អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
កន្លងមកចិនបានបញ្ចប់គោលនយោបាយកូនតែមួយរបស់ខ្លួនជាផ្លូវការ ហើយអនុញ្ញាតឲ្យប្រជាជនចិនអាចមានកូន២នាក់ចាប់ពីឆ្នាំ២០១៦តទៅ ។ សមាជិកសភាចិនបានអនុម័តច្បាប់នេះ ដែលវាជាផ្នែកមួយនៃគោលនយោបាយបង្កើនកម្លាំងពលកម្មក្នុងប្រទេស ខណៈដែលចំនួនមនុស្សចាស់មានការកើនឡើងយ៉ាងខ្លាំងជាហេតុធ្វើឲ្យកំណើនសេដ្ឋកិច្ចមានការធ្លាក់ចុះក្នុងឆ្នាំកន្លងមក។ 
គណៈកម្មាធិការកណ្ដាលនៃសភាប្រជាជនចិននៅថ្ងៃទី២៧ ខែធ្នូ កន្លងមក បានអនុម័តច្បាប់ស្ដីប្រជាជននិងផែនការគ្រួសារ ដោយច្បាប់នេះនឹងអនុញ្ញាតឲ្យប្រជាជនចិនមានកូនពីរនាក់។ ហើយច្បាប់នេះទៀតសោត នឹងចូលជាធរមានចាប់ពីថ្ងៃទី១ ខែមករា ឆ្នាំ២០១៦ តទៅ ។ នេះមានន័យថា នយោបាយកូនតែមួយរបស់បក្សកុម្មុយនីស្តចិន បានមកដល់ទីបញ្ចប់ហើយ។
ការលុបចោលនយោបាយកូនមួយរបស់ចិននៅពេលនេះ ត្រូវបានគេមើលឃើញថា ជាជំហានក្នុងការជំរុញឲ្យមានកំណើនកម្លាំងពលកម្មឡើងវិញ ព្រោះចំនួននេះមានការធ្លាក់ចុះយ៉ាងខ្លាំង តែចំនួនមនុស្សចាស់បែរជាការកើនឡើងទៅវិញ។ ដូចឃើញស្រាប់ មនុស្សមានអាយុលើស៦០ឆ្នាំ មានដល់ទៅ៤០០លាននាក់ទៅហើយ ។ រឿងនេះធ្វើឲ្យរដ្ឋាភិបាលចិនឈឺក្បាលខ្លាំង ដោយសារតែមានបន្ទុកច្រើនចំពោះការថែទាំមនុស្សចាស់ ហើយចិនក៏កំពុងតែព្យាយាមជំរុញកំណើនសេដ្ឋកិច្ចរបស់ខ្លួនទៀត។
សូមរម្លឹកថា គោលនយោបាយកូនមួយដែលបានអនុវត្តតាំងពីទសវត្សវ៍១៩៧០នោះ បានអនុញ្ញាតឲ្យប្ដីប្រពន្ធជនជាតិចិនមានកូនតែមួយប៉ុណ្ណោះ ។ ហើយអស់រយៈពេលជាច្រើនឆ្នាំមកនេះ នយោបាយរឹតត្បិតនេះបានជំរុញឲ្យមានកំណើនសេដ្ឋកិច្ចយ៉ាងខ្លាំងក្លា ។ យ៉ាងណាក៏ដោយ ច្បាប់នេះបានបំបិទសេរីភាពប្រជាជនចិនយ៉ាងខ្លាំង ដោយសារតែមានការពិន័យធ្ងន់ធ្ងរដល់អ្នកដែលល្មើសនឹងនយោបាយនេះ។
អ្វីដែលគួរឲ្យតក់ស្លុតនោះ នយោបាយនេះបង្កឲ្យមានការរើសអើងក្នុងចំណោមប្ដីប្រពន្ធ ។ នេះក៏ដោយសារតែ ប្ដីប្រពន្ធខ្លះសម្រេចចិត្តរំលូតកូនស្រីចោល ពីព្រោះតែប្រពៃណីចិនដែលនិយមឲ្យតម្លៃតែលើកូនប្រុសជាងកូនស្រី ហើយរឿងនេះបានប៉ះពាល់ដល់អារម្មណ៍ប្រជាជនយ៉ាងខ្លាំង។
ជាលទ្ធផលនោះ ប្រជាជនចិនមានការកើនឡើងខ្លាំងរហូតដល់ជិត១.៥ពាន់លាននាក់ ដែលធ្វើឲ្យចិនក្លាយជាប្រទេសមានប្រជាជនច្រើនជាងគេលើពិភពលោក ។ ជាមួយគ្នានេះ កំណើនមនុស្សចាស់ក៏រហ័សដែរ ដែលប៉ះពាល់ខ្លាំងដល់កម្លាំងពលកម្មក្នុងប្រទេស ។
ដោយសារតែមានការព្រួយបារម្ភពីកង្វះពលកម្មនេះហើយ ទើបរដ្ឋាភិបាលចិនប្រកាសគោលនយោបាយមួយដែលអនុញ្ញាតឲ្យប្ដីប្រពន្ធជនជាតចិនមានកូនពីរនាក់កាលពីខែតុលាកន្លងទៅ ។ ហើយទើបតែពេលនេះ សភាចិនអនុម័តច្បាប់នេះជាផ្លូវការ និងវាចូលជាធរមានចាប់ពីថ្ងៃទី១ មករាតទៅដែរ៕
Tag:
ចិន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
