តើ​ពាក្យ «​ការបោះឆ្នោត​ជា​កញ្ចប់​» មានន័យ​ដូចម្ដេច​?
ពីនេះ ពីនោះ / មិនយល់...!
តើ​ពាក្យ «​ការបោះឆ្នោត​ជា​កញ្ចប់​» មានន័យ​ដូចម្ដេច​?
11, Dec 2015 , 7:19 am        
រូបភាព
ដោយ: ថ្មីៗ
​ក្រុមប្រឹក្សា​ជាតិ​ភាសា​ខ្មែរ បានកំណត់ និង​ឲ្យ​និយមន័យ ពាក្យ​ថា «​ការបោះឆ្នោត​ជា​កញ្ចប់​» នេះ​ដូចខាងក្រោម​៖



​ការបោះឆ្នោត​ជា​កញ្ចប់ មានន័យថា ការបោះឆ្នោត​ដើម្បី​អនុម័ត ឬ​សម្រេច​បញ្ហា​ជាច្រើន ក្នុងពេល​តែមួយ ដោយ​សមាជិក​ម្នាក់​ប្រើ​សន្លឹកឆ្នោត​ឬ​សំឡេង​តែមួយ​។ នីតិវិធី​នេះ​ត្រូវបាន​ដកស្រង់​ពី​រដ្ឋធម្មនុញ្ញ​ប្រទេស​បារាំង​យកមក​កែច្នៃ​ទៅតាម​បរិបទ​នយោបាយ​កម្ពុជា​ដែល​អ្នកនយោបាយ​ខ្មែរ​យកមកប្រើ​ក្រោយពី​ជាប់គាំង​នយោបាយ​ពី​ឆ្នាំ​២០០៣​រហូតដល់​ខែកក្កដា​ឆ្នាំ​២០០៤​។

​ឧទាហរណ៍ ក្រោយ​ការបោះឆ្នោត​សកល​ជ្រើសរើស​តំណាងរាស្ត្រ​ឆ្នាំ​២០០៣ គណបក្ស​ប្រជាជន​កម្ពុជា​ជាប់ឆ្នោត​បាន​៧៣​អាសនៈ គណបក្ស​ហ្វ៊ុនស៊ិនប៉ិច​បាន​២៦​អាសនៈ និង​គណបក្ស សម រង្ស៊ី​២៤​អាសនៈ​។ យោងតាម​ចំនួន​នេះ គ្មាន​គណបក្ស​ណាមួយ​មាន​សំឡេង​គ្រប់​ចំនួន​ពីរភាគបី ដើម្បី​បង្កើត​រដ្ឋាភិបាល​តែម្នាក់ឯង​បានទេ​។ តាមច្បាប់​រដ្ឋធម្មនុញ្ញ​ឆ្នាំ​១៩៩៣ ការបោះឆ្នោត​ជ្រើសរើស​ប្រធាន​និង​អនុប្រធានរដ្ឋសភា ក៏ដូចជា​ជ្រើសរើស​នាយករដ្ឋមន្ត្រី ត្រូវការ​សំឡេងគាំទ្រ​ពីរភាគបី ទើប​អាច​ជ្រើសតាំង​បាន ហើយ​ដោយសារ​គណបក្ស​ហ្វ៊ុនស៊ិនប៉ិច និង​គណបក្ស សម រង្ស៊ី បាន​បង្កើត​សម្ព័ន្ធភាព​អ្នកប្រជាធិបតេយ្យ​ដែល​មិន​ព្រមឱ្យ​គណបក្ស​ណាមួយ​ចូល​ជាមួយ​គណបក្ស​ប្រជាជន​កម្ពុជា​ដើម្បី​បង្កើត​រដ្ឋាភិបាល (​បើ​ចូល ចូល​ទាំងអស់គ្នា បើ​ចេញ ចេញ​ទាំងអស់គ្នា​)​។ ស្ថានភាព​ក៏ត្រូវ​បាន​កកស្ទះ​។ ក្រោយមក​ដំណោះស្រាយ​ចំពោះ​ភាពទ័លច្រក​បានចេញ​រួច ដោយ​គណបក្ស​ហ្វ៊ុនស៊ិនប៉ិច ព្រម​ចូលរួម​បង្កើត​រដ្ឋាភិបាលចម្រុះ​ជាមួយ​គណបក្ស​ប្រជាជន​កម្ពុជា​។ ការជ្រើសតាំង​ប្រធានសភា និង​រដ្ឋាភិបាល​អាណត្តិ​ទី​៣​តាមច្បាប់​រដ្ឋធម្មនុញ្ញ តំណាងរាស្ត្រ​ត្រូវបាន​បោះឆ្នោត​ជ្រើសរើស​ប្រធាន អនុប្រធាន​និង​គណៈកម្មការ​នានា​ជាមុនសិន​។ ក្រោយពី​បោះឆ្នោត​នេះហើយ ទើប​បោះឆ្នោត​ជ្រើស​នាយករដ្ឋមន្ត្រី​ចេញពី​គណបក្ស​ដែលមាន​អាសនៈ​ច្រើនជាងគេ​ក្នុង​រដ្ឋសភា​។ តែ​ដោយ​ការបាត់​ជំនឿ​ទុកចិត្ត​លើ​គណបក្ស​ដៃគូ គេ​បានធ្វើ​វិសោធនកម្ម​រដ្ឋធម្មនុញ្ញ​ដោយ​បញ្ចូល​ការបោះឆ្នោត​ជា​កញ្ចប់​ដើម្បី​សម្រេច​បញ្ហា​ពីរ​ក្នុងពេល​តែមួយ​៕


Tag:
 ពន្យល់ពាក្យ
© រក្សាសិទ្ធិដោយ thmeythmey.com