៅស៊ីរី៕
© រក្សាសិទ្ធិដោយ thmeythmey.com