ជាតិ
«ប្រយ័ត្ន កម្ចាត់ ចម្រើន រក្សា» ធម្មទានឆ្នាំថ្មីរបស់សមាគមទ្រទ្រង់ការបោះពុម្ព និងអប់រំ
× នាពិធីអបអរខួបលើកទី៥របស់ខ្លួន សមាគមទ្រទ្រង់ការបោះពុម្ព និងអប់រំ (Printing and Education Support) ទើបចេញផ្សាយសៀវភៅអប់រំមួយដែលមានចំណងជើងថា «ឈ្វេងយល់ពីបាវចនានៃសមាគមទ្រទ្រង់ការបោះពុម្ព និងអប់រំ ប្រយ័ត្ន កម្ចាត់ ចម្រើន រក្សា» ។ សៀវភៅនេះ មានប្រមាណ២៦០ទំព័រ ដោយមាន៤ជំពូកធំៗ ដោយបង្ហាញពីនិយមន័យ ទស្សនៈព្រះពុទ្ធសាសនា និងការទូន្មាននានា ជុំវិញបាវចនា «ប្រយ័ត្ន កម្ចាត់ ចម្រើន រក្សា» (Restrain, Abandon, Cultivation, Observation) ។
«ឈ្វេងយល់ពីបាវចនានៃសមាគមទ្រទ្រង់ការបោះពុម្ព និងអប់រំ ប្រយ័ត្ន កម្ចាត់ ចម្រើន រក្សា» គឺជាធម្មទានឆ្នាំថ្មីរបស់សមាគមទ្រទ្រង់ការបោះពុម្ព និងអប់រំ (Printing and Education Support) ដែលត្រូវបានបង្កើតឡើងកាលពីថ្ងៃទី២៧ ខែមិថុនា ឆ្នាំ២០១០ និងត្រូវបានទទួលស្គាល់ដោយក្រសួងធម្មការ និងសាសនា កាលពីថ្ងៃទី១២ ខែវិច្ឆិកា ឆ្នាំ២០១០ ។
ព្រះលិខិតបញ្ញា ប៉ែន វិបុល នាយកប្រតិបត្តិសមាគមទ្រទ្រង់ការបោះពុម្ព និងអប់រំ បានមានសង្ឃដីកា ថា៖ «នេះជាស្នាដៃរូមរបស់សមាជិកសមាគមទ្រទ្រង់ការបោះពុម្ព និងអប់រំ ក្រោមការសម្រិតសម្រាំងអស់រយៈពេលប្រមាណ៤ខែ និងសៀវភៅទី៨ផងដែររបស់សមាគម » ។
«ប្រយ័ត្ន កម្ចាត់ ចម្រើន រក្សា» (Restrain, Abandon, Cultivation, Observation) គឺជាបាតគ្រឹះនៃព្រះពុទ្ធសាសនាដឹកនាំមនុស្សឲ្យប្រព្រឹត្តអំពើជាកុសល ដោយមានធម៌ជាប្រធាន ជាប្រមុខ។ សៀវភៅនេះ មានការចូលរួមពីសមាជិកគ្រប់ផ្នែករួមមាន ផ្នែកអត្ថន័យ អក្ខរាវិរុទ្ធ រចនាបថ បោះពុម្ព និងផ្សព្វផ្សាយ។
សៀវភៅនេះ បានដកស្រង់យកគំនិត និងទស្សនៈរបស់អ្នកប្រាជ្ញខ្មែរ និងបរទេស ជាពិសេសការបញ្ចូលធម្មសង្គហរបស់សម្តេច ហួត តាត បណ្ឌិត ឈឹម ទូច ព្រះធម្មវិបស្សនា សំ ប៊ុន ធឿន និងលោកគ្រូ អគ្គបណ្ឌិត ធម្មាចារ្យ ប៊ុត-សាវង្ស ជាដើម។
ទោះបីជាសៀវភៅនេះ បង្កប់នូវខ្លឹមសារជ្រាលជ្រៅក៏ដោយ ប៉ុន្តែពាក្យពេចន៍ដែលសរសេរឡើង ផ្តល់ភាពងាយស្រួលមនុស្សគ្រប់វ័យ។ ព្រះមហា ប៉ែន វិបុល បានមានសង្ឃដីកាបញ្ជាក់ថា៖ «យើងខិតខំសម្រិតសម្រាំងពាក្យពេចន៍ និងកំណាព្យ ដែលអាចឲ្យកុមារ យុវវ័យ និងមនុស្សចាស់ អានបានទាំងអស់គ្នា» ។
ការចូលរួមរបស់សប្បុរសជន ជាចំណែកដ៏សំខាន់ក្នុងការបោះពុម្ព និងផ្សព្វផ្សាយសៀវភៅ «ឈ្វេងយល់ពីបាវចនានៃសមាគមទ្រទ្រង់ការបោះពុម្ព និងអប់រំ ប្រយ័ត្ន កម្ចាត់ ចម្រើន រក្សា» ។ សម្រាប់ព័ត៌មាននានាស្តីពីសៀវភៅ ក៏ដូចជាសមាគមទ្រទ្រង់ការបោះពុម្ព និងអប់រំ សូមទាក់ទងទៅកាន់ កុដិគ្រូសូត្រស្តាំ វត្តបទុមវតី តាមអ៊ីម៉ែល [email protected] និងចូលទៅកាន់គេហទំព័រ www.pesa.org.kh ៕
Tag:
ពុទ្ធសាសនា
សៀវភៅ
ធម្មទាន
© រក្សាសិទ្ធិដោយ thmeythmey.com