ជាតិ
សង្គមជាតិ
នាយករដ្ឋមន្ត្រីសម្រេចឲ្យនិស្សិតពេទ្យបង់ថ្លៃ ១សែនរៀលសម្រាប់ការប្រឡងថ្នាក់ជាតិ
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានសម្រចឲ្យនិស្សិតពេទ្យបង់ថ្លៃ ១សែនរៀល ស្មើនឹង ២៥ដុល្លារអាមេរិក សម្រាប់ការប្រឡងចេញថ្នាក់ជាតិវិស័យសុខាភិបាល បន្ទាប់ពីសម្តេចបានទទួលសំណើសុំការបញ្ចុះតម្លៃរបស់យុវសិស្សម្នាក់ឈ្មោះ Darapiseth Sokha តាមរយៈទំព័រហ្វេសប៊ុក នៅថ្ងៃទី២២ មករានេះ។
បើយោងតាមការសរសេរលើទំព័រហេ្វសប៊ុកនាយករដ្ឋមន្ត្រី យុវសិស្សម្នាក់ប្រើប្រាស់គណនីហ្វេសប៊ុកឈ្មោះ Darapiseth Sokha បានផ្ញើសារជូនសម្តេចតាម Facebook សុំបញ្ចុះតម្លៃសម្រាប់ការប្រឡងចេញថ្នាក់ជាតិ សម្រាប់វិស័យសុខាភិបាល ដែលតម្រូវឲ្យបង់ថវិកា ៥សែនរៀល។ ក្រោយពីទទួលសារនោះ សម្តេចបានបញ្ជាក់ថា សម្តេចបានយល់កាន់តែច្បាស់ពីស្ថានភាពសិក្សា និងការរស់នៅរបស់និស្សិតខ្មែរ។
នាយករដ្ឋមន្ត្រីបានបញ្ជាក់លើទំព័រហ្វេសប៊ុកយ៉ាងដូច្នេះថា៖«ក្រោយពីខ្ញុំបានពិភាក្សាជាមួយរដ្ឋមន្ត្រីក្រសួងសុខាភិបាលហើយនៅថ្ងៃនេះ គឺខ្ញុំបានសម្រេចបញ្ចុះតម្លៃជូននិស្សិត នៅត្រឹម ១០០,០០០ រៀល។ ខ្ញុំសង្ឃឹមថានិស្សិតចំនួន ១៤៣៣ នាក់ នឹងបានធូរស្រាលមួយកម្រិតធំចំពោះការបញ្ចុះតម្លៃខាងលើនេះ ហើយនឹងបាននៅសល់ថវិកាមួយចំនួន សម្រាប់យកទៅដោះស្រាយលើជីវភាពរស់នៅ អោយបានប្រសើរឡើង»។
ជាងនេះទៀត សម្តេចក៏បានកោតសសើរលោក ម៉ម ប៊ុនហេង រដ្ឋមន្ត្រីក្រសួងសុខាភិបាល ចំពោះការយកចិត្តទុកដាក់ដោះស្រាយសំណូមពររបស់និស្សិត តាមរយៈការចូលពិនិត្យមើលការមតិលើទំព័រ Facebook របស់សម្តេចផងដែរ។
គួររម្លឹកផងដែរ កន្លងមក និស្សិតពេទ្យមួយចំនួន បានទាមទារសុំការបញ្ចុះតម្លៃការប្រឡងចេញថ្នាក់ជាតិក្នុងវិស័យសុខាភិបាលពីតម្លៃ ១២៥ដុល្លារ មកត្រឹម ៧៥ដុល្លារអាមេរិក ប៉ុន្តែពួកគេពុំទទួលបានការឆ្លើយតបជាវិជ្ជមានពីគណៈកម្មាធិការប្រឡងថ្នាក់ជាតិសម្រាប់វិស័យសុខាភិបាលទេ។ កាលថ្ងៃទី៩ ខែមករា ឆ្នាំ២០១៥ គណៈកម្មាធិការប្រឡងថ្នាក់ជាតិ នៃទីស្តីការគណៈរដ្ឋមន្ត្រី បានចេញលិខិតបញ្ជាក់ថា គណៈកម្មាធិការនៅតែរក្សាតម្លៃសម្រាប់ការបង់ថ្លៃសិទ្ធិប្រឡងថ្នាក់ជាតិចំនួន ២៥ដុល្លារ សម្រាប់ផ្នែកទ្រឹស្តី និង ១០០ដុល្លារ សម្រាប់ផ្នែកជំនាញគ្លីនិក៕
Tag:
សម្តេច ហ៊ុន សែន
ពេទ្យ
© រក្សាសិទ្ធិដោយ thmeythmey.com