អន្តរជាតិ
នយោបាយអន្តរជាតិ
នយោបាយយោធាអាមេរិកកាន់តែស្និទ្ធរដ្ឋអាស៊ាន ចិនកំពុងប្រុងជើងការ
× រយៈពេលចុងក្រោយនេះ អាមេរិក បានព្យាយាមពន្លេចគោលនយោបាយការបរទេសផ្តោតលើឥទ្ធិពលយោធារបស់ ខ្លួនកាន់តែច្បាស់នៅតំបន់អាស៊ីអាគ្នេយ៍។ នោះគឺ អាមេរិក បានពង្រឹងដៃគូយ៉ាងជិតស្និទ្ធ និងស៊ីជម្រៅជាមួយរដ្ឋាភិបាលរដ្ឋអាស៊ានដូចជាវៀតណាម ម៉ាឡេស៊ី ឥណ្ឌូនេស៊ី វៀតណាម និងចុងក្រោយ ជាមួយសិង្ហបុរី ផងដែរ។ សកម្មភាពនេះ គឺពិតជាធ្វើឲ្យចិន មិនសប្បាយចិត្តប៉ុន្មាននោះទេ ដ្បិតចិន ក៏ជាមហាអំណាចមួយដែលកំពុងតែមានឥទ្ធិពលនៅក្នុងតំបន់អាស៊ីប៉ាស៊ីហ្វិកស្រាប់នោះ។
គោលនយោបាយការបរទេសយោធាអាមេរិក កំពុងតែវាយលុកខ្លាំងមកតំបន់អាស៊ីអាគ្នេយ៍ ខណៈចិន កំពុងតែពង្រីកអំណាចនៅក្នុងតំបន់ ក៏ជាដូចជាកំពុងតែមានជម្លោះដែនអធិបតេយ្យជាមួយនឹងរដ្ឋអាស៊ានផងដែរនោះ។ វត្តមាននេះ អាចជាការពង្រឹងគោលនយោបាយការបរទេសឲ្យកាន់តែស៊ីជម្រៅ ឬ ក៏អាចជាឆ្លៀតឱកាសមួយរបស់អាមេរិកក្នុងការប្រឆាំងនឹងឥទ្ធិពលចិននៅក្នុងតំបន់អាស៊ីអាគ្នេយ៍។
១. អាមេរិក បានធ្វើអ្វីខ្លះជាមួយរដ្ឋអាស៊ានលើវិស័យយោធា?
កន្លងមក គេបានឃើញច្បាស់ហើយថា អាមេរិក បានចងសម្ព័ន្ធមិត្តយ៉ាងជិតស្និទ្ធជាមួយរដ្ឋអាស៊ាន មួយចំនួនដូចជាហ្វីលីពីន និងវៀតណាម ដ្បិតប្រទេសទាំងនេះកំពុងតែប្រឈមមុខជាមួយចិន ខ្លាំងលើជម្លោះដែនសមុទ្រ។ ហើយអ្វីដែលគេដឹងច្បាស់នោះគឹអាមេរិក បានរៀបចំលំហាត់យោធា ហើយចុងក្រោយនេះ ក្នុងឱកាសកិច្ចប្រជុំសហប្រតិបត្តិការសេដ្ឋកិច្ចអាស៊ីប៉ាហ្វិកនៅហ្វីលីពីន អាមេរិក បានប្រកាសផ្តល់ជំនួយ២៥០លានដុល្លាអាមេរិកក្នុងរយៈពេល២ឆ្នាំសម្រាប់សម្ព័ន្ធមិត្តនៅក្នុងតំបន់អាស៊ីអាគ្នេយ៍ដើម្បីពង្រឹងសមត្ថភាពការពារសន្តិសុខ ដែនសមុទ្រ។ រដ្ឋសម្ព័ន្ធមិត្តទាំងនោះ រួមានហ្វីលីពីន ម៉ាឡេស៊ី ឥណ្ឌូនេស៊ី និងវៀតណាម។ ការផ្តល់ជំនួយដើម្បីពង្រឹងសមត្ថភាពការពារសន្តិសុខដែនសមុទ្រនេះដែរ គឺគ្មានអ្វីក្រៅពី ការការពារការវាតទីរបស់ចិននៅដែនសមុទ្រនោះទេ។
មួយវិញទៀត កាលពីដើមសប្តាហ៍នេះ សិង្ហបុរី និងអាមេរិក ក៏បានបង្ហាញគោលជំហរមួយយ៉ាង ជិតស្និទ្ធគួរកត់សម្គាល់។ នោះគឺ រដ្ឋាភិបាលសិង្ហបុរី បានអនុញ្ញាតឲ្យមានការពង្រាយយន្តហោះស៊ើបការណ៍ប្រភេទ P8 Poseidon របស់អាមេរិកនៅសិង្ហបុរី ដើម្បីគាំទ្រដល់ប្រតិបត្តិការការពារដែនសមុទ្រ។ លើសពីនេះទៅទៀត សិង្ហបុរី ថែមទាំង បានទទួូចឲ្យអាមេរិក បង្ហាញពីតួនាទីរបស់ខ្លួនឲ្យកាន់តែច្បាស់នៅក្នុងតំបន់អាស៊ីប៉ាស៊ីហ្វិក ដើម្បីរក្សាស្ថិរភាពក្នុងតំបន់។
ភាពស្និទ្ធស្នាលរបស់រដ្ឋអាស៊ានជាមួយអាមេរិក បានបង្ហាញឲ្យឃើញច្បាស់ហើយថា រដ្ឋអាស៊ាន ភាគច្រើន ត្រូវការវត្តមានរបស់អាមេរិក នៅតំបន់អាស៊ីអាគ្នេយ៍ ដើម្បីជាតុល្យភាពនៃអំណាចយោធា ព្រោះបើបណ្តោយចិនពង្រីកអំណាចកាន់ខ្លាំង វានឹងធ្វើឲ្យមានការគំរាមកំហែងក្នុងតំបន់។
២. ចិន មិនទាន់ខ្លាច តែមិនព្រងើយចំពោះគោលនយោបាយអាមេរិកនៅអាស៊ីអាគ្នេយ៍
ទោះបីជាអាមេរិក បានព្យាយាមពង្រីកឥទ្ធិពលយោធាមកក្នុងតំបន់អាស៊ីអាគ្នេយ៍កាន់តែខ្លាំងយ៉ាងណា ក៏ដោយ ចិន ហាក់ដូចនៅរក្សាភាពស្ងៀមស្ងាត់នៅឡើយ។ សូម្បីកាលពីចុងខែកញ្ញា និងដើមខែតុលាកន្លងទៅ អាមេរិកបានបញ្ជួនទាំងនាវាចម្បាំង និងយន្តហោះទម្លាក់គ្រាប់មកកាន់តំបន់ជម្លោះសមុទ្រចិនខាងត្បូង តែចិនមិនប្រតិកម្មតាមរយៈ ការបញ្ជូន កងទ័ពដើម្បីប្រឈមវត្តមានអាមេរិកដែរ។ តែចិន គ្រាន់តែព្រមានតាមពាក្យសម្តីថា វាអាចនឹងមានការប៉ះទង្គិចគ្នា បើអាមេរិកហ៊ានធ្វើសកម្មភាពដដែលនៅក្នុងសមុទ្រចិនខាងត្បូង។
ដោយឡែក ជុំវិញកិច្ចសហការពង្រាយកងទ័ពអាមេរិក នៅសិង្ហបុរីចុងក្រោយ ចិន មិនទាន់ភ្ងាក់ផ្អើលនោះទេ តែចិនក៏មិនអាចមិនខ្វាយខ្វល់បានដែរ។ រដ្ឋមន្ត្រីការពារជាតិចិន បានអះអាងថារដ្ឋាភិបាលចិន កំពុងតែតាមដានការវិវត្តនៃស្ថានភាព និងសង្ឃឹមថាកិច្ចសហប្រតិបត្តិការទ្វេភាគីលើ វិស័យយោធា នឹងផ្តល់ផលចំណេញសម្រាប់សន្តិភាព និងស្ថិរភាពនៅក្នុងតំបន់ តែមិនមែនជាការគំរាមកំហែងឡើយ៕
© រក្សាសិទ្ធិដោយ thmeythmey.com