ពីនេះ ពីនោះ
×![]()
ដោយ: ថ្មីៗ
ជីវិត គឺខ្លីណាស់! ធ្មេញបើកៗ មួយឆ្នាំ! ក្រូសៗ ដប់ឆ្នាំ! អញ្ចឹង តើមានដប់ឆ្នាំនេះ ប៉ុន្មានដងទៅ នៅក្នុងជីវិតរបស់អ្នក? ហើយថាតើ ក្នុងរយៈពេលដប់ឆ្នាំនេះ អ្នករស់នៅដោយសេចក្តីរីករាយ ឬទុក្ខសោក? ជាការពិតឥតប្រកែកបាន កម្រមានអ្នកណាជួបសុខ មួយរយភាគរយណាស់ គឺថា បើមិនពិបាកចិត្តរឿងនេះ គឺរឿងនោះហើយ។
ប៉ុន្តែ ពេលខ្លះ បើយើងបណ្តោយតាមការគិត របស់អ្នកដ៏ទៃ នោះអ្នកនឹងមានបញ្ហា ក្នុងជីវិតជាមិនខានឡើយ។ ម្យ៉ាងវិញទៀត ពេលខ្លះ ខ្លួនអ្នកផ្ទាល់ គឺដើមហេតុ និងជាមូលហេតុ ដែលធ្វើឲ្យខ្លួនឯង មិនសប្បាយចិត្ត ដូចជា ការសោកស្តាយរឿងអតីតកាល ការគិតទុទិដ្ឋិនិយម ឬការព្រួយបារម្ភអំពីអនាគតជាដើម។
យើងសុទ្ធតែចង់បានជីវិតរីករាយ និងមានអនាគតភ្លឺស្វាង ប៉ុន្តែ បើអ្នកមិនចេះគ្រប់គ្រងអារម្មណ៍ខ្លួនឯង ហើយចង់បានហួសហេតុពេក នោះអ្នកគ្មានថ្ងៃ មានក្តីសុខឡើយ។
ខាងក្រោមនេះ គឺជារឿងមួយចំនួន ដែលអ្នកមិនគួរទុកក្នុងចិត្តឡើយ ៖
ការស្ពាយកំហុស ជាប់ខ្លួនជានិច្ច
អតីតកាលបានកន្លងផុតទៅហើយ ដូច្នេះ ចាំបាច់អី គិតវាទៀត។ បើចង់គិត ត្រូវគិតថា ត្រូវធ្វើដូចម្តេច ទើបសាងឲ្យត្រូវវិញ ហើយយកបទពិសោធន៍អតីតកាលនោះ យកមកជួយអ្នក ដើម្បីឲ្យរឹងប៉ឹងវិញ។
ថវិការ
យើងទទួលស្គាល់ថា នរណា ក៏ត្រូវការលុយដែរ ប៉ុន្តែ ការច្រណែន ឬការចង់បានជ្រុល នឹងធ្វើឲ្យអ្នកស្ត្រេស និងមានសម្ពាធជានិច្ច។ ចូរធ្វើការតាមដំណើរ ហើយជឿយើងទៅ គ្មានអ្នកណាក្រទេ ប្រសិនបើព្យាយាមធ្វើការនោះ។
ប្រៀបធៀបខ្លួនឯង ទៅនឹងអ្នកដ៏ទៃ
ហេតុអ្វីគេកើតមកស្អាតម្លេះ? ហេតុអ្វីខ្ញុំទាបជាងគេ? ហេតុអ្វីគេមានលុយច្រើនម្លេះ? ហេតុអ្វីខ្ញុំមិនកើតមក ក្នុងត្រកូលអភិជន? ... សំណួរគ្មានបានការ សំណួរគ្មានចម្លើយច្បាស់លាស់ ... កុំសួរល្អជាង។ ការព្យាយាមប្រៀបធៀបខ្លួនអ្នក ទៅនឹងអ្នកដ៏ទៃ នឹងធ្វើឲ្យអ្នកបាក់ទឹកចិត្ត ហើយសម្លាប់អត្តសញ្ញាណខ្លួនប៉ុណ្ណោះ។ អ្នកត្រូវចង់ចាំថា គេល្អនោះ យើងល្អនេះ គេមានអានេះ យើងមានអានោះ។
កុំមានសត្រូវច្រើនពេក
ខន្តី ជាធម៌លេខ ១ របស់ព្រះពុទ្ធ។ ចងមិត្ត ប្រសើរជាង បង្កើតសត្រូវ៕
អត្ថបទ ៖ ឈឹម សៅភារ៉ា
ផ្តល់សិទ្ធិដោយ www.health.com.kh
© រក្សាសិទ្ធិដោយ thmeythmey.com
