អន្តរជាតិ
រុស្ស៊ីផ្តល់កាំភ្លើង១ម៉ឺនដើមទៅអាហ្វហ្កានីស្ថាននិងជួយតាលីបង់កម្ចាត់ក្រុម ISIS
× នៅដើមឆ្នាំ២០១៦នេះ រុស្ស៊ីត្រៀមផ្តល់ជំនួយយោធាដល់អាហ្វហ្កានីស្ថានក្នុងនោះមានអាវុធ AK-47 ចំនួន១ម៉ឺនដើម និងគ្រាប់កាំភ្លើងជាច្រើនទៀតផងដែរ។ ការឧបត្ថម្ភអាវុធនេះ ស្ថិតក្រោមនយោបាយប្រឆាំងភេរវកម្ម ព្រោះរដ្ឋាភិបាលអាហ្វហ្កានីស្ថាន កំពុងច្បាំងកម្ចាត់ក្រុមភេរវជនរដ្ឋឥស្លាម ISIS ឬក្រុមដែស្ហ (Daesh) ដែលទើបសាងកម្លាំងនៅអាស៊ីកណ្តាលដែរ។ ក្រៅពីនេះ រុស្ស៊ីត្រៀមលក្ខណៈគាំទ្រការផ្សះផ្សាជាតិ រវាងក្រុមតាលីបង់ និងរដ្ឋាភិបាលក្រុងកាប៊ុលផងដែរ។ តែរុស្ស៊ីបានឆ្លៀតទិតៀន ការអន្តរាគមរបស់ក្រុងវ៉ាស៊ីនតោន និងណាតូអស់ជាច្រើនឆ្នាំ តែមិនអាចនាំសន្តិភាពមកកាន់ប្រទេសនេះបាន។
សូមស្តាប់ការបកស្រាយរបស់លោក សៅ ផលនិស្ស័យ៖
បញ្ហាអសន្តិសុខនៅអាហ្វហ្កានីស្ថាន ក្លាយជាកង្វល់ដ៏ធំរបស់ក្រុងម៉ូស្គូបច្ចុប្បន្ន ព្រោះកងទ័ពលោកខាងលិច ដែលនៅជួយកងកម្លាំងរដ្ឋាភិបាលអាហ្វហ្កានីស្ថាន នៅសល់ចំនួនតិចតួចប៉ុណ្ណោះ។ ក្រៅពីរងគ្រោះដោយជម្លោះប្រដាប់អាវុធ រវាងក្រុមតាលីបង់ និងរដ្ឋាភិបាលអាហ្វហ្កានីស្ថាន បញ្ហាធំមួយទៀតដែលក្រុងកាប៊ុលត្រូវដោះស្រាយ គឺចលនាក្រុមភេរវជនដែស្ហ។ បើក្រុមនេះពង្រីកអំណាចខ្លួន ទៅដល់ប្រទេសឯទៀត ដូចជាតួកមេនីស្ថាន កាហ្សាក់ស្ថានជាដើម រុស្ស៊ីនឹងរងទុក្ខធ្ងន់។ កងកម្លាំងនៅរដ្ឋាភិបាលអាហ្វហ្កានីស្ថានបច្ចុប្បន្ននៅខ្សោយណាស់ ហើយរដ្ឋាភិបាលមិនទាន់មានអំណាចពេញដៃពេញជើង ដើម្បីដោះស្រាយបញ្ហាក្នុងស្រុកបាននៅឡើយទេ។
១. រុស្ស៊ីរិះគន់លោកខាងលិច ដែលបង្កើតរឿងហើយដោះដៃចោលអាហ្វហ្កានីស្ថាន
កាលពីថ្ងៃចន្ទទី២៨ ខែធ្នូ បេសកជនពិសេសរបស់លោក វ្ល៉ាឌីមៀ ពូទីន ប្រចាំអាហ្វហ្កានីស្ថាន លោក Zamir Kabulov បានហៅការអន្តរាគមរបស់រដ្ឋាភិបាលអាមេរិក និងកងកម្លាំងណាតូនៅអាហ្វហ្កានីស្ថានតាំងពីឆ្នាំ២០០១ ថាជាបរជ័យមួយយ៉ាងអាម៉ាស់។ មន្ត្រីជំនិតរបស់ប្រមុខរដ្ឋរុស្ស៊ីនេះ បានពន្យល់ថាគោលបំណងលោកខាងលិច ក្នុងការជួយបង្កើតរបបដឹកនាំមួយ មានស្ថិរភាព និងដើរតាមគន្លងប្រជាធិតេយ្យ រួមទាំងនាំសន្តិភាពជូនប្រជាជនអាហ្វហ្កានីស្ថាននេះទៀត គ្មានផ្លែផ្កាអ្វីទាំងអស់។ មកទល់បច្ចុប្បន្ន ទោះទ័ពលោកខាងលិចនេះជិតដកចេញអស់ទៅហើយក្តី ក៏គេមិនទាន់ឃើញមានសញ្ញាវិជ្ជមានអ្វីឡើយ។ ជម្លោះប្រដាប់អាវុធនៅបន្ត ហើយរដ្ឋាភិបាលក្រុងកាប៊ុល មិនអាចប្រមូលផ្តុំអំណាចរបស់ខ្លួនបានដែរ ដើម្បីគ្រប់គ្រងប្រទេស។ អ្វីដែលគួរឲ្យអាម៉ាស់នោះ គឺក្រុមដែស្ហបានបង្កើតបណ្តាញរបស់ខ្លួន នៅលើទឹកដីអាហ្វហ្កានីស្ថានទៀត ទាំងដែលអាហ្វហ្កានីស្ថាន ប្រយុទ្ធមិនទាន់ឈ្នះក្រុមតាលីបង់ផងនោះ។
២.រុស្ស៊ីត្រៀមជួយអាវុធ និងគាំទ្រការផ្សះផ្សា
យ៉ាងណាក៏ដោយ រដ្ឋាភិបាលរុស្ស៊ីហាក់ត្រៀមលក្ខណៈជំនួសតំណែងលោកខាងលិច ដើម្បីទាញអាហ្វហ្កានីស្ថានឲ្យផុតពីគ្រោះមហន្តរាយ។ តែការកើនឡើងនៃក្រុមភេរវជននេះទេដែលបង្ខំឲ្យរុស្ស៊ីត្រូវងាកមកជួយជ្រោមជ្រែងរដ្ឋាភិបាលអាហ្វហ្កានីស្ថាន។ ឥឡូវរុស្ស៊ី អាហ្វហ្កានីស្ថាន និងក្រុមតាលីបង់ មានសត្រូវរួមគ្នា គឺក្រុមដែស្ហតែម្តង។ ក្រុមតាលីបង់ភ័យខ្លាំង នៅពេលដែលក្រុមដែស្ហកាន់តែកើនឡើងឥទ្ធិពល និងប្រមែរប្រមូលកម្លាំងដែលធ្លាប់ស្មោះស្ម័គ្រខ្លួន ទៅចូលរួមក្នុងចលនារបស់ខ្លួនទៀត។ កាលពីសប្តាហ៍មុន ក្រសួងការពារជាតិរុស្ស៊ី បានសម្រេចចែករំលែករបាយការណ៍ចារកម្ម ជាមួយក្រុមតាលីបង់ផងដែរ ដើម្បីកម្ចាត់ក្រុមរដ្ឋឥស្លាមរួមគ្នា។
រឿងដែលគេមិនដែលនឹកស្មាននោះ គឺរុស្ស៊ីចាប់ផ្តើមមើលឃើញសត្រូវចាស់ខ្លួន«ក្រុមតាលីបង់»នេះ ក្នុងផ្លូវវិជ្ជមានបែបនេះឡើយ។ បេសកជនពិសេសរបស់លោក ពូទីន ខាងលើបានអះអាងថាបច្ចុប្បន្ន រុស្ស៊ីមានគោលជំហរមួយ គាំទ្ររាល់គោលនយោបាយផ្សះផ្សាជាតិ របស់រដ្ឋាភិបាលក្រុងកាប៊ុល ដឹកនាំដោយលោកAshraf Ghani ហើយរុស្ស៊ីអាចបត់បែនបន្តិចរឿងការលុបទណ្ឌកម្មប្រឆាំងក្រុមតាលីបង់ដែរ។
តាមពិតទៅរុស្ស៊ី អាចពិចារណាដកទណ្ឌកម្មប្រឆាំងក្រុមតាលីបង់ ឲ្យតែវាអាចជួយដល់ការផ្សះផ្សាជាតិ និងមិនប៉ះពាល់ដល់ប្រយោជន៍ជាតិអាហ្វហ្កានីស្ថាន។ កញ្ចប់ទណ្ឌកម្មប្រឆាំងក្រុមតាលីបង់ ត្រូវបានដាក់ចេញដោយដំណោះស្រាយក្រុមប្រឹក្សាសន្តិសុខ កាលពីឆ្នាំ២០១១មកនោះ។
ក្រៅពីងាករកក្រុមតាលីបង់ រុស្ស៊ីបានប្រកាសត្រៀមជួយកាំភ្លើង AK- 47 ចំនួន១ម៉ឺនដើម រួមទាំងគ្រាប់ ដល់អាហ្វហ្កានីស្ថានផងដែរ។ សព្វាវុធទាំងនេះ នឹងត្រូវបញ្ជូនទៅឲ្យកងកម្លាំងប៉ូលីសអាហ្វហ្កានីស្ថានៅខែមករាឆ្នាំ ២០១៦ខាងមុខផង។ សព្វាវុធថ្ មីនឹងជួយឲ្យកងទ័ពអាហ្វហ្កានីស្ថានមានលទ្ធភាពប្រយុទ្ធខ្លាំងជាងមុន។ ចំណែករុស្ស៊ីក៏បន្តជជែកជាមួយអាជ្ញាធរអាហ្វហ្កានីស្ថានផងដែរ លើការបញ្ជូនឧទ្ធម្ភាគចក្រទៅអាហ្វហ្កានីស្ថានដែរ។ កាលពីខែវិច្ឆិកា រុស្ស៊ីបានផ្តល់ជំនួយរថយន្តធំៗ KAMAZ ចំនួន៥៧គ្រឿង ដែលមានតម្លៃ២.៥លានដុល្លារអាមេរិក ដល់អាហ្វហ្កានីស្ថានសម្រាប់សម្រួលដល់ការដឹកជញ្ជូនផងដែរ៕
© រក្សាសិទ្ធិដោយ thmeythmey.com