អន្តរជាតិ
ក្រុមដែស្ហអាចបោះពុម្ពលិខិតឆ្លងដែនសម្រាប់ក្រុមខ្លួនប្រើប្រាស់
× ក្រុមភេរវជនរដ្ឋឥស្លាមឬដែស្ហ(Daesh) ចាប់ផ្តើមចេញលិខិតឆ្លងដែនសម្រាប់ប្រជាជននិងកម្លាំងដែលស្ថិតក្រោមការគ្រប់គ្រងរបស់ខ្លួន។ របាយការណ៍ចារកម្មក្រុងវ៉ាស៊ីនតោនដែលចេញផ្សាយកាលពីថ្មីៗបានបង្ហាញថា ការចេញលិខិតឆ្លងដែនស៊ីរីក្លែងក្លាយជាគ្រោះថ្នាក់ថ្មីទៀតសម្រាប់អាមេរិកនិងរដ្ឋអឺរ៉ុបផ្សេងទៀត។ហើយលិខិតឆ្លងដែនមួយមានតម្លៃចាប់ពី២០០ដុល្លារដល់២០០០ដុល្លារឯណោះ។
របាយការណ៍ចារកម្មរបស់ក្រុមស៊ើបអង្កេតសន្តិសុខផ្ទៃក្នុងដែលមានកម្រាស់១៧ ទំព័រ ទើបចេញផ្សាយកាលពីសប្តាហ៍មុន បង្ហាញថាក្រុមភេរវជនរដ្ឋឥស្លាមនៅស៊ីរី និងអ៊ីរ៉ាក់ ឬក្រុមដែស្ហ មានលទ្ធភាពបោះពុម្ពលិខិតឆ្លងដែនស៊ីរីក្លែងក្លាយ តែអាចប្រើប្រាស់ជាផ្លូវការថែមទៀត។
ក្រុមដែស្ហទំនងបានផលិតនិងចេញលិខិតឆ្លងដែនខ្លះរួចហើយ សម្រាប់ឲ្យកងកម្លាំងរបស់ខ្លួនប្រើប្រាស់ ព្រោះកាលពីដើមឆ្នាំនេះ កងកម្លាំងដែស្ហបានដណ្តើមកាន់កាប់ទីក្រុង Deir ez-Zour ដែលមានការិយាល័យចេញលិខិតឆ្លងដែនស្ថិតនៅ។ ហើយម្យ៉ាង តាំងពីយូរមកហើយ ក្រុមនេះដណ្តើមបានការិយាល័យ លិខិតឆ្លងដែន ស្ថិតនៅក្នុងខេត្ត Raqqa ដែលបច្ចុប្បន្នជារដ្ឋធានីរបស់ក្រុមដែស្ហថែមទៀត។
មន្ត្រីការិយាល័យកណ្តាលទទួលបន្ទុកចារកម្មអាមេរិក James Comey បង្ហាញការព្រួយបារម្ភខ្លាំងផងដែរចំពោះ ការចេញលិខិតឆ្លងដែនរបស់ក្រុមភេរវជនទាំងនេះ។ វានឹងក្លាយជាបញ្ហាសន្តិសុខធំសម្រាប់សហរដ្ឋអាមេរិក ករណីក្រុមភេរវជននេះមានលទ្ធភាពចេញលិខិតឆ្លងដែនមែន។ នេះក៏ព្រោះកងកម្លាំងពួកគេ អាចប្រើប្រាស់លិខិតឆ្លងដែនស៊ីរីខុសច្បាប់នេះដើម្បីចេញទៅក្រៅប្រទេសបានយ៉ាងងាយ។
កន្លងមកគេបានឃើញលិខិតឆ្លងដែនក្លែងក្លាយស៊ីរីនេះ នៅក្រោយការវាយប្រហាររដ្ឋធានីប៉ារីសដែលបានសម្លាប់មនុស្សជាង ១០០ នាក់។ គេវាយតម្លៃថា ក្នុងចំណោមភេរវជននោះ មានអ្នកប្រើប្រាស់លិខិតឆ្លងដែនក្លែងក្លាយ ដែលអាចចេញដោយក្រុមភេរវជនខាងលើនេះ។ ប្រទេសមួយចំនួននៅអឺរ៉ុបដូចជាក្រិកជាដើមកន្លងមកព្រួយបារម្ភខ្លាំង ខ្លាចថាក្រុមសកម្មប្រយុទ្ធដែស្ហចូលមកទឹកដីអឺរ៉ុប នៅពេលរដ្ឋអឺរ៉ុបបើកទ្វារទទួលយកជនភៀសខ្លួនពីស៊ីរី ដោយការចុះឈ្មោះជនភៀសខ្លួនសម្អាងលើការត្រួតពិនិត្យលិខិតឆ្លងដែន។
របាយការណ៍ចារកម្មនេះ ក៏ព្រមានផងដែរថា ប្រសិនបើគ្មានការចាត់វិធានការតឹងរ៉ឹងដើម្បីបញ្ឈប់ការចេញលិខិតឆ្លងដែនក្លែងក្លាយនេះទេ ក្រុមភេរវជនអាចនឹងបន្តចេញលិខិតឆ្លងដែនពាសវាលពាសកាលសម្រាប់ក្រុមខ្លួន ឬជនជ្រុលនិយមទាំងឡាយនៅក្រៅតំបន់ទៀត។ ប៉ុន្តែមិនមានការបញ្ជាក់ថា វិធានការបែបណាគួរយកមកប្រើប្រាស់ដើម្បីទប់ស្កាត់ការលួចចេញលិខិតឆ្លងដែននេះទេ៕
© រក្សាសិទ្ធិដោយ thmeythmey.com