អន្តរជាតិ
តួកគីចោទរុស្ស៊ីថា កម្ចាត់និកាយស៊ូនី និងពង្រឹងក្រុមដែស្ហនៅស៊ីរីវិញម្តង
× ថ្ងៃពុធ ម្សិលមិញ នាយករដ្ឋមន្ត្រីតួកគី អាមេត ដាវូតូគ្លូ (Ahmet Davutoğlu) បានចោទរុស្ស៊ីថា ចង់បោសសម្អាតប្រជាជនអារ៉ាប់ភាគតិចតួកមែន និងអ្នកកាន់និកាយស៊ុននីត និងថែមទាំងកំពុងពង្រឹងក្រុមភេរវជនរដ្ឋអ៊ីស្លាមនៅស៊ីរី។ ជម្លោះការទូតរវាងតួកគីនិងរុស្ស៊ី ប្រហែលជាមិនអាចបិទបញ្ចប់ឡើយ។
យោងតាមលោក ដាវូតូគ្លូ រុស្ស៊ីកំពុងព្យាយាមបណ្តេញប្រជាជនអារ៉ាប់ភាគតិចកាន់និកាយស៊ូនី និងប្រជាជនតួកមែន ដែលមានដើមកំណើតពីតួកគី ឲ្យចាកចេញពីតំបន់Lattaquié ភាគពាយព្យស៊ីរី។ សម្រាប់នាយករដ្ឋមន្ត្រីតួកគី ប្រជាជនភាគតិចទាំងនេះគ្មានទំនាក់ទំនងល្អជាមួយរដ្ឋាភិបាលលោកអាសាដ ដែលកាន់និកាយអាឡាវីតទេ។
លើសពីនេះ តួកគីថែមទាំងចោទរុស្ស៊ីទៀតថា តាំងពីរុស្ស៊ីអន្តរាគមន៍យោធា នៅស៊ីរី ចុងខែកញ្ញាមក រុស្ស៊ីវាយប្រហារតែលើក្រុមប្រឆាំងស៊ីរីតែប៉ុណ្ណោះ ដើម្បីរក្សាអំណាចរបស់ប្រធានាធិបតីអាសាដ។
វិបត្តិការទូតរវាងតួកគីនិងរុស្ស៊ី មិនដឹងជាអាចបញ្ចប់ពេលណាឡើយ។ វិបត្តិការទូតផ្ទុះឡើងក្រោយតួកគីបាញ់ទម្លាក់យន្តហោះរុស្ស៊ី ធ្វើឲ្យរុស្ស៊ីខឹងដាច់ក្បាលដាច់កន្ទុយ រហូតចោទប្រធានាធិបតីតួកគីនិងក្រុមគ្រួសារ ថាទិញប្រេងឆៅពីក្រុមភេរវជន។ តួកគីវិញក៏រឹងរូស មិនធ្វើការសុំទោសជាផ្លូវការ ចំពោះការបាញ់ទម្លាក់យន្តហោះរុស្ស៊ី។ ហើយពេលនេះ នាយករដ្ឋមន្ត្រីដាវូតូគ្លូក៏មិនខ្លាចនឹងចេញមុខចោទទៅរុស្ស៊ីវិញដែរថា កំពុងពង្រឹងក្រុមភេរវជនរដ្ឋអ៊ីស្លាម៕
© រក្សាសិទ្ធិដោយ thmeythmey.com