អន្តរជាតិ
ជំងឺអេបូឡាត្រូវបានកម្ចាត់ពីហ្គីណេ ក្រោយសម្លាប់មនុស្សជាង២៥០០នាក់
× ប្រទេសហ្គីណេបានក្លាយជាប្រទេសទី២ហើយ ដែលបានលុបបំបាត់ជំងឺអេបូឡាទាំងស្រុង ចេញពីប្រទេសខ្លួន ក្រោយជំងឺដ៏សាហាវនេះ បានសម្លាប់ប្រជាជនប្រមាណ២៥០០នាក់រួចមក ។ ប្រទេសដំបូងគេដែលបានកម្ចាត់ជំងឺនេះ គឺសៀរ៉ាឡេអូន ដែលបានសម្រេចជោគជ័យកាលពីខែវិច្ឆិកាកន្លងមក។
ក្រុមអាជ្ញាធរហ្គីណេ និងអង្គការសុខភាពពិភពលោក បានប្រកាសថា ជំងឺអេបូឡាត្រូវបានលុបបំបាត់ទាំងស្រុងចេញពីប្រទេសហើយ។ ការប្រកាសនេះបានធ្វើឡើង បន្ទាប់ពីមានយុទ្ធនាការប្រយុទ្ធប្រឆាំងនឹងជំងឺនេះអស់រយៈពេលជាច្រើនខែមកហើយនោះ។
ប្រជាជនហ្គីណេរស់នៅក្នុងរដ្ឋធានី Conakry បានប្រមូលផ្ដុំគ្នាដើម្បីសម្ដែងការអបអរចំពោះជោគជ័យនេះ ជាមួយអារម្មណ៍ចម្រុះគ្នា ។ នេះក៏ដោយសារតែ វាបានបង្កផលប៉ះពាល់យ៉ាងខ្លាំងដល់វិស័យអប់រំ និងសុខាភិបាលប្រទេសហ្គីណេ ។
ពិធីផ្លូវការមួយ នឹងធ្វើឡើងនៅថ្ងៃទី៣០ ខែធ្នូ ដើម្បីប្រកាសការលុបបំបាត់នេះជាស្ថាពរ ហើយមន្ត្រីរដ្ឋាភិបាល ព្រមទាំងដៃគូផ្ដល់ជំនួយទាំងអស់នឹងចូលរួមក្នុងពិធីនោះ ។ ជាមួយគ្នានោះដែរ ក៏នឹងមានការរម្លឹកដល់បុគ្គលិកសុខាភិបាលចំនួន១១៨នាក់ដែលលះបង់ជីវិតក្នុងប្រតិបត្តិការប្រឆាំងនឹងជំងឺអេបូឡា ។
បើតាមការផ្សាយរបស់សារព័ត៌មាន Al Jazeera ប្រទេសហ្គីណេមានជំងឺអេបូឡាដល់ទៅ៣,៨០០ ករណី ក្នុងចំណោមករណីទាំងអស់២៨,៦០០ ដែលបានកើតឡើងនាពេលកន្លង មក ។ ជាមួយគ្នានេះ ជំងឺអេបូឡាបានធ្វើឲ្យកុមារហ្គីណេប្រហែល៣,៨០០នាក់ កំព្រាឳពុកម្ដាយ និងមនុស្សច្រើនជាង២,៥០០នាក់បានស្លាប់។ ហើយបើគេគិតចំនួនសរុបវិញ អេបូឡា បានសម្លាប់មនុស្សដល់១១,៣០០នាក់នៅលើពិភពលោក ។
តាំងពីផ្ទុះករណីអេបូឡាមក អង្គការអន្តរជាតិដែលពាក់ព័ន្ធនឹងវិស័យសុខាភិបាលបានចេញប្រតិបត្តិការប្រយុទ្ធប្រឆាំងជំងឺនេះ ។ ក្នុងយុទ្ធនាការលុបបំបាត់អេបូឡា អ្នកជំងឺត្រូវបានកំណត់អត្តសញ្ញាណដោយឡែកពីគ្នា ហើយអ្នកដែលជិតស្និទ្ធអ្នកជំងឺក៏ត្រូវបានដាក់ក្រោមការត្រួតពិនិត្យដែរ ។ ចំណែកឯបុគ្គលិកសុខាភិបាលវិញ ត្រូវបានណែនាំឲ្យគោរពគោលការណ៍អនាម័យឲ្យខ្ជាប់ខ្ជួនដើម្បីចៀសវាងការចម្លងថ្មីទៀត ។
គួរបញ្ជាក់ផងដែរថា ប្រទេសមួយអាចប្រកាសលុបបំបាត់ជំងឺអេបូឡាទាំងស្រុងក្នុងរយៈពេល៤២ថ្ងៃ ក្រោយពីអ្នកជំងឺចុងក្រោយ ត្រូវបានព្យាបាលរួចរាល់ ។ កន្លងមកនេះ សៀរ៉ាឡេអូន បានប្រកាសមុនគេកាលពីខែវិច្ឆិកា ។ ចំណែកឯ ប្រទេសលីបេរីយ៉ា ជាប្រទេសចុងក្រោយគេ ដែលកំពុងតែព្យាយាមលុបបំបាត់ជំងឺនេះ ៕
© រក្សាសិទ្ធិដោយ thmeythmey.com