អន្តរជាតិ
នយោបាយអន្តរជាតិ
ប៉ាគីស្ថាននិងអាហ្វហ្កានីស្ថានត្រៀមចាប់ផ្តើមចរចាជាមួយក្រុមតាលីបង់វិញ
×![]()
ប៉ាគីស្ថាននិងអាហ្វហ្កានីស្ថានបានឯកភាពគា្នកាលពីថ្ងៃអាទិត្យ ទី ២៧ ខែធ្នូ ថានឹងជួបជជែកជាមួយភាគីអាមេរិកនិងចិននៅខែក្រោយ ដើម្បីឈានទៅចាប់ផ្តើមការចរចាសន្តិភាពឡើងវិញជាមួយក្រុមតាលីបង់។ ការសម្រេចបែបនេះកើតឡើងក្រោយពេលប្រមុខយោធាដ៏មានឥទ្ធិពលរបស់ប៉ាគីស្ថានទៅទស្សនកិច្ចនៅអាហ្វហ្កានីស្ថាន។
ប្រមុខយោធាប៉ាគីស្ថានលោក Raheel Sharif បានឯកភាពជាមួយមេដឹកនាំអាហ្វហ្កានីស្ថាន កាលពីថ្ងៃអាទិត្យទី ២៧ ខែធ្នូ ម្សិលមិញក្នុងពេលដែលលោកទៅទស្សនកិច្ចនៅអាហ្វហ្កានីស្ថានផងដែរថាប្រទេសទាំងពីរនឹងចាប់ផ្តើមការចរចាជាមួយក្រុមសកម្មប្រយុទ្ធតាលីបង់ឡើងវិញ។ ក្នុងជំនួបនេះគេឃើញមានវត្តមាន ប្រមុខរដ្ឋអាហ្វហ្កានីស្ថានលោក Ashraf Ghani និងនាយករដ្ឋមន្ត្រីលោក Abdullah Abdullah ផងដែរ។
មេទាហានប៉ាគីស្ថាននិងប្រធានាធិបតីអាហ្វហ្កានីស្ថានលោក Ashraf Ghani បានបញ្ជាក់ផងដែរថា អ្នកទាំងពីរ ត្រៀមជួបជាមួយភាគីអាមេរិក និងចិន នៅខែក្រោយ ដើម្បីផ្លាស់ប្តូរមតិយោបល់គ្នាជុំវិញការស្តារឡើងវិញនូវការចរចាសន្តិភាពជាមួយ ក្រុមតាលីបង់។ កន្លងមកកិច្ចចរចាសន្តិភាពត្រូវបានគេរៀបចំឡើងដែរ ហើយប៉ាគីស្ថានបានជួយជ្រោមជ្រែងដំណើរការចរចាដែរ។ ប៉ុន្តែនៅក្នុងខែកក្កដា កិច្ចចរចានេះបានជាប់គាំ នៅពេលដែលក្រុមតាលីបង់ប្រកាសថា មេដឹកនាំក្រុមខ្លួន Mullah Omar ស្លាប់បាត់បង់ជីវិត។
តាំងពីឡើងកាន់តំណែង លោក Ghani បានព្យាយាមជំរុញឲ្យមានការចរចាសន្តិភាព និងពង្រឹងទំនាក់ទំនងជាមួយមិត្តជិតខាង ប៉ាគីស្ថាននេះ ព្រោះប៉ាគីស្ថានជាខ្នងបង្អែកសំខាន់របស់ក្រុមតាលីបង់តាំងពីយូរមកហើយ។ មេដឹកនាំអាហ្វហ្កានីស្ថាននេះសង្ឃឹមថា ប៉ាគីស្ថាននឹងធ្វើជាស្ពានឲ្យមានការចចារសន្តិភាពរួមគ្នារវាងរដ្ឋាភិបាលក្រុងកាប៊ុល និងក្រុមសកម្មប្រយុទ្ធតាលីបង់។
ជុំវិញការសម្រេចឯកភាពគ្នាជាថ្មីនេះ ក្លាយជាសញ្ញាវិជ្ជមានមួយដែលមេដឹកនាំយោធាប៉ាគីស្ថានចាប់ផ្តើមចេញមុខគាំទ្រដំណើរការចរចារបស់អាហ្វហ្កានីស្ថានជាមួយក្រុមសកម្មប្រយុទ្ធតាលីបង់។ ការដោះស្រាយបញ្ហាអសន្តិសុខនៅក្នុងប្រទេសអាហ្វហ្កានីស្ថាននៅតែជាបញ្ហាស្មុគស្មាញ ហើយម្យ៉ាងកងកម្លាំងលោកខាងលិចនៅសល់តិចតួចប៉ុណ្ណោះដើម្បីជួយគាំទ្រកងកម្លាំងរដ្ឋាភិបាលក្រុងកាប៊ុលដើម្បីរក្សាសន្តិសុខ។ ហើយម្យ៉ាងទៀត វត្តមានក្រុមភេរវជនរដ្ឋឥស្លាមឬក្រុមដែស្ហ (Daesh) កំពុងក្លាយជាកង្វល់របស់សហគមន៍អន្តរជាតិជាពិសេសប្រទេសជិតខាងដូចជាឥណ្ឌាជាដើមដែរ។
សម្រាប់ឥណ្ឌា បញ្ហាអាហ្វហ្កានីស្ថានជាបញ្ហាសន្តិសុខស្នូល ដែលមិនអាចព្រងើយកន្តើយបានឡើយ។ ដូចដែលឃើញស្រាប់របបដឹកនាំឥណ្ឌាចាប់ផ្តើមលើកឡើងពីបញ្ហាអស្ថិរភាពនៅអាហ្វហ្កានីស្ថានក្នុងជំនួបជាមួយលោក វ្ល៉ាឌីមៀ ពូទីន ពេលលោកទៅទស្សនកិច្ចនៅក្នុងប្រទេសរុស្ស៊ី។
កាលពីថ្ងៃសុក្រថ្ងៃ ២៥ ខែធ្នូ នេះទៀត គេឃើញ ប្រមុខរដ្ឋាភិបាលឥណ្ឌាលោក នារិន្ទ្រា ម៉ូឌី អញ្ជើញមកទស្សនកិច្ចនៅប្រទេសអាហ្វហ្កានីស្ថានដើម្បីសម្ភោធអាគារសភាថ្មីដែលឥណ្ឌាសង់ជូន។ លោកបានបញ្ជាក់ច្បាស់ប្រាប់មេដឹកនាំអាហ្វហ្កានីស្ថានថា ឥណ្ឌានឹងជួយអាហ្វហ្កានីស្ថានដើម្បីដោះស្រាយបញ្ហាសន្តិសុខក្នុងប្រទេស ហើយលោកស្នើទៅបណ្តាប្រទេសជិតខាងទាំងប៉ាគីស្ថាននិងអ៊ីរ៉ង់ផងនោះឲ្យចូលរួមគាំទ្រការកសាងសន្តិភាពនៅអាហ្វហ្កានីស្ថានផងដែរ៕
Tag:
តាលីបង់
ប៉ាគីស្ថាន
អាហ្វហ្កានីស្ថាន
© រក្សាសិទ្ធិដោយ thmeythmey.com
