កាលពីតូច ចាន់ វឌ្ឍនាកា តែងតែយកតារាងបាល់ទះជាកន្លែងទាត់បាល់

កីឡាជាតិ

ជាតិ

កាលពីតូច ចាន់ វឌ្ឍនាកា តែងតែយកតារាងបាល់ទះជាកន្លែងទាត់បាល់

15, Dec 2015 , 6:59 pm

រូបភាព

ដោយ: ទេព ពិទូរ្យ

លោក ចាន់ ចេស្តា ប្រធានមន្ទីរកសិកម្មខេត្តកំពត ដែលត្រូវជាឪពុកបង្កើតរបស់កីឡាករ ចាន់ វឌ្ឍនាកា បាននិយាយប្រាប់អ្នកសារព័ត៌មាននាអំឡុងនៃពិធីបុណ្យសមុទ្រថា កូនប្រុសរបស់លោកតែងតែយកតារាងបាល់ទះធ្វើជាកន្លែងទាត់បាល់។ ជាមួយគ្នានេះ លោកតែងតែប្រាប់កូនកុំឲ្យជាប់ពាក់ព័ន្ធនឹងល្បែងភ្នាល់ ពោលគឺផ្តោតតែលើការលេងជាលក្ខណៈអាជីពប៉ុណ្ណោះ។

លោក ចាន់ ចេស្តា បានអះអាងប្រាប់អ្នកសារព័ត៌មានថា ចាន់ វឌ្ឍនាកា ដែលជាកូនប្រុសរបស់ខ្លួន ចេះលេងបាល់តាំងពីតូចមកម្ល៉េះពោលតាំងពីអាយុ៤ ឬ៥ឆ្នាំ។ ប្រធានមន្ទីរកសិកម្មខេត្តកំពតរូបនេះ បានបញ្ជាក់ថា៖ «កាលណោះ ខ្ញុំមានតារាងបាល់ទះមួយនៅមុខផ្ទះ ប៉ុន្តែនៅពេលដែលវឌ្ឍនាកា ឃើញបាល់ទះ គេអត់យកបាល់នោះមកលេងនឹងដៃទេ តែគាត់យកបាល់នោះមកលេងនឹងជើងខុសពីអ្នកដទៃ»។

ជាមួយគ្នានេះផងដែរ លោក ចាន់ ចេស្តា បានគូសបញ្ជាក់ថា កាលពី ចាន់ វឌ្ឍនាកា មិនទាន់ចូលលេងក្នុងក្របខណ្ឌបាល់ទាត់កំពូល លោកតែងតែហាមកូនមិនអោយផ្តោតខ្លាំងលើការលេងបាល់ ដោយខ្លាចក្រែងមានគ្រោះថ្នាក់ និងការឈ្លោះប្រកែកគ្នា ហើយនិងការយកវាទៅធ្វើជាល្បែងភ្នាល់ដាក់លុយ។

មកដល់ពេលនេះ លោក ចាន់ ចេសា្ត នៅតែបន្តហាមប្រាមកូនកុំឲ្យយកខ្លួនទៅពាក់ព័ន្ធនឹងការប្រព្រឹត្តល្បែងស៊ីសង ដោយផ្តោតតែលើអាជីពរបស់ខ្លួនប៉ុណ្ណោះ។

បច្ចុប្បន្ន ចាន់ វឌ្ឍនាកា កំពុងបង្ហាញភាពលេចធ្លោខ្លាំងក្នុងវិស័យកីឡាបាល់ទាត់ ទាំងក្នុងជម្រើសជាតិ និងក្លិបអាជីព។ ដំណាក់កាលមួយទៀតដែលអាចកត់ចូលក្នុងកំណត់ត្រាប្រវត្តិសាស្ត្រកីឡាបាល់ទាត់កម្ពុជានោះ គឺវត្តមានរបស់ខ្សែប្រយុទ្ធវ័យ២១ឆ្នាំរូបនេះ នៅក្នុងកីឡាបាល់ទាត់ជប៉ុន ខណៈការចរចារវាងក្លិបពាក់ព័ន្ធកំពុងដំណើរការ។

ប្រសិនបើការចរចាបានជោគជ័យនោះ ចាន់ វឌ្ឍនាកា នឹងក្លាយជាកីឡាករទី១របស់កម្ពុជា ដែលបានបង្ហាញខ្លួននៅក្នុងក្របខណ្ឌកីឡាបាល់ទាត់ជប៉ុន បើទោះបីជាក្រោមលក្ខខណ្ឌខ្ចីជើងរយៈពេលខ្លី ឬក៏លេងនៅលីកលំដាប់ទី២ (J2 League) ក៏ដោយ។

វឌ្ឍនាកា ដែលមានដើមកំណើតនៅខេត្តកំពត គឺជាកីឡាករតែម្នាក់គត់របស់កម្ពុជា ដែលទទួលបានរង្វាន់លក្ខណៈឯកត្តជនបួនឆ្នាំជាប់ៗគ្នា បើគិតចាប់តាំងពីឆ្នាំ២០១២ មក។ នៅឆ្នាំ២០១២ កីឡាកររូបនេះ ត្រូវគណៈកម្មាធិការជាតិអូឡាំពិកកម្ពុជា (NOCC) ជ្រើសរើសសម្រាប់ពានរង្វាន់កីឡាករវ័យក្មេងឆ្នើមប្រចាំឆ្នាំរបស់កម្ពុជា នៅឆ្នាំ២០១៣ គេទទួលបានស្បែកជើងមាសនៃពានរង្វាន់សម្តេច ហ៊ុន សែន ហើយនៅឆ្នាំ២០១៤ កីឡាករនៃក្លិបបឹងកេតអង្គររូបនេះ ជាប់ជាកីឡាករឆ្នើមប្រចាំពានរង្វាន់មិត្តហ្វូនខេមបូឌានលីក៕