ជាតិ
នយោបាយជាតិ
×![]()
ដោយ: ថ្មីៗ
អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានអះអាងថា គណបក្សរបស់លោក បានកំណត់គោលដៅ ក្នុងការរៀបចំទូរទស្សន៍ព្រះអាទិត្យឲ្យបានរួចរាល់នៅក្នុងឆ្នាំ២០១៦ ខាងមុខនេះ។ ពេលនេះគណបក្សកំពុងតែរង់ចាំអាជ្ញាបណ្ណពីអាជ្ញាធរ ដើម្បីដំឡើងអង់តែន និងបន្តស្នើសុំហ្វ្រេកង់ពីក្រសួងព័ត៌មាន។
ការអះអាងរបស់ឯកឧត្តមសម រង្ស៊ី កន្លងមកដែលថា ទូរទស្សន៍ព្រះអាទិត្យរបស់គណបក្សសង្គ្រោះជាតិនឹងកើតឡើងចុងឆ្នាំ ២០១៥ នោះ មិនអាចទៅរួចនោះឡើយ។ អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានទទួលស្គាល់ថា គណបក្សសង្គ្រោះជាតិមិនអាចបង្កើតទាន់ឡើយនៅចុងឆ្នាំ ២០១៥ នេះ តែគណបក្សនេះ ប្តេជ្ញានឹងធ្វើឲ្យបានក្នុងឆ្នាំ ២០១៦ ខាងមុខ។
ក្រោយពីបានទិញដីមួយកន្លែងក្នុងរាជធានីភ្នំពេញ ដែលមានទំហំជាង១០០០ ម៉ែត្រក្រឡា គណបក្សសង្គ្រោះជាតិបានបន្តស្នើសុំអាជ្ញាបណ្ណពីអាជ្ញាធរ ដើម្បីដំឡើងបង្គោលអង់តែន។ តែរហូតមកដល់ពេលនេះ គណបក្សសង្គ្រោះជាតិមិនទាន់ទទួលបានការឆ្លើយតបពីអាជ្ញាធរនៅឡើយទេ ជុំវិញការស្នើសុំនេះ។
ថ្លែងប្រាប់សារព័ត៌មានថ្មីៗ លោកយ៉ែម បុញ្ញឫទ្ធិ បានលើកឡើងថា គណបក្សសង្គ្រោះជាតិ កំពុងរង់ចាំការអនុញ្ញាតដើម្បីដំឡើងអង់តែន។លោក បញ្ជាក់ដូច្នេះថា៖«គោលដៅរបស់យើង គឺយើងត្រូវរៀបចំឲ្យរួចរាល់ក្នុងឆ្នាំ២០១៦នេះ។ ពេលនេះយើងកំពុងតែរង់ចាំអនុញ្ញាតពីអាជ្ញាធរក្នុងការដំឡើងអង់តែន និងការស្នើសុំហ្វ្រេកង់ពីក្រសួង»។
អ្នកនាំពាក្យរូបនេះនៅតែបដិសេធមិនបញ្ជាក់ពីទីតាំង និងតម្លៃនៃការទិញដី នោះទេ។ លោកគ្រាន់តែលើកឡើងថា ព័ត៌មានជុំវិញតម្លៃ និងទីតាំង នឹងត្រូវបានផ្តល់ជូនលម្អិត ក្រោយពេលគណបក្សរៀបចំទូរទស្សន៍ចប់សព្វគ្រប់។
សូមបញ្ជាក់ថា គណបក្សសង្គ្រោះជាតិបានចាប់ផ្តើមប្រមូលថវិកាចាប់តាំងពីថ្ងៃទី២៥ ខែមិថុនា ឆ្នាំ២០១៥មកម្ល៉េះ។ រហូតមកដល់ពេលនេះ គណបក្សប្រមូលថវិកាបានប្រមាណជា៨០ម៉ឺនដុល្លារហើយ។ តាមគម្រោង គណបក្សត្រូវការថវិកាប្រមាណជា ១លានដុល្លារកន្លះ ទៅ៣លានដុល្លារ ដើម្បីដំណើរការទូរទស្សន៍របស់ខ្លួន៕
Tag:
ទូរទស្សន៍ព្រះអាទិត្យ
© រក្សាសិទ្ធិដោយ thmeythmey.com
