ភ្នំពេញ៖ នេះគឺជារឿងខ្លីប្រឌិតលាយឡំនឹងការពិតកើតឡើងនៅក្នុងសង្គមខ្មែរនាពេលបច្ចុប្បន្ននេះ។ នៅក្នុងសង្គមខ្មែរ អ្នកស្មោះត្រង់មួយចំនួនត្អូញត្អែរថា ពួកគេពិបាករស់ ក៏ព្រោះតែភាពស្មោះត្រង់។ ស្មោះត្រង់អត់ប្រាក់ អត់ឋានៈ ត្រូវបានគេមើលងាយ។ ខាងក្រោមនេះ គឺជារឿងខ្លីមួយដែលឆ្លុះបញ្ចាំងពីការពិតមួយផ្នែកនៃសង្គមខ្មែរនាពេលបច្ចុប្បន្ននេះ។
សារុន អាយុជាង៤០ឆ្នាំ ជាអភិបាលខណ្ឌថ្មីដែលរាជរដ្ឋាភិបាលទើបនឹងបង្កើតថ្មី។ ដើម្បីរៀបចំខណ្ឌឲ្យបានល្អ សារុន បានហៅមន្ត្រីពាក់ព័ន្ធមក ប្រជុំជាប្រចាំក្នុងការរចនា ឬធ្វើគម្រោង ឬប្លង់សម្រាប់ខណ្ឌថ្មីមួយនេះ។ បីខែក្រោយមក សារុន ត្រូវបានចាប់ខ្លួនដោយអង្គភាពប្រឆាំងអំពើពុករលួយ ពីបទប្រព្រឹត្តអំពើពុករលួយ។ នៅពេលចាប់ខ្លួន ប្រជាពលរដ្ឋមានការភ្ញាក់ផ្អើលជាខ្លាំង ព្រោះគេគិតថា លោក សារុន ធ្វើអ្វីៗក៏ដើម្បីឲ្យខណ្ឌល្អដែរ តែដឹងអីពេលនេះ ប្រព្រឹត្តអំពើពុករលួយសោះ។ លោក សារុន ត្រូវបានគេដកហូតមុខតំណែងជាអភិបាលខណ្ឌភ្លាមៗ។
នៅចំពោះមុខចៅក្រមស៊ើបសួរ លោក សារុន បានបដិសេធថា លោកមិនបានធ្វើអំពើថោកទាប ដូចការចោទប្រកាន់ទេ ប៉ុន្តែ អ្វីដែលលោកធ្វើ គឺដើម្បីឲ្យខណ្ឌរបស់លោក មានសណ្តាប់ធ្នាប់ មានរបៀបរៀបរយ និង ស្អាតស្អំជាងគេប៉ុណ្ណោះ។
លោក សារុន ប្រាប់ចៅក្រមថា លោកមិនបានដឹងថា គេចាប់ខ្លួនលោកដោយសារអ្វីទេ ហើយបានស្នើសុំ ទៅចៅក្រមឲ្យលោកបាននៅក្រៅឃុំ តែលោកចៅក្រម មិនអនុញ្ញាត ហើយបានបញ្ជូន លោកសារុនទៅឃុំខ្លួនបណ្តោះអាសន្ន ដើម្បីរង់ចាំការកាត់ទោស។
បីខែក្រោយមកទៀតនៅក្នុងសវនាការ ដែលមានអ្នកកាសែតចូល រួមផង លោក សារុន បានប្រាប់ទៅចៅក្រមជំនុំជម្រះថា លោកពិតជា មិនបានប្រព្រឹត្តអំពើពុករលួយ ដូចការចោទប្រកាន់នោះទេ។ លោកពិតជាស្អាតស្អំ ហើយបើលោកពិតជាបានប្រព្រឹត្តដូចគេចោទប្រកាន់មែននោះ លោកស្នើឲ្យតុលាការ ដាក់គុកលោកអស់មួយជីវិត ហើយរឹបអូសទ្រព្យសម្បត្តិ លោកទាំងអស់ចុះ។ សាក្សីជានគរបាលខណ្ឌ អាវុធហត្ថខណ្ឌ និងមន្ត្រី សាធារណៈខណ្ឌ ក៏លើកឡើង ដូចលោក សារុន ដែរថា លោកសារុនស្អាតស្អំ។ ចៅក្រមបានសូត្រពីកំហុសរបស់លោក សារុន ចំពោះការសុំបើកភោជនីយដ្ឋានរបស់ស្ត្រីម្នាក់ ដែលជាសាច់ញាតិរបស់អ្នកមានអំណាច កំពូលមួយរូប។ នៅពេលចៅក្រមបង្ហើបពីកំហុសនោះ ទើបលោក សារុន ដឹងថា នោះហើយគឺជាកំហុសរបស់លោក ព្រោះលោកមិនព្រមទទួលយកការសូកប៉ាន់របស់គេ។
លោក សារុន ពន្យល់ថា ស្ត្រីនោះបានមកសុំគាត់ដើម្បីបើក ភោជនីយដ្ឋានមួយ។ គាត់ថា គាត់មិនបានរារាំងទេ ព្រោះជាសិទ្ធិរបស់ពលរដ្ឋ ក្នុងការធ្វើអាជីវកម្ម ប៉ុន្តែ លោកបានសួរទៅស្ត្រីវិញថា តើកន្លែង ចង់បើកភោជនីយដ្ឋាននោះ មានទីតាំងសម្រាប់ចតយានយន្តទេ? តើវាមានផាសុកភាពសម្រាប់អ្នកចូលហូបចុកទេ? ចំពោះអាហារ ដែលផ្តល់ឲ្យអតិថិជន នោះ ធានាថា មិនប៉ះពាល់ដល់សុខភាពអ្នកហូបទេ?។ និយាយឲ្យចំ តើម្ចាស់ភោជនីយដ្ឋានមានការទទួលខុសត្រូវប៉ុណ្ណាដែរ?។
ម្ចាស់ភោជនីយដ្ឋានបានប្រាប់ថា មិនបញ្ហាទេ ចំពោះសុវត្ថិភាពចំណីអាហារ ប៉ុន្តែ ទីតាំងចតយានយន្តពិតជាគ្មានទូលំទូលាយទេ។ លោក សារុន ប្រាប់វិញថា បើអ៊ីចឹងមិន អនុញ្ញាតឲ្យបើកទេ ព្រោះបច្ចុប្បន្នតាមដងផ្លូវត្រូវកកស្ទះចរាចរណ៍ គឺដោយសារភោជនីយដ្ឋានមួយចំនួន បណ្តោយឲ្យគេចតយានយន្តផ្តេសផ្តាសពាសវាលពាសកាល គ្មានសណ្តាប់ធ្នាប់នេះហើយ។ លោកសារុនប្រាប់លោកចៅក្រមទៀតថា បន្ទាប់មកស្ត្រីនេះបានយកស្រីក្មេងមកឲ្យលោក ដើម្បីជាថ្នូរបើកភោជនីយដ្ឋានេះដដែល តែលោកនៅតែមិនអនុញ្ញាត។ លោកថា ក្រោយទៀត ស្ត្រីនេះយកប្រាប់រាប់ម៉ឺនដុល្លារឲ្យលោក ក៏លោកនៅតែមិនព្រមហើយលោកស្នើទៅស្ត្រីនេះវិញ តែមួយគត់ គឺត្រូវមានទីកន្លែងចតយានយន្តឲ្យបានត្រឹមត្រូវ ហើយធានាចំពោះមុខច្បាប់ថា ភោជនីយដ្ឋានមួយនេះ នឹងមិនធ្វើឲ្យកកស្ទះចរាចរ ដល់អ្នកធ្វើដំណើរឆ្លងកាត់ទីនេះនោះទេ។ សំណើនេះ ធ្វើឲ្យស្ត្រីនេះខឹង ហើយក៏ចាកចេញទៅ រំលេងបានប៉ុន្មានថ្ងៃលោកក៏ត្រូវគេចាប់ខ្លួនទៅ។ លោក សារុន ពន្យល់ថា អ្នកណាក៏គេស្គាល់ស្ត្រីនេះដែរ ថាជាអ្នកណា?។
ក្រោយពីពិចារណាយ៉ាងហ្មត់ចត់ តុលាការ ក៏បានសម្រេច ដោះលែងលោក សារុន ឲ្យរួចខ្លួន ប៉ុន្តែ លោក សារុន បានបាត់បង់ការងាររបស់លោក។ ចំណែកចៅក្រមរូបនេះ ក្រោយពីកាត់ក្តីឲ្យលោក សារុន រួចខ្លួន និងសម្រេចឲ្យរដ្ឋសងជំងឺចិត្តលោក សារុន រួចមក លោកក៏ត្រូវបានគេ ដកហូតតំណែង ពីចៅក្រមសាលាដំបូងភ្នំពេញទៅ ជាចៅក្រមសាលាដំបូងខេត្តវិញដែរ។
ដោយ សំរែ