លោក ថោងខុន៖ ទិវារត់ពាក់កណ្តាលម៉ារ៉ាតុនអង្គរជាមន្តស្នេហ៍ទាក់ទេសចរអន្តរជាតិ

កីឡាជាតិ

ជាតិ

លោក ថោងខុន៖ ទិវារត់ពាក់កណ្តាលម៉ារ៉ាតុនអង្គរជាមន្តស្នេហ៍ទាក់ទេសចរអន្តរជាតិ

07, Dec 2015 , 10:39 am

រូបភាព

ដោយ: ទេព ពិទូរ្យ

លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា បានអះអាងថា ទិវារត់ប្រណាំងអន្តរជាតិពាក់កណ្តាលម៉ារ៉ាតុនអង្គរ ជួយជំរុញ និងទាក់ទាញភ្ញៀវទេសចរមួយចំនួនធំឲ្យស្គាល់ប្រទេសកម្ពុជា ជាពិសេសតំបន់អង្គរ ខេត្តសៀមរាប។

នាការបញ្ចប់ព្រឹត្តិការណ៍ រត់ប្រណាំងពាក់កណ្តាលម៉ារ៉ាតុនអង្គរលើកទី២០ កាលពីថ្ងៃទី៦ ខែធ្នូ នៅមុខប្រាសាទអង្គរវត្ត ខេត្តសៀមរាប លោក ថោង ខុន បានថ្លែងនៅចំពោះមុខអ្នកចូលរួមប្រណាំងជាង១ម៉ឺននាក់ថា៖ «ទិវារត់ប្រណាំងពាក់កណ្តាលម៉ារ៉ាតុនអន្តរជាតិអង្គរ មិនត្រឹមតែទាក់ទាញភ្ញៀវទេសចរប៉ុណ្ណោះ តែវាជាមន្តស្នេហ៍ដើម្បីផ្សព្វផ្សាយទៅទូទាំងពិភពលោកឲ្យស្គាល់តំបន់ទេសចរណ៍ ក៏ដូចជាប្រទេសកម្ពុជាយើងទាំងមូល»។

រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា បានបន្ថែមថា បើតាមការវាយតម្លៃរបស់ពិភពលោក កម្ពុជាជាប្រទេសមួយនៅក្នុងតំបន់អាស៊ីអាគ្នេយ៍ ដែលមានសុខសន្តិភាពពេញលេញ អាចប្រកួតប្រជែងផ្នែកទេសចរណ៍វប្បធម៌ និងទេសចរណ៍ធម្មជាតិ ជាមួយបណ្ដាប្រទេសជាច្រើនទៀត នៅក្នុងពិភពលោក។

បើតាមគណៈកម្មការរៀបចំការប្រកួត ទិវារត់ប្រណាំងអន្តរជាតិពាក់កណ្តាលម៉ារ៉ាតុនអង្គរលើកទី២០នេះ មានអ្នកចូលរួមជាជនជាតិខ្មែរ ជាង៤ពាន់នាក់ និងបរទេសជាង៤ពាន់នាក់ដែលមកពី៧៥ប្រទេស។ សម្រាប់វិញ្ញាសាឆ្នាំនេះក៏ដូចឆ្នាំមុនដែរ រួមមាន ៣គីឡូម៉ែត្រ ១០គីឡូម៉ែត្រ និង២១គីឡូម៉ែត្រ ដោយមានការចូលរួមទាំងបុរស ទាំងនារី និងកុមារផងដែរ៕