ជនជាតិដើមភាគតិច សុំជួបសម្តេច ហ៊ុន សែន ដើម្បីឲ្យជួយដោះស្រាយបញ្ហាដីធ្លី

ជាតិ

ជនជាតិដើមភាគតិច សុំជួបសម្តេច ហ៊ុន សែន ដើម្បីឲ្យជួយដោះស្រាយបញ្ហាដីធ្លី

15, Mar 2016 , 6:20 pm

រូបភាព

ដោយ: ម៉ៅ សុផា

ប្រជាពលរដ្ឋជនជាតិដើមភាគតិច ស្នើសុំជួបប្រមុខរដ្ឋាភិបាលកម្ពុជាដោយផ្ទាល់ ដើម្បីបង្ហាញពីទុក្ខកង្វល់របស់ខ្លួនជុំវិញការរំលោភបំពានដីធ្លីពីសំណាក់ក្រុមហ៊ុន។ ពួកគេនឹងដាក់លិខិតទៅកាន់លោកនាយករដ្ឋមន្ត្រី នៅថ្ងៃទី១៦ ខែមីនា ។

តំណាងប្រជាពលរដ្ឋជនជាតិភាគតិច នឹងប្រមូលផ្តុំគ្នានៅមុខគេហដ្ឋានរបស់សម្តេច ហ៊ុន សែន ក្បែរវិមានឯករាជ្យ ដើម្បីដាក់លិខិតសុំជួបលោកដោយផ្ទាល់។ គោលបំណងនៃការសុំជួបនេះ គឺដើម្បីបានឱកាសលាតត្រដាងនូវទុក្ខវេទនារបស់ពួកគេ ជុំវិញការឈួសឆាយដីធ្លីនិងផ្ទះសម្បែងពីសំណាក់អ្នកមានលុយ មានអំណាច។ ការសម្រេចចិត្ត សុំជំនួយពីលោកនាយករដ្ឋមន្ត្រី ព្រោះពួកគេយល់ថា មានតែលោកម្នាក់ប៉ុណ្ណោះ ដែលអាចដោះស្រាយបញ្ហារបស់ពួកគេបាន។

ប្រជាពលរដ្ឋជនជាដើមភាគតិច មានក្តីកង្វល់ជាពន់ពេកពីបញ្ហាដីធ្លី ដែលតែងតែរងនូវការរំលោភបំពានពីសំណាក់អ្នកមានលុយ និងមានអំណាច។ ពួកគេអះអាងថា ប្រសិនបើគ្មានអន្តរាគមន៍ពីរាជរដ្ឋាភិបាលនោះទេ នោះក្រុមហ៊ុន នឹងរឹតតែគឃ្លើនក្នុងការរុករានទន្ទ្រានយកដីធ្លី របស់ពលរដ្ឋជនជាតិដើមភាគតិច ឥតឈប់ឈរ។

ការឆក់យកដីធ្លីពីសំណាក់ក្រុមហ៊ុននេះ ធ្វើឲ្យពលរដ្ឋជនជាតិដើមភាគតិចរស់នៅ បែកខ្ញែកគ្នាជាច្រើនកន្លែង និងគ្មានលំនៅដ្ឋានច្បាស់លាស់។ ការរស់នៅដោយគ្មានសហគមន៍បែបនេះ ជាហេតុនាំឲ្យបាត់បង់អត្តសញ្ញាណ និងប្រពៃណីរបស់ជនជនដើមភាគតិច។

មុននឹងដាក់ខិលិតទៅកាន់ប្រមុខរដ្ឋាភិបាល តំណាងសហគមន៍ជនជាតិដើមភាគតិចំនួន២២នាក់ បានធ្វើសន្និសីទសារព័ត៌មានស្តីពី «ការទាមទារឲ្យមានវិធានការដើម្បីសិទ្ធិដីធ្លីរបស់សហគមន៍ជនជាតិដើមភាគតិច» នៅថ្ងៃទី១៥ មីនានេះ។ ពលរដ្ឋជនជាតិដើមភាគតិចទាំង២២នាក់នោះ តំណាងឲ្យសហគមន៍ជនជាតិដើមភាគតិចចំនួន១០ រួមមាន ព្នង គួយ ជង ស្ទៀង សួយ ពរណ៍ ប្រូវ ទំពួន គ្រីង ស្អូច ដែលមកពីបណ្តាខេត្តចំនួន១០ គឺព្រះវិហារ ស្ទឹងត្រែង មណ្ឌគិរី រតនគិរី កោះកុង កំពង់ស្ពឺ ត្បូងឃ្មុំ ក្រចេះ កំពង់សោម ពោធិ៍សាត់។

អ្នកតំណាងទាំងនោះ បានលើកឡើងក្នុងសន្និសីទកាសែតថា កន្លងមកពួកគេក៏ធ្លាប់ស្រែកអំពាវនាវដល់ប្រមុខរដ្ឋាភិបាលដែរ តែសម្តេច ហ៊ុន សែន ហាក់ដូចជាព្រងើយកន្តើយ និងមិនចាប់អារម្មណ៍ ចំពោះការទាមទាររបស់ពលរដ្ឋជនជាតិដើមភាគតិចឡើយ។ ហេតុដូច្នេះហើយ ទើបពួកគេសម្រេចចិត្តថាត្រូវតែធ្វើសន្និសីទកាសែត ដើម្បីបើកបង្ហាញពីបញ្ហាដីធ្លីរបស់ជនជាតិដើមភាគតិច និងគ្រោងដាក់លិខិតទៅប្រមុខរដ្ឋាភិបាល ដើម្បីសុំជួបដោយផ្ទាល់។

ជាងនេះទៀត ប្រជាពលរដ្ឋជនជាតិដើមភាគតិច ក៏បានអះអាងថា ក្រុមហ៊ុនតែងតែបំពានលើអនុក្រឹត្យរបស់រាជរដ្ឋាភិបាល និងច្បាប់ភូមិបាល ព្រមទាំងមិនគោរពសិទ្ធិជនជាតិដើមភាគតិចផងដែរ។ ដើម្បីទប់ស្តាត់ការរំលោភបំពានបែបនេះ ពួកគេបានស្នើឲ្យរដ្ឋាភិបាល ជួយពន្លឿនការចុះបញ្ជីដីសមូហភាព នៃសហគមន៍ជនជាតិដើមភាគតិច។

សូមបញ្ជាក់ គិតមកដល់ពេលបច្ចុប្បន្ននេះ ដីសមូហភាពរបស់សហគមន៍ជនជាតិដើមភាគតិចមានតែ១១សហគមន៍ ប៉ុណ្ណោះ ដែលបានទទួលបណ្ណកម្មសិទ្ធិ ជាផ្លូវការ។ សហគមន៍ជនជាតិដើមភាគតិចទាំងអស់ មានចំនួន៤៥៥ និងប្រជាជន ១៩០.០០០ នាក់ ស្មើនឹង ១.៤ ភាគរយ នៃប្រជាជនកម្ពុជាទូទាំងប្រទេស។ នេះបើតាមរបាយការណ៍របស់ មជ្ឈមណ្ឌលសិទ្ធិមនុស្សកម្ពុជា (CCHR) ស្តីពី«ការទទួលបានបណ្ណកម្មសិទ្ធិដីសមូហភាពរបស់សហគមន៍ជនជាតិដើមភាគតិចនៅកម្ពុជា» ដែលបានចុះផ្សាយនៅ ខែកុម្ភៈ ឆ្នាំ២០១៦ ៕