ពីនេះ ពីនោះ
វិធីសាស្ត្រដើម្បីក្លាយជាសិស្សដ៏ប្រសើរមួយរូប!
× ភ្នំពេញ៖ សាលាគឺជាទីកន្លែងសម្រាប់ធ្វើការណាត់ជួបរវាងគ្រូនិងសិស្ស ដើម្បីផ្ទេរ និងទទួលយកចំណេះដឹង ពីគ្រូទៅសិស្ស និងពីសិស្សទៅគ្រូ។ ប៉ុន្តែក្នុងនាមជាអ្នកសិក្សារៀនសូត្រ ការរៀនពីវិធីសាស្ត្រក្នុងការសិក្សា ដើម្បីទទួលបានភាពពេញលេញក្នុងនាមជាអ្នករៀន បំពេញកាតព្វកិច្ចក្នុងនាមជាសិស្ស ឆ្ពោះទៅរកការកសាងពិសោធន៍ជីវិតដ៏ទូទូលាយមួយ ដែលបង្ករភាពងាយស្រួលសម្រាប់ការសិក្សារបស់អ្នកគឺជារឿងមួយដែលសិស្សនិស្សិតត្រូវតែសិក្សាស្វែងយល់។ ដើម្បីក្លាយជាសិស្សដ៏ប្រសើមួយរូប សិស្សនិស្សិតគួរតែពិចារណាទម្លាប់មួយចំនួនដើម្បីអភិវឌ្ឍន៍ខ្លួនក្នុងការសិក្សាដូចខាងក្រោម៖
១/. ធ្វើជាមនុស្សមានទម្លាប់ក្នុងការរៀបចំចាត់ចែង សម្ភារសិក្សា និងឯកសារ៖ ក្នុងនាមជាសិស្សនិស្សិត អ្នកត្រូវតែមានសកម្មភាពក្នុងការរៀបចំចាត់ចែងឲ្យបានច្បាស់លាស់ នូវអ្វីដែលអ្នកត្រូវប្រើប្រាស់ក្នុងការសិក្សារបស់អ្នក និងសម្ភារសិក្សាផ្សេងៗសម្រាប់ប្រើប្រាស់នៅក្នុងថ្នាក់។ ហើយត្រូវរៀបចំឯកសារមេរៀនទៅតាមផ្នែកៗនៃមុខវិជ្ជាជាដើម។ ឧទាហរណ៍ ប្រសិនបើជាឯកសារជាក្រដាស់ ឬសៀវភៅត្រូវដាក់តាមផ្នែកៗ។ បើជាឯកសារក្នុងកំព្យូទ័រត្រូវបង្កើតជាផ្នែកៗ ដាក់តាមប្រភេទឯកសារ ដើម្បីងាយស្រួលក្នុងការស្វែងរកឯកសារ។
២/. ត្រូវធ្វើជាសិស្សនិស្សិតដែលមានស្មារតីប្រុងប្រយ័ត្ន និងការតាំងចិត្តនៅក្នុងថ្នាក់៖ នៅពេលដែលគ្រូកំពុងបង្រៀនមេរៀន ត្រូវតែកត់ត្រានៅអ្វីដែលជាចំណុចសំខាន់នៃមេរៀន និងចំណុចណាដែលអ្នកមិនយល់ ហើយលើកដៃសួរគ្រូរបស់អ្នកទាក់ទងនិងចំណុចទាំងអស់នោះ។ នៅពេលដែលអ្នកបានសួរសំណួរកាន់តែច្រើន អ្នកនឹងកាន់តែពូកែជាមុន មានភាពជឿជាក់ចំពោះការយល់ដឹងរបស់អ្នក និងអាចមិនយល់ស្របជាមួយចម្លើយជាដើម។ អ្នកត្រូវប្រមូលផ្ដុំស្មារតី និងផ្ដោតជាសំខាន់ទៅលើមេរៀនរបស់អ្នក និងការព្យាយាមយកចិត្តទុកដាក់មើលការបង្រៀនរបស់គ្រូ ស្ដាប់ការពន្យល់ ហើយកត់ត្រា។ បន្ទាប់មកអ្នកត្រូវតែរំលឹកឡើងវិញ នូវអ្វីដែលអ្នកបានកត់ត្រា នៅពេលដែលអ្នកមានពេលទំនេរ។ ករណីអ្នកមានកំហុសក្នុងការកត់ត្រា អ្នកត្រូវចេះពឹងពាក់មិត្តភ័ក្តរបស់អ្នកឲ្យជួយកែតម្រូវ ដោយមិនត្រូវប្រកាន់អារម្មណ៍ខ្មាស់អៀន។ ជៀសវាងការធ្វេសប្រហែសនៅក្នុងថ្នាក់ ដោយសកម្មភាពរំខាននានាជាមួយអ្នកដទៃ។ ហើយបើមិត្តរបស់អ្នករំខានអ្នក អ្នកត្រូវប្រាប់គេថាអ្នកកំពុងរៀន។
៣/. ត្រូវរៀនដោយផ្ដោតសំខាន់លើមេរៀនដែលអ្នកត្រូវរៀន៖ អ្នកត្រូវតែជាមនុស្សដែលពូកែអាន គឺត្រូវចាប់ផ្ដើមពីការអាន។ អានហើយ អានទៀតនូវមេរៀនដែលអ្នកត្រូវរៀន។ នៅពេលអ្នកអាន អ្នកអាចមិនយល់ ប៉ុន្តែតាមរយៈការអាន ធ្វើឲ្យអ្នកអាចស្វែងយល់កាន់តែច្រើនទោះបីជា សៀវភៅនោះមានភាពលំបាកយ៉ាងណាក៏ដោយ។ បន្ទាប់មកអ្នកត្រូវបង្កើតជាផែនទីគំនិត(ការកត់ចំណាំចំណុចសំខាន់ៗក្នុងគំនិត) ដែលវាមានសារៈសំខាន់ដើម្បីជួយក្នុងការគិតវិភាគលើប្រធានបទដែលពិបាកៗ។ ផែនទីគំនិតនេះផងដែរ អាចជួយអ្នកក្នុងការរំលឹកមេរៀនមុនពេលប្រលងជាដើម។
មិនតែប៉ុណ្ណោះ អ្នកក៏ត្រូវប្រើប្រាស់សម្ភារជំនួយក្នុងការសិក្សាបន្ថែមដូចជា ទូរស័ព្ទ ទូរទស្សន៍ អាយផេត កំព្យូទ័រជាដើម ដើម្បីប្រើប្រាស់សម្រាប់ស្រាវជ្រាវឯកសារតាមរយៈប្រព័ន្ធអ៊ីនធឺណិតនានា។
ក្នុងនោះផងដែរអ្នកត្រូវតែគ្រប់គ្រងឲ្យបានថាតើថ្ងៃស្អែកអ្នកនិងត្រូវសិក្សាមេរៀនណា ហើយត្រូវអានមេរៀនទាំងនោះឲ្យបានមុនពេលដែលអ្នកត្រូវទៅជួបគ្រូនៅក្នុងថ្នាក់រៀន។
៤/. ធ្វើកិច្ចការសាលាដោយខ្លួនអ្នកផ្ទាល់៖ ការធ្វើកិច្ចការសាលា ដែលគ្រូរបស់អ្នកបានដាក់ឲ្យគឺជាហេតុផលមួយដែលគ្រូរបស់អ្នក ចង់ដឹងពីអ្វីដែលអ្នកបានរៀនក្នុងថ្ងៃនោះ ថាអ្នកទទួលបានការយល់ដឹងកម្រិតណា។ ប្រសិនបើអ្នកចង់ក្លាយជាសិស្សជោគជ័យ អ្នកត្រូវតែព្យាយាមក្នុងការហ្វឹកហាត់ ការធ្វើលំហាត់សាលា កិច្ចការគ្រូដាក់ឲ្យតាមសមត្ថភាពដែលខ្លួនមាន។
៥/. កែប្រែការគិតរបស់អ្នកតាមរយៈវិចារណញាណ៖ សិស្សនិស្សិតមួយចំនួន គឺរៀនទៅតាមតែអ្វីដែលសៀវភៅ ឬមេរៀនដែលគ្រូបានផ្ដល់ឲ្យតែប៉ុណ្ណោះ តែមិនព្រមគិតដោយសមត្ថភាពនៃវិចារណញាណរបស់ខ្លួននោះទេ។ ជួនកាលមេរៀនខ្លះគឺមិនត្រូវតាមបរិបទនៃសង្គមដែលអ្នករស់នៅនោះទេ ហេតុនេះនៅពេលដែលសិស្សព្យាយាមបកស្រាយ ទ្រឹស្ដី គំនិត កុំព្យាយាមការពារគំនិតចាស់ៗនោះពេក។ តែអ្នកត្រូវប្រើសមត្ថភាពពិតនៃការវិភាគរបស់អ្នកតាមរយៈការសង្គេតពីសង្គមជាក់ស្ដែង បទពិសោធន៍ជីវិត និងការវិវត្តន៍នៃវិទ្យាសាស្ត្រថ្មី ដោយផ្សាភ្ជាប់ជាមួយអំណះអំណាងក្នុងសៀវភៅ៕
© រក្សាសិទ្ធិដោយ thmeythmey.com