អន្តរជាតិ
មូលហេតុដែលអាចធ្វើអោយបក្សស្តាំនិយមជ្រុលបារាំងឡើងកូត ឈ្នះឆ្នោតតំបន់
× ក្នុងការបោះឆ្នោតតំបន់ជុំទី១នៅប្រទេសបារាំង កាលពីថ្ងៃអាទិត្យសប្តាហ៍មុន បក្សរណសិរ្សជាតិរបស់លោកស្រី ម៉ារីន ឡឺពេន (Marine Le Pen) បានទទួលជោគជ័យធំធេង ធ្វើអោយបក្សផ្សេងៗ ពិសេសបក្សកាន់អំណាចរបស់ប្រធានាធិបតី ហ្វ្រង់ស្វ័រ ហូឡង់ (Francios Hollande) និងបក្សស្តាំនិយមរបស់អតីតប្រធានាធិបតីសាកូហ្ស៊ី (Nicolas Sarkozy) បារម្ភខ្លាំង។ គេរំពឹងថា អត្រាប្រជាជនគ្មានការងារនៅតែខ្ពស់ និងភេរវកម្មក្រុងប៉ារីស អាចជាមូលហេតុចំបងដែលរុញអោយបក្សស្តាំជ្រុលនិយមមួយនេះ ទទួលជោគជ័យក្នុងការបោះឆ្នោត។ ដោយឡែក លោកស្រី ឡឺពេនសន្យាថា មិនទុកអោយរដ្ឋាភិបាលលោក ហូឡង់នៅស្ងៀមស្រួលទេ បើបក្សលោកស្រីឈ្នះឆ្នោតតំបន់ ជុំទី២ នៅចុងសប្តាហ៍នេះ។ លោកស្រីឡឺពេន គំរាមប្តឹងរដ្ឋាភិបាលពីរឿងជនភៀសខ្លួននៅតំបន់កាឡេ ជិតព្រំដែនអង់គ្លេស។ លោកស្រីឡឺពេន ចង់ប្តឹងថា រដ្ឋបណ្តោយអោយបញ្ហានេះរាលដាលខូចប្រយោជន៍សេដ្ឋកិច្ច។
សូមស្តាប់ការបកស្រាយរបស់លោកស្រី ព្រំសឿន សូលីណា៖
មុនការបោះឆ្នោតជុំទី២ បក្សកាន់អំណាចសង្គមនិយម និងបក្សសាធារណរដ្ឋស្តាំនិយមរបស់អតីតប្រធានាធិបតីសាកូហ្ស៊ី ប្រហែលនៅមិនទាន់បាត់ភ័យនៅឡើយទេ ក្រោយបក្សស្តាំនិយមជ្រុលរបស់លោកស្រី ឡឺពេន ទទួលជោគជ័យជុំទី១កន្លងមក ជាជោគជ័យថ្នាក់ជាតិ បង្ហាញពីការកើនឡើងឥតឈប់នៃប្រជាប្រិយភាពរបស់បក្សប្រឆាំងមួយនេះ ក្នុងរយៈពេលប៉ុន្មានឆ្នាំចុងក្រោយនេះ។
ក្នុងការបោះឆ្នោតរើសប្រធានតំបន់បារាំង កាលពីថ្ងៃអាទិត្យសប្តាហ៍មុន បក្សរណសិរ្សជាតិដែលគេស្គាល់ថា ជាបក្សស្តាំនិយមជ្រុល បានទទួលសំឡេង ២៨,៤២% នាំមុខបក្សសាធារណរដ្ឋរបស់អតីតប្រធានាធិបតី សាកូហ្ស៊ី។ បក្សលោក សាកូហ្ស៊ី បានសំឡេង ២៦,៨៥% ហើយបក្សសង្គមនិយមកាន់អំណាចបច្ចុប្បន្នទទួលបានសំឡេងកាន់តែទាបជាងនេះ គឺបាន២៣,៤៧%។ ក្នុងតំបន់សំខាន់ពីរ គឺតំបន់ Provence-Alpes-Côte d'Azur ភាគខាងត្បូង និងតំបន់ Nord-pas-de-Calais-Picardie ភាគខាងជើង ដែលលោកស្រីឡឺពេនឈរឈ្មោះផ្ទាល់ សម្លេងឆ្នោតបក្សប្រឆាំងរបស់លោកស្រី ឡឺពេន ឡើងខ្ពស់រហូតជាង៤០ភាគរយ។
គេគិតថា ប្រជាជនបារាំងបោះឆ្នោតអោយបក្សជ្រុលនិយមមួួយនេះ ក៏ដោយសារប្រជាជនបាត់ទំនុកចិត្តលើរដ្ឋាភិបាលលោកហូឡង់ដែរ។ រដ្ឋាភិបាលនៅតែមិនអាចដោះស្រាយបញ្ហាជនគ្មានការងារធ្វើក្នុងស្រុក។ ជីវភាពប្រជាជនកាន់តែលំបាកជាងមុន។ លើសពីនេះ បារាំងបែរជាត្រូវប្រឈមនឹងបញ្ហាអសន្តិសុខ ជាក់ស្តែង ភេរវកម្មថ្ងៃ ១៣ វិច្ឆិកាកន្លងទៅ នៅក្រុងប៉ារីស សម្លាប់ប្រជាជន១៣០នាក់។ ក្នុងអាណត្តិដឹកនាំមុនៗនេះ បារាំងមិនដែលជួបប្រទះបញ្ហាអសន្តិសុខរហូតស្លាប់ប្រជាជនដល់ខ្ទង់រយដូច្នេះទេ។
ក្រោយភេរវកម្មក្រុងប៉ារីសភ្លាម លោកហូឡង់ប្រកាសបិទព្រំដែនភ្លាម។ ប្រជាជនបារាំងអាចគិតថា ដើម្បីការពារសន្តិសុខជាតិ ប្រតិកម្មបិទព្រំដែននេះហាក់យឺតពេលទៅហើយ។ ផ្ទុយទៅវិញ បក្សស្តាំនិយមជ្រុលដែលឈ្នះឆ្នោតតំបន់ជុំទី១ កាលពីថ្ងៃអាទិត្យ មានគោលនយោបាយបន្តឹងព្រំដែន បន្តឹងលំហូចូលនៃជនអន្តោប្រវេសន៍ ជាប្រវត្តិសាស្ត្រទៅហើយ។ ម្ល៉ោះហើយ ពេលនេះ ប្រជាជនបារាំងអាចងាកមកចាប់អារម្មណ៍ ពីនយោបាយមួយនេះ ដើម្បីសន្តិសុខជាតិទៅថ្ងៃក្រោយវិញ។ យើងអាចថា អ្នកបោះឆ្នោតក៏ចង់ដាក់ទណ្ឌកម្មរដ្ឋាភិបាលលោកហូឡង់ដែរ ដែលអសមត្ថភាពចំពោះដំណោះស្រាយសន្តិសុខ និងសេដ្ឋកិច្ចជាតិ។
ប៉ុន្តែអ្វីដែលគួរកត់សំគាល់ដែរនោះគឺថា សូម្បីតែបក្សសាធារណរដ្ឋរបស់អតីតប្រធានាធិបតី សាកូហ្ស៊ី ដែលជាបក្សអភិរក្សនិយម និងជាបក្សតឹងតែងគ្រាន់បើចំពោះជនភៀសខ្លួន ក៏មិនអាចឈ្នះបក្សស្តាំនិយមជ្រុលរបស់លោកស្រីឡឺពេន ក្នុងការបោះឆ្នោតតំបន់ជុំទី១ដែរ។ សួរថា ហេតុអ្វីទៅ? ពេលបារាំងស្ថិតក្រោមការកាន់កាប់របស់លោកសាកូហ្ស៊ី បញ្ហាជនគ្មានការងារធ្វើ និងបញ្ហាសេដ្ឋកិច្ច ក៏មិនមានអ្វីប្រសើរជាងមុន។ ពលរដ្ឋបារាំងអាចគិតថា ទាំងបក្សឆ្វេងនិយម ទាំងបក្សស្តាំនិយម កន្លងមក សុទ្ធតែដោះស្រាយបញ្ហាជាតិមិនបានដូចគ្នា។ ប្រជាជនអាចគិតថា ទាល់តែមានបក្សខ្លាំងបែបជ្រុលនិយមដូចបក្សរណសិរ្សជាតិរបស់លោកស្រីឡឺពេនតែម្តង ទើបអាចកកូរកកាយការងារ ធ្វើអោយការងាររដ្ឋមានសណ្តាប់ធ្នាប់ និងមានប្រសិទ្ធភាពឡើងវិញបាន។ លើសពីនេះ បក្សសាធារណរដ្ឋរបស់លោកសាកូហ្ស៊ី ពេលនេះក៏បែកបាក់គ្នាទៀត ដូច្នេះ មិនអាចធ្វើអោយពលរដ្ឋបារាំងទុកចិត្តបក្សនេះដូចមុនទេ។
ជោគជ័យឆ្នោតតំបន់ កាលពីថ្ងៃអាទិត្យមុន ជាជោគជ័យប្រវត្តិសាស្ត្រសម្រាប់បក្សរណសិរ្សជាតិរបស់លោកស្រីឡឺពេន។ តាំងពីលោកស្រីម៉ារីន ឡឺពេន ឡើងបន្តតំណែងបក្សពីឳពុក ក្នុងឆ្នាំ២០១១មក បក្សនេះចេះតែឡើងប្រជាប្រិយភាពបន្តិចម្តងៗ និងទទួលសំឡេងឆ្នោតកាន់តែច្រើន តាំងពីការបោះឆ្នោតប្រធានាធិបតីឆ្នាំ២០១២ រហូតដល់ការបោះឆ្នោតឃុំសង្កាត់ រឺក្រុមប្រឹក្សាតំបន់ផ្សេងៗទៀត។ ក្រោមការដឹកនាំរបស់លោក ហ្សង់ ម៉ារី ឡឺពេន ជាឳពុក បក្សស្តាំជ្រុលមួយនេះ ត្រូវគេស្គាល់ថា ជាបក្សរើសអើងជនបរទេស រើសអើងប្រជាជនអន្តោប្រវេសន៍ និងមានទំនោរបែបណាស៊ីអាល្លឺម៉ង់ទៀតផង។ ក្រោយលោកស្រី ឡឺពេន ឡើងកាន់កាប់បក្សក្នុងឆ្នាំ២០១១មក លោកស្រីបានកែប្រែមុខមាត់បក្សឡើងវិញ ដោយហ៊ានរហូតដាក់ទណ្ឌកម្មបណ្តេញសកម្មជនបក្សដែលហ៊ានពោលពាក្យរើសអើងជនអន្តោប្រវេសន៍ទៀតផង។ យុទ្ធសាស្ត្រសុជីវធម៌ របស់លោកស្រី ឡឺពេនដើម្បីលើកស្ទួយមុខមាត់បក្ស ឆ្ពោះទៅរកការបោះឆ្នោតប្រធានាធិបតី ឆ្នាំ២០១៧ ចាប់ទទួលបានផ្លែផ្កាហើយពេលនេះ។
ប្រជាប្រិយភាពលោកស្រីកើនឡើង ក៏ដោយសារតែគេមើលឃើញថា លោកស្រីរងគ្រោះពីការវាយប្រហាររបស់សារព័ត៌មានខ្លះៗ ក្នុងពេលកន្លងមកដែរ។ មួយសប្តាហ៍មុនការបោះឆ្នោតជុំទី១ សារព័ត៌មានភាគខាងជើងមួយ បានចុះផ្សាយប្រឆាំងលោកស្រី ដោយដាក់ចំណងជើងថា ហេតុអ្វីជោគជ័យរបស់បក្សរណសិរ្សជាតិធ្វើអោយយើងបារម្ភ? រឿងនេះ អាចធ្វើអោយប្រជាជនបារាំងងាកមកអាណិតបក្សរណសិរ្សជាតិវិញក៏ថាបាន។ លោកស្រីឡឺពេនបរិហារថា ក្រុមប្រឹក្សាតំបន់បានជួយលុយ៩លានអឺរ៉ូដល់សារព័ត៌មានតំបន់នេះ ដើម្បីចុះផ្សាយប្រឆាំងបក្សលោកស្រី។ កន្លងមកដែរ ទូរទស្សន៍ជាតិបារាំង ប៉ុស្តិ៍លេខ២ធ្លាប់អញ្ជើញលោកស្រីក្នុងកម្មវិធីមួយ ដែលដំបូងឡើយ ជាកម្មវិធីដែលលោកស្រីឡឺពេនត្រូវជជែកជាមួយអ្នកនយោបាយ២នាក់។ តែក្រោយមក មានអ្នកនយោបាយបក្សផ្សេងៗច្រើននាក់ ក៏ប្រកាសថា នឹងមកតទល់ជាមួយលោកស្រីដែរ។ តួអង្គប្រឆាំងមានតែម្នាក់ តទល់មតិជាមួយមនុស្ស៥នាក់ បក្សផ្សេងៗអាចមិនពេញចិត្តនឹងវត្តមានបក្សប្រឆាំងមួយនេះ ក្នុងកញ្ចក់ទូរទស្សន៍ជាតិ ក៏ថាបាន។ កាលនោះ លោកស្រីឡឺពេន បានបដិសេធចូលរួមកម្មវិធីនោះវិញ។
ដោយឡែក ការស្ទង់មតិចុងក្រោយនេះ បង្ហាញថា សម្រាប់ការបោះឆ្នោតជុំទី២ ក្នុងតំបន់Nord-pas-dealais-Picardieភាគខាងជើង លោកស្រី ឡឺពេន ដែលទទួលសំឡេងឆ្នោតជាង៤០ភាគរយ ក្នុងជុំទី១ នឹងបរាជ័យ ប្រឈមនឹងលោកសាវ្យេ ប៊ែរត្រង់ ជាដៃគូប្រឆាំងមកពីបក្សស្តាំនិយមនោះ។ គេរំពឹងថា លោក ប៊ែរ ត្រង់អាចនឹងទទួលសំឡេងពីអ្នកបោះឆ្នោតគាំទ្របក្សកាន់អំណាចក្នុងជុំទី១។ លោកស្រីឡឺពេនប្រាប់ថា មិនជឿលើការស្ទង់មតិទាំងនេះទេ៕
© រក្សាសិទ្ធិដោយ thmeythmey.com