អន្តរជាតិ
លុបជើងហោះហើរមួយពីបាងកកទៅកោះសាមុយដោយសាររងការគំរាមបំផ្ទុះ
× ក្រុមហ៊ុនអាកាសចរណ៍ Bangkok Airways របស់ថៃ បានសម្រេចលុបជើងហោះហើរមួយក្នុងដំណើរពីក្រុងបាងកកទៅកោះសាមុយនាថ្ងៃសុក្រទី១១ ខែធ្នូ នេះ ដោយសារតែអ្នកដំណើរបរទេសម្នាក់បានគំរាមបំផ្ទុះគ្រាប់បែក។ នេះបើតាមការផ្សាយរបស់កាសែត Bangkok Post។
លោក Sirote Duangratana អគ្គនាយកអាកាសយានដ្ឋានអន្តរជាតិសុវណ្ណភូមិ បានបញ្ជាក់ថា ជើងហោះហើរ PG145 ត្រូវបានលុបចោល ដោយសារតែអ្នកដំណើរបរទេសពីរនាក់ឈ្លោះគ្នា ហើយម្នាក់គំរាមទៅម្នាក់ទៀតថានឹងបំផ្ទុះគ្រាប់បែកនៅលើយន្តហោះ។
តាមការផ្សាយរបស់ Bangkok Post យន្តហោះប្រភេទ Airbus A319 នោះ ផ្ទុកអ្នកដំណើរ៩៩នាក់ ដែលក្រោយមក ពួកគេត្រូវបានផ្ទេរទៅជើងហោះហើរមួយទៀត គឺ PG187 ។
ក្រោយការគំរាម អ្នកភ្នាក់ងារយន្តហោះបានធ្វើការត្រួតពិនិត្យវត្ថុធាតុនៅលើយន្តហោះ ប៉ុន្តែគេមិនឃើញមុខសញ្ញាអ្វីនោះឡើយ។ តាមច្បាប់ អ្នកដំណើរដែលបង្ករភាពតក់ស្លុតដល់អ្នកដទៃនោះ អាចត្រូវរងការពិន័យប្រមាណ២សែនបាត ឬជាប់ពន្ធនាគារ៥ឆ្នាំ៕
Tag:
បាងកក-កោះសាមុយ
គំរាមបំផ្ទុះយន្តហោះ
© រក្សាសិទ្ធិដោយ thmeythmey.com