ពីនេះ ពីនោះ
សង្គមបំពុលយុវជន ជាក្ដីបារម្ភសម្រាប់អនាគតជាតិ
× សង្គមមានការផ្លាស់ប្ដូរ មូលហេតុមកពីតម្រូវការសេដ្ឋកិច្ចរបស់មនុស្ស ការអភិវឌ្ឍ ការរីកចម្រើនផ្នែកវិទ្យាសាស្ត្រ ការវិវត្តនៃនយោបាយដឹកនាំប្រទេសលើគ្រប់វិស័យ មានការប្រែប្រួល។ កត្តានេះ យើងអាចនិយាយបានថា សម័យកាលផ្លាស់ប្ដូរ សង្គមប្រែប្រួល ចំណែកផ្នត់គំនិត និងអំណាចនៃការគិតរបស់មនុស្សក៏ចាំបាច់ត្រូវតែវិវត្តទៅមុខ។ រីឯ យុវជនត្រូវបានគេឲ្យតម្លៃថា ជាសសរទ្រូងនៃប្រទេសជាតិ នោះក៏មានន័យថា យុវជនត្រូវតែខ្លាំង។
ប្រទេសល្បីល្បាញបំផុត សម្បូរធនធានមនុស្ស មានអ្នកចេះដឹងរាប់មិនអស់ មានបណ្ឌិត មានអ្នកប្រាជ្ញា មានទស្សនវិទូដែលមានគំនិតប្លែកៗ ថ្មីៗដើម្បីជាទ្រឹស្ដីនាំទៅរកការប្រតិបត្តិជាក់ស្ដែង។ ផ្ទុយទៅវិញ ប្រទេស នឹងធ្លាក់ចុះខ្សោយ ព្រោះតែមនុស្សជំនាន់ក្រោយមិនសម្បូរអ្នកមានសមត្ថភាព។
នៅអ៊ឺរ៉ុប ប្រទេសនៅអាស៊ីមួយចំនួន នៅអាមេរិក មានការរីកចម្រើនលូតលាស់ខ្លាំងក្លាទាំងសេដ្ឋកិច្ច ទាំងវិទ្យាសាស្ត្រ ទាំងនយោបាយគ្រប់គ្រងប្រទេស ទាំងបណ្ឌិត អ្នកប្រាជ្ញ ទស្សនវិទូ សេដ្ឋវិទូ សង្គមវិទូ ចិត្តវិទូ គរុវិទូ អ្នកវិទ្យាសាស្ត្រ សម្បូរឥតខ្វះ។ រីឯយុវជនរបស់បណ្ដាប្រទេសទាំងនេះ ពីមួយជំនាន់ទៅមួយជំនាន់ សមត្ថភាពចេះតែវិវត្តកាន់តែខ្លាំងឡើងៗ ដោយការខិតខំប្រឹងប្រែងទាំងរដ្ឋ ទាំងរាស្ត្រ ទាំងយុវជនដើម្បីកសាងសង្គមរបស់គេ។
បរិបទសង្គមកម្ពុជា ពីមួយជំនាន់ទៅមួយជំនាន់ ចំនួននៃអ្នកចេះដឹងមានការកើនឡើង ហើយនោះគឺជាក្ដីសង្ឃឹមរបស់ជាតិ។ ប៉ុន្តែកម្ពុជា ក៏សម្បូរ កម្លាំងយុវជនដែលខ្វះគុណភាព ចូលចិត្តបន្ទោសរដ្ឋ បន្ទោសសង្គម មិនប្រឹងប្រែង បណ្ដែតបណ្ដោយតាមធម្មជាតិ អសកម្មក្នុងការគិតពិចារណា អសកម្មក្នុងការសិក្សា អសកម្មក្នុងការសិក្សាបណ្ដុះពុទ្ធិ ប្រាជ្ញាសម្រាប់ខ្លួនឯង។
យុវជនមួយចំនួនធំចូលចិត្តបណ្ដែតបណ្ដោយអារម្មណ៍តាមសង្គម មានស្នេហាទាំងវ័យក្មេង គេចសាលា សេពគ្រឿងញៀន ហ្គេម ស្រា ល្បែង និងការលម្អកាយបង្ហាញខ្លួនតាមឃ្លឹបកំសាន្ត ជាជាងចូលសាលាស្រាវជ្រាវ ឬធ្វើការងារដែលជាកិច្ចការមានប្រយោជន៍សម្រាប់ជាតិ សម្រាប់ខ្លួនឯង។
ជារួមដើម្បីឲ្យប្រទេសខ្លាំងបានលុះត្រាណា កម្លាំងកសាងជាតិពីមួយជំនាន់ទៅមួយជំនាន់ ត្រូវតែអភិវឌ្ឍន៍ខ្លួន ឲ្យខ្លាំងជាងមនុស្សជំនាន់ចាស់។ យុវជនសម័យថ្មីត្រូវតែខ្លាំង គឺខ្លាំងទាំងគំនិតវិទ្យាសាស្ត្រ គំនិតដឹកនាំគ្រប់គ្រងប្រទេស គំនិតអភិវឌ្ឍន៍ មានផែនការយុទ្ធសាស្ត្រត្រឹមត្រូវ ច្បាស់លាស់ ហើយថ្មីប្លែកដែលអាចជួយស្រោចស្រង់ជាតិ។ គេអាចនិយាយថា សង្គមកំពុងបំពុលយុវជន តែបើយុវជនមិនទៅពុលជាមួយ ភាពទាក់ទាញរបស់សង្គម ក៏ខ្លួនមិនអាចទៅវង្វេងជាមួយសង្គមគ្មានប្រយោជន៍ មកគិតសកម្មភាពជាប្រយោជន៍វិញ។ ក្នុងនោះយុវជន មិនត្រូវមានតែវោហារក្នុងការរិះគន់ តែគ្មានសមត្ថភាពផ្ទាល់ខ្លួន ដែលសង្គមមិនអាចយកប្រើដើម្បីកសាងជាតិបាន៕
© រក្សាសិទ្ធិដោយ thmeythmey.com