កីឡាជាតិ
ជាតិ
×![]()
ដោយ: ទេព ពិទូរ្យ
ទិវាប្រណាំងកង់អន្តរជាតិអង្គរលើកទី១០ដើម្បីកុមារ «Bike 4 Kids» បានទទួលការចូលរួមយ៉ាងច្រើន ពីសំណាក់ភ្ញៀវទេសចរជាតិ និងអន្តរជាតិនៅជុំវិញពិភពលោក។ ការប្រណាំងកង់ត្រូវបានរៀបចំនៅជុំវិញតំបន់អង្គរ ខេត្តសៀមរាប នៅព្រឹកថ្ងៃសៅរ៍ទី៥ខែធ្នូនេះ។
គណៈកម្មការជាតិអូឡាំពិកកម្ពុជា (NOCC) សហការជាមួយអង្កការភូមិគោលដៅអន្តរជាតិ(Village Focus International organization) បានបង្កើតកម្មវិធីប្រណាំងកង់នេះឡើង ក្នុងគោលដៅរួមចំណែកជំរុញស្មារតី ការពារថែរក្សាបរិស្ថានតំបន់បេតិកភណ្ឌ និងជួយដល់អង្កការមនុស្សធម៌ ជាពិសេសគឺជួយឧបត្ថម្ភថែទាំកុមារ និងស្ត្រីក្នុងពន្ធធនាគារ។
ការប្រណាំងកង់ដើម្បីកុមារព្រឹកមិញនេះ ចែកចេញជាបីប្រភេទផ្សេងៗគ្នា។ ពោលគឺ មានការប្រណាំង ១៧គីឡូម៉ែត្រ ៣០គីឡូម៉ែត្រ និង ១០០គីឡូម៉ែត្រ។ នៅឆ្នាំនេះ កម្មវិធីប្រណាំងកង់ដើម្បីកុមារទទួលបានអ្នកចូលរួមសរុបច្រើនជាង ៧០០នាក់ ក្នុងនោះរួមានជនបរទេសចំនួន៣២៥នាក់ ដែលមកពី ៣៦ ប្រទេសផ្សេងៗគ្នាជុំវិញពិភពលោក។
ថវិកាដែលប្រមូលបានពីព្រឹត្តិការណ៍ប្រណាំងកង់ដើម្បីកុមារនេះ នឹងត្រូវប្រើប្រាស់ដើម្បី ការពារកុមារពីការជួញដូរ និងកេងប្រវ័ញ្ច និងផ្តល់នូវជំនាញសម្រាប់ចិញ្ចឹមជីវិតដល់យុវជនដែលមានជីវភាពខ្វះខាត។ ជាងនេះទៅទៀត ការផ្តល់នូវកន្លែងស្នាក់នៅដែលមានសុវត្ថិភាពដល់ស្ត្រី និង កុមារដែលរងគ្រោះពីការរំលោភបំពាន ធ្វើការទំនុកបម្រុងចំពោះកុមារដែលមានឪពុក ម្តាយជាប់នៅក្នុងពន្ធនាគារ ក៏ស្ថិតនៅក្នុងគម្រោងនៃការប្រើប្រាស់ថវិកាទាំងនេះដែរ៕
Tag:
ប្រណាំងកង់
© រក្សាសិទ្ធិដោយ thmeythmey.com
